مجمع الزوائد ومنبع الفوائد

حزام بن حکیم بن حزام ، اپنے والد کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ ایک ایسے زمانے میں ہو ، جس میں دین کا علم رکھنے والے لوگ زیادہ ہیں اور خطاب کرنے والے تھوڑے ہیں ، دینے والے زیادہ ہیں اور مانگنے والے کم ہیں ، اس زمانے میں عمل ، علم سے بہتر ہے ، عنقریب ایک ایسا زمانہ آئے گا ، جس میں علم والے لوگ تھوڑے ہوں گے ، اور خطیب زیادہ ہوں گے ، مانگنے والے زیادہ ہوں گے اور دینے والے کم ہوں گے ، ایسے وقت میں علم ، عمل سے بہتر ہو گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عثمان بن عبدالرحمن طرائفی ہے اور وہ ثقہ ہے ، تاہم اس کے بارے میں یہ بات کہی گئی ہے : وہ ضعیف راویوں سے روایات نقل کرتا ہے اور یہ روایت اُس نے صدقہ بن خالد سے نقل کی ہے ، جو صحیح کے رجال میں سے ایک ہے ۔

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ ایک ایسے زمانے میں ہو ، جس میں علماء زیادہ ہیں اور خطیب کم ہیں ، اس زمانہ میں جو شخص اپنے علم کے مطابق سب سے چھوٹا دسواں حصہ بھی چھوڑے گا ، وہ جہنم میں گر جائے گا ، عنقریب لوگوں پر ایسا زمانہ آئے گا ، جس میں علماء تھوڑے ہوں گے اور خطیب زیادہ ہوں گے ، اُس زمانے میں جو شخص اپنے علم کے دسویں حصے کو تھامے رکھے گا ، وہ نجات پا جائے گا “ ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ۔

حزام بن حکیم ، اپنے چچا کے حوالے سے ، نبی اکرم صلی اللہ علیہ وسلم کا یہ فرمان نقل کرتے ہیں : ” تم لوگ ایک ایسے زمانے میں ہو ، جس میں علماء زیادہ ہیں اور خطیب کم ہیں ، دینے والے زیادہ ہیں اور مانگنے والے کم ہیں ، اس زمانے میں عمل کرنا ، علم سے زیادہ بہتر ہے ، عنقریب ایسا زمانہ آئے گا ، جس میں علماء کم ہوں گے اور خطیب زیادہ ہوں گے ، مانگنے والے زیادہ ہوں گے ، اور دینے والے کم ہوں گے ، اس زمانے میں علم ، عمل سے بہتر ہو گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی صدقہ بن عبداللہ سمین ہے اور وہ ضعیف اور منکر الحدیث ہے ۔