مجمع الزوائد ومنبع الفوائد

سیدنا رافع بن خدیج رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری طرف جھوٹی بات منسوب نہ کرو ! کیونکہ میری طرف جھوٹی بات منسوب کرنا ، کسی اور ( شخص ) کی طرف جھوٹی بات منسوب کرنے کی مانند نہیں ہے ۔ “
یہ روایت امام طبرانی نے معجم کبیر میں نقل کی ہے اس کی سند میں ایک راوی رفاعہ بن ہریر ہے جسے ابن حبان اور دیگر حضرات نے ضعیف قرار دیا ہے ۔

سیدنا اوس بن اوس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص اپنے نبی کے حوالے سے ، یا اپنی آنکھوں کے حوالے سے ، یا اپنے والدین کے حوالے سے جھوٹ بولتا ہے ( یعنی جو شخص جھوٹی حدیث روایت کرتا ہے ، یا جھوٹا خواب بیان کرتا ہے ، یا اپنے باپ کی بجائے کسی اور کی طرف خود کو منسوب کرتا ہے ) وہ جنت کی خوشبو بھی نہیں پا سکے گا ۔ “
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔

سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میرے حوالے سے جھوٹ بیان نہ کرو ! میرے حوالے سے جھوٹ بیان کرنے والا شخص ( گناہ کے کام میں ) جری ہو گا ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابوبلال اشعری ہے ، جسے امام دارقطنی رحمہ اللہ نے ضعیف قرار دیا ہے ۔

ابوخلدہ بیان کرتے ہیں : میں نے میمون کردی کو سنا : وہ اُس وقت مالک بن دینار کے پاس موجود تھے ، مالک بن دینار نے اُن سے کہا: کیا وجہ ہے کہ بزرگوار ( یعنی آپ ) اپنے والد کے حوالے سے حدیث روایت نہیں کرتے ہیں ؟ حالانکہ آپ کے والد نے نبی اکرم صلی اللہ علیہ وسلم کا زمانہ پایا ہے اور نبی اکرم صلی اللہ علیہ وسلم سے سماع کیا ہے ، تو میمون نے بتایا : میرے والد نبی اکرم صلی اللہ علیہ وسلم کے حوالے سے ہمیں کوئی حدیث بیان نہیں کرتے تھے ، اس اندیشے کے تحت کہ کہیں وہ کوئی کمی یا بیشی نہ کر دیں ، انہوں نے یہ بات بیان کی ہے : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص جان بوجھ کر میری طرف کوئی جھوٹی بات منسوب کرتا ہے ، اُسے جہنم میں اپنے ٹھکانے تک پہنچنے کے لیے تیار رہنا چاہیے ۔ “
یہ روایت امام طبرانی نے معجم اوسط میں نقل کی ہے اور اس کی سند حسن ہو گی ، اگر اللہ نے چاہا ۔

سیدنا ابوہریرہ رضی اللہ عنہ فرماتے ہیں : تین آدمی جنت کی خوشبو بھی نہیں پائیں گے ، ایک وہ شخص جو اپنے باپ کے علاوہ کسی اور ( کی اولاد ہونے ) کا دعوی کرے ، ایک وہ شخص جو اپنے نبی کے حوالے سے جھوٹی بات بیان کرے اور ایک وہ شخص جو اپنی آنکھوں کے حوالے سے جھوٹی بات ( یعنی جھوٹا خواب ) بیان کرے ۔
یہ روایت امام بزار نے نقل کی ہے ، اس روایت کی سند میں ایک راوی عبدالرزاق بن عمر ہے ، یہ ضعیف ہے ، کسی نے بھی اسے ثقہ قرار نہیں دیا ہے ۔