مجمع الزوائد ومنبع الفوائد

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ نے اپنی کتاب میں جس چیز کو حلال قرار دیا ہے ، وہ حلال ہے اور جسے حرام قرار دیا ہے ، وہ حرام ہے ، اور جس کے حوالے سے وہ خاموش رہا ہے ، تو یہ معافی ہے ، تو تم اللہ تعالیٰ سے اُس کی عطا کردہ عافیت کو قبول کرو ! بے شک اللہ تعالیٰ کسی چیز کو بھولتا نہیں ، پھر آپ صلی اللہ علیہ وسلم نے یہ آیت تلاوت کی : ” اور تمہارا پروردگار بھولنے والا نہیں ہے “
یہ روایت امام بزار اور امام طبرانی نے معجم کبیر میں نقل کی ہے اس کی سند حسن ہے اور اس کے رجال کی توثیق کی گئی ہے ۔

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ نے کچھ چیزیں فرض قرار دی ہیں ، تو تم انہیں ضائع نہ کرو ، اس نے کچھ حدود مقرر کی ہیں ، تم ان سے تجاوز نہ کرو اور اس نے کئی چیزوں کے حوالے سے ، بھولے بغیر خاموشی اختیار کی ہے ، تو تم اس کے پابند نہیں ہو ، اس نے تمہارے لیے رحمت کے طور پر ایسا کیا ہے ، تو تم اسے قبول کرو !“ ۔
یہ روایت امام طبرانی نے معجم اوسط اور معجم صغیر میں نقل کی ہے اس کی سند میں ایک راوی اصرم بن حوشب ہے ، وہ متروک ہے اور اس کی نسبت حدیث ایجاد کرنے کی طرف کی گئی ہے ۔

سیدنا ابوثعلبہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ نے کچھ فرض مقرر کیے ہیں ، تو تم انہیں ضائع نہ کرو ، اس نے کچھ چیزوں سے منع کیا ہے ، تو تم اس کی خلاف ورزی نہ کرو ، اس نے کچھ حدود متعین کی ہیں ، تو تم ان سے تجاوز نہ کرو ، اور اس نے بھولے بغیر کچھ چیزوں کے حوالے سے غفلت ( ظاہر ) کی ہے ، تو تم اُن کے بارے میں بحث ( یا تفتیش ) نہ کرو !“ ۔
یہ روایت امام طبرانی نے معجم کبیر میں نقل کی ہے اور اس روایت میں یہ اسی طرح ( یعنی غفلت کے اظہار کے الفاظ کا ذکر ) ہے ، یوں محسوس ہوتا ہے کہ کسی راوی نے یہ گمان کیا کہ ” اُس نے خاموشی اختیار کی“ کا مطلب یہی بنتا ہے ، تو اس نے یہ لفظ اسی طرح ( یعنی روایت بالمعنی کے طور پر ) روایت کر دیا ، باقی اللہ بہتر جانتا ہے ، اس روایت کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” میرے حوالے سے کسی بات کو نہ تھامو ! بے شک میں صرف اسی چیز کو حلال قرار دیتا ہوں ، جسے اللہ تعالیٰ نے اپنی کتاب میں حلال قرار دیا ہو ، اور میں صرف اسی چیز کو حرام قرار دیتا ہوں ، جسے اللہ تعالیٰ نے اپنی کتاب میں حرام قرار دیا ہو ۔ “
یہ روایت امام طبرانی نے معجم اوسط میں نقل کی ہے ، انہوں نے یہ بات بیان کی ہے : یحیی بن سعید کے حوالے سے اس روایت کو صرف علی بن عاصم نے نقل کیا ہے ، صالح بن حسن بن محمد زعفرانی اس کو نقل کرنے میں منفرد ہے ۔ ( علامہ ہیثمی فرماتے ہیں : ) میں نے کسی کو ان دونوں کے حالات ذکر کرتے ہوئے نہیں دیکھا ہے ۔

سیدنا عبداللہ بن عباس رضی اللہ عنہما بیان کرتے ہیں ۔ نبی اکرم صلی اللہ علیہ وسلم نے خطبہ دیتے ہوئے ارشاد فرمایا : ” بے شک اللہ تعالیٰ نے ہر حق دار کو اس کا حق دے دیا ہے ، خبردار ! بے شک اللہ تعالیٰ نے کچھ فرائض مقرر کیے ہیں ، کچھ سنن مقرر کی ہیں ، کچھ حدود متعین کی ہیں ، اُس نے کچھ چیزوں کو حلال قرار دیا ہے اور کچھ چیزوں کو حرام قرار دیا ہے ، اُس نے دین کو مشروع قرار دیا ہے اور اسے سہل ، نرم اور وسیع ( یعنی زیادہ گنجائش والا ) بنایا ہے اس نے اسے تنگ نہیں بنایا ہے ، خبردار ! اس شخص کا ایمان نہیں جس کی امانت نہ ہو ، اور اُس شخص کا دین نہیں ، جس کا عہد نہ ہو ، جو شخص اللہ تعالیٰ کی دی ہوئی پناہ کی خلاف ورزی کرے گا ، اللہ تعالیٰ اس سے حساب لے گا ، اور جو شخص میری دی ہوئی پناہ کی خلاف ورزی کرے گا ، میں اُس کا مقابلہ فریق بنوں گا اور جس شخص کا مقابل فریق میں ہوؤں گا میں اسے مغلوب کر دوں گا ، جو شخص میری دی ہوئی پناہ کی خلاف ورزی کرے گا ، اسے میری شفاعت نصیب نہیں ہو گی اور وہ حوض ( کوثر ) پر نہیں آئے گا ، خبردار ! بے شک اللہ تعالیٰ نے کسی کو قتل کرنے کی اجازت نہیں دی ہے ، البتہ تین افراد کا معاملہ مختلف ہے ، ایمان کے بعد مرتد ہو جانا ، محصن ہونے کے باوجود زنا کرنے والا شخص اور کسی کو قتل کرنے والا شخص ، کہ اُس قتل کے بدلے میں ، اُسے قتل کر دیا جائے گا ، خبردار ! کیا میں نے تبلیغ کر دی ہے ؟ “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حسین بن قیس ہے جس کا لقب “” “” بحنش “” “” ہے اور وہ متروک الحدیث ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سنت دو قسم کی ہے ، ایک وہ سنت ہے ، جس کا تعلق فرض سے ہو ، اور ایک وہ سنت ہے جس کا تعلق فرض کے علاوہ سے ہو ، وہ سنت جس کا تعلق فرض سے ہو ، اس کی اصل اللہ کی کتاب میں ہو گی ، اس کو اختیار کرنا ہدایت ہے اور اسے ترک کرنا گمراہی ہے ، اور وہ سنت ، جس کی اصل اللہ کی کتاب میں نہ ہو ، اس کو اختیار کرنا فضیلت ( یعنی مستحب ) ہے اور اُسے ترک کرنا گناہ نہیں ہے ۔ “
یہ روایت امام طبرانی نے معجم اوسط میں نقل کی ہے ، وہ فرماتے ہیں : ابوسلمہ کے حوالے سے اس روایت کو صرف عیسیٰ بن واقد نے نقل کیا ہے ، عبداللہ بن رومی نامی راوی اسے نقل کرنے میں منفرد ہے ، میں نے کسی کو اُس کے حالات ذکر کرتے ہوئے نہیں دیکھا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری امت میں فساد کے وقت میری سنت کو مضبوطی سے تھامنے والے کو شہید کا اجر ملے گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن صالح عدوی ہے ، میں نے کسی کو اس کے حالات ذکر کرتے ہوئے نہیں دیکھا ، اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما فرماتے ہیں : علم تین قسم کا ہے ، بولنے والی کتاب ، جاری شدہ سنت اور یہ کہنا : کہ میں نہیں جانتا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حصین ہے ، جس کا اسم منسوب ذکر نہیں ہوا ہے ، اس نے یہ روایت امام مالک کے حوالے سے نقل کی ہے ، جبکہ اُس سے یہ روایت ابراہیم بن منذر نے نقل کی ہے ، میں نے کسی کو اس کے حالات ذکر کرتے ہوئے نہیں دیکھا ہے ۔

سیدنا حذیفہ بن یمان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب تم پر ایسا زمانہ آئے گا ، جس میں تین چیزوں سے زیادہ قیمتی اور کوئی چیز نہیں ہو گی ، حلال درہم ، ایسا بھائی جس سے انسیت محسوس ہو اور ایسی سنت جس پر عمل کیا جائے ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی روح بن صلاح ہے ، جسے ابن عدی نے ضعیف قرار دیا ہے ، حاکم کہتے ہیں : یہ ثقہ اور مامون ہے ، ابن حبان نے اس کا ذکر کتاب الثقات میں کیا ہے ، اس روایت کے بقیہ رجال کی توثیق کی گئی ہے ۔

سیدنا عمران بن حصین رضی اللہ عنہ فرماتے ہیں : قرآن نازل ہوا ، اور نبی اکرم صلی اللہ علیہ وسلم نے کچھ سنتیں مقرر کی ہیں ، پھر انہوں نے فرمایا : تم ہماری پیروی کرو ! اللہ کی قسم ! اگر تم ایسا نہیں کرو گے ، تو تم گمراہ ہو جاؤ گے ۔
یہ روایت امام أحمد نے نقل کی ہے ، اس کی سند میں ایک راوی علی بن زید بن جدعان ہے اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : سنت کے بارے میں میانہ روی اختیار کرنا ، بدعت کے بارے میں بھرپور کوشش کرنے سے زیادہ بہتر ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن بشیر کندی ہے ، یحیی فرماتے ہیں : یہ ثقہ نہیں ہے ۔