مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” تعلیم دو ! آسانی فراہم کرو ، تنگی کا شکار نہ کرو “ ۔
یہ روایت امام أحمد نے نقل کی ہے ، یہ مکمل روایت ” کتاب الادب “ میں آئے گی ، اس کی سند میں ایک راوی لیث بن ابوسلیم ہے اور وہ تدلیس کرنے والا ہے ۔

سیدنا ابوامامہ رضی اللہ عنہ بیان کرتے ہیں : ” قریش سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! آپ مجھے زنا کرنے کی اجازت دیں ! لوگ اُس کی طرف متوجہ ہوئے اور اُنہوں نے اُسے ڈانٹا اور بولے : رک جاؤ رک جاؤ ! نبی اکرم صلی اللہ علیہ وسلم نے فرمایا : تم قریب آ جاؤ ! وہ شخص نبی اکرم صلی اللہ علیہ وسلم کے قریب ہوا ، تو نبی اکرم صلی اللہ علیہ وسلم نے دریافت کیا : کیا تم اس ( زنا کرنے کو ) اپنی ماں کے لئے پسند کرو گے ؟ ( یعنی کیا تم یہ پسند کرو گے کہ تمہاری ماں یہ کام کرے ؟ یا اسے اس کی اجازت دیدی جائے ) اُس نے جواب دیا : جی نہیں ! اللہ کی قسم ! ( یعنی میں یہ پسند نہیں ) کروں گا اللہ تعالیٰ مجھے آپ پر فدا کرے ! نبی اکرم صلی اللہ علیہ وسلم نے فرمایا : لوگ بھی اس ( زنا ) کو اپنی ماؤں کے لیے پسند نہیں کرتے ہیں ، پھر آپ صلی اللہ علیہ وسلم نے دریافت کیا : کیا تم اسے ( یعنی زنا کو ) اپنی بیٹی کے لئے پسند کرو گے ؟ اُس نے جواب دیا : جی نہیں ! یا رسول اللہ ! اللہ کی قسم ( میں پسند نہیں کروں گا ) اللہ تعالیٰ مجھے آپ پر فدا کرے ، نبی اکرم صلی اللہ علیہ وسلم نے فرمایا : لوگ بھی اس ( زنا ) کو اپنی بیٹیوں کے لیے پسند نہیں کرتے ہیں ، پھر آپ صلی اللہ علیہ وسلم نے دریافت کیا : کیا تم اسے ( یعنی زنا کو ) اپنی بہن کے لئے پسند کرو گے ؟ اس نے جواب دیا : جی نہیں ! اللہ کی قسم ! یا رسول اللہ ( میں پسند نہیں کروں گا ) اللہ تعالیٰ مجھے آپ پر فدا کرے نبی اکرم صلی اللہ علیہ وسلم نے فرمایا : لوگ بھی اس ( زنا ) کو اپنی بہنوں کے لیے پسند نہیں کرتے ہیں ۔ پھر آپ صلی اللہ علیہ وسلم نے دریافت کیا : کیا تم اسے ( یعنی زنا کو ) اپنی پھوپھی کے لئے پسند کرو گے ؟ اُس نے جواب دیا : جی نہیں ! اللہ کی قسم ! یا رسول اللہ ! ( میں پسند نہیں کروں گا ) اللہ تعالیٰ مجھے آپ پر فدا کرے ، نبی اکرم صلی اللہ علیہ وسلم نے فرمایا : لوگ بھی اس ( زنا ) کو اپنی پھوپھیوں کے لیے پسند نہیں کرتے ہیں ، پھر آپ نے دریافت کیا : کیا تم اسے ( یعنی زنا کو ) اپنی خالہ کے لئے پسند کرو گے ؟ اس نے جواب دیا : جی نہیں ! اللہ کی قسم ! یا رسول اللہ ! ( میں پسند نہیں کروں گا ) اللہ تعالیٰ مجھے آپ پر فدا کرے ! نبی اکرم صلی اللہ علیہ وسلم نے فرمایا : لوگ بھی اس ( زنا ) کو اپنی خالاؤں کے لیے پسند نہیں کرتے ہیں ، پھر نبی اکرم صلی اللہ علیہ وسلم نے اپنا دست مبارک اُس پر رکھا اور دعاء کی : اے اللہ ! اس کے گناہ کی مغفرت کر دے ! اس کے دل کو پاک کر دے اور اس کی شرمگاہ کو محفوظ رکھنا “ ۔ راوی بیان کرتے ہیں : اُس کے بعد ، وہ نوجوان کسی چیز کی طرف التفات نہیں کرتا تھا ۔
یہ روایت امام أحمد اور امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا ابوامامہ رضی اللہ عنہ بیان کرتے ہیں : ” نبی اکرم صلی اللہ علیہ وسلم جب کوئی بات ارشاد فرماتے تھے ، تو وہ بات ) دو یا تین مرتبہ ارشاد فرماتے تھے ، تاکہ آپ کی بات ( سامعین کو ) سمجھ آ جائے “ ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔