مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ کا ایک فرشتہ ایسا ہے کہ اگر اُسے یہ کہا: جائے : کہ تم ساتوں آسمانوں اور ساتوں زمینوں کو ایک لقمے کے طور پر نگل جاؤ ! تو وہ ایسا کر لے گا ، اُس کی تسبیح کے کلمات یہ ہیں : ” تو ہر عیب سے پاک ہے ، تو جہاں کہیں بھی ہے “ ۔
یہ روایت امام طبرانی نے معجم اوسط اور معجم کبیر میں نقل کی ہے ، وہ فرماتے ہیں : وہب بن رزق نامی راوی اس کو نقل کرنے میں منفرد ہے ، ( علامہ ہیثمی فرماتے ہیں : ) میں یہ کہتا ہوں : میں نے کسی کو اس راوی کے حالات ذکر کرتے ہوئے نہیں دیکھا ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مجھے یہ اجازت دی گئی کہ میں عرش کو اُٹھانے والے فرشتوں میں سے ، رشتے کے بارے میں ، بات چیت کر سکتا ہوں اس فرشتے کے دونوں پاؤں سب سے نیچے والی زمین میں ہیں ، اور اس کے سینگ پر عرش ہے ، اس کے کان کی لو سے ، لے کر گردن تک کے درمیان اتنا فاصلہ ہے ، جتنا فاصلہ کوئی پرندہ سات سو سال میں طے کرتا ہے ، وہ فرشتہ یہ کہتا ہے : ” تو ہر عیب سے پاک ہے ، تو جہاں کہیں بھی ہے “ ۔
یہ روایت امام طبرانی نے معجم اوسط میں نقل کی ہے ، وہ فرماتے ہیں : عبداللہ بن منکدر اسے نقل کرنے میں منفرد ہے ، ( علامہ ہیثمی فرماتے ہیں : ) میں یہ کہتا ہوں : وہ اور اُس کا باپ دونوں ضعیف ہیں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مجھے یہ اجازت دی گئی کہ میں عرش کو اٹھانے والے ، اللہ تعالیٰ کے فرشتوں میں سے کسی فرشتے کے بارے میں بیان کروں ، اس فرشتے کی کان کی لو سے لے کر ، اُس کی گردن کے درمیان تک ، ستر برس کی مسافت کا فاصلہ ہے “ ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے بھی نقل کی ہے ، تاہم انہوں نے 70 برس کے الفاظ نقل نہیں کیے ہیں ۔ یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھے یہ اجازت دی گئی کہ میں اس فرشتے کے بارے میں بیان کروں ، جس کے پاؤں ساتویں زمین میں ہیں ، اور عرش اس کے کندھوں پر ہے ، اور وہ یہ کہتا ہے : ” تو ہر عیب سے پاک ہے ، تو جہاں کہیں بھی تھا اور جہاں کہیں ہو گا “۔
یہ روایت امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک فرشتہ میرے پاس آیا ، جو اس سے پہلے کبھی زمین کی طرف نازل نہیں ہوا تھا ، وہ میرے پروردگار کا پیغام لایا تھا ، اُس نے اپنا ایک پاؤں آسمان دنیا کے اوپر رکھا اور ایک پاؤں زمین میں رکھا ، کیونکہ زمین اُس کے لئے تھوڑی پڑ رہی تھی “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صدقہ بن عبدالله تنیسی ہے ، زیادہ تر حضرات نے اسے ضعیف قرار دیا ہے ، تاہم یحییٰ بن معین اور دحیم نے اُس کی توثیق کی ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آسمان میں ایک فرشتہ ہے ، جس کا نام ” اسماعیل “ ہے ، وہ ستر ہزار فرشتوں کا نگران ہے ، اور ان ( ستر ہزار فرشتوں ) میں سے ہر ایک ( فرشتہ ، مزید ) ستر ہزار فرشتوں کا نگران ہے “ ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی ابوبارون ہے ، اس کا نام عمارہ بن جوین ہے اور وہ انتہائی ضعیف ہے ۔