مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” علم سیکھو ! اور علم کے لئے سکینت اور وقار سیکھو ! اور جن سے تم علم سیکھتے ہو ، ان کے سامنے تواضع کا اظہار کرو “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عباد بن کثیر ہے ، اور وہ متروک الحدیث ہے ۔

جمیلہ نامی خاتون ، جو سیدنا انس بن مالک رضی اللہ عنہ کی اُم ولد ہیں ، وہ بیان کرتی ہیں : ثابت ، جب سیدنا انس رضی اللہ عنہ کے پاس آتے تھے ، تو سیدنا انس رضی اللہ عنہ فرماتے تھے : اے لڑکی ! میرے پاس خوشبو لے کر آؤ ! تاکہ میں اُسے ہاتھ پر لگا لوں ، کیونکہ ثابت کی ماں کا بیٹا ( یعنی خود ثابت ) دست بوسی کیے بغیر راضی نہیں ہو گا ۔
یہ روایت امام ابویعلیٰ نے نقل کی ہے اور میں نے جمیلہ نامی اس خاتون کے حالات کہیں نہیں دیکھے ہیں ۔