مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” دو حرص والی چیزیں ایسی ہیں کہ ان دونوں ( چیزوں ) کا طلبگار سیر نہیں ہوتا ، علم کا طلبگار اور دنیا کا طلبگار “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوبکر داہری ہے ، جو ضعیف ہے ۔

مجاہد نے ، سیدنا عبداللہ بن عباس رضی اللہ عنہما کے حوالے سے یہ روایت نقل کی ہے : ( راوی کہتے ہیں : میرا خیال ہے ، انہوں نے ، نبی اکرم صلی اللہ علیہ وسلم تک ” مرفوع “ حدیث کے طور پر ، اسے نقل کیا ہے ، آپ صلی اللہ علیہ وسلم نے ارشاد فرمایا ہے : ” حرص والی دو چیزیں ایسی ہیں ، جن کی حرص ختم نہیں ہوتی ہے ، جس شخص کو علم کے حصول کی حرص ہو ، اُس کی حرص ختم نہیں ہوتی ہے ، اور جس شخص کو دنیا کے حصول کی حرص ہو ، اس کی حرص ختم نہیں ہوتی ہے “ ۔
یہ روایت امام طبرانی نے معجم اوسط اور معجم کبیر میں ، اور امام بزار نے نقل کی ہے ، اس کی سند میں ایک راوی ابوسلیم ہے ، اور وہ ضعیف ہے ۔

سیدہ عائشہ صدیقہ رضی اللہ عنہا روایت کرتی ہیں : نبی اکرم صلی اللہ علیہ وسلم نے ارشاد فرمایا ہے : ” چار چیزیں ، چار چیزوں کے حوالے سے سیر نہیں ہوتی ہیں ، آنکھ دیکھنے سے ، زمین ، بارش سے ، مونث ، مذکر سے ، اور عالم ، علم سے ( کبھی سیر نہیں ہوتے ہیں ) “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبدالسلام بن عبدالقدوس ہے اور وہ ضعیف ہے ، اُس سے استدلال نہیں کیا جائے گا ۔