دفاع سیدنا معاویہؓ: مقدمہ، سببِ تالیف اور منہجِ تحقیق

فونٹ سائز:
یہ اقتباس حافظ ابو معاویہ عبدالرحمٰن سلفی حفظہ اللہ کی کتاب دفاع سیدنا امیر معاویہ رضی اللہ عنہ سے ماخوذ ہے۔
مضمون کے اہم نکات

مقدمہ

امیر المؤمنین سیدنا معاویہ رضی اللہ عنہ کی شخصیت تاریخِ اسلام کی اُن عظیم اور اثر آفرین شخصیات میں سے ہے جن کے گرد صدیوں سے بحث و تمحیص کا سلسلہ جاری ہے۔ ایک طرف ان کا شمار کبار صحابۂ کرام رضی اللہ عنہم، کتّابِ وحی، فقہاءِ صحابہ رضی اللہ عنہم، فاتحینِ اسلام اور اکابر حکمرانوں میں ہوتا ہے۔ جبکہ دوسری طرف تاریخ کے بعض ادوار میں ان کی ذات کو اعتراضات، الزامات اور تعصبات کا ایسا ہدف بنایا گیا کہ ان کے روشن فضائل اور بے مثال خدمات اکثر نگاہوں سے اوجھل ہوگئیں۔ چنانچہ جب ایک طالبِ حق تاریخ کے اوراق کا مطالعہ کرتا ہے تو وہ ایک عجیب منظر دیکھتا ہے کہ جس شخصیت کے بارے نبی کریم صلی اللہ علیہ وسلم کی دعائیں منقول ہوں، جو وحیِ الٰہی کے کاتب ہوں، جنہیں اکابر صحابۂ کرام رضی اللہ عنہم کی رفاقت اور اعتماد حاصل ہو، جن کے دور میں اسلامی سلطنت کی سرحدیں سمندروں اور براعظموں تک پھیل گئی ہوں، اسی شخصیت کو بعض حلقوں میں تنقید اور اعتراض کا سب سے بڑا مرکز بنا دیا گیا۔ حقیقت یہ ہے کہ سیدنا معاویہ رضی اللہ عنہ کی ذات کو سمجھنے میں سب سے بڑی رکاوٹ وہ تاریخی مواد ہے جو علمی تحقیق سے زیادہ سیاسی کشمکش اور فرقہ وارانہ مناظروں کے زیرِ اثر مرتب ہوا۔ جب بنو امیہ اور بنو عباس کی سیاسی رقابتیں وجود میں آئیں، جب مختلف فرقے اپنے اپنے نظریات کے اثبات کے لیے تاریخ کو بطور ہتھیار استعمال کرنے لگے اور جب روایت و حکایت کے درمیان فرق مٹنے لگا تو بہت سی ایسی باتیں تاریخ کی کتابوں میں داخل ہوگئیں جنہیں بعد میں بلا تحقیق نقل کیا جاتا رہا۔ نتیجتاً ایک ایسا ماحول پیدا ہوا جس میں سیدنا معاویہ رضی اللہ عنہ کے فضائل سے زیادہ ان کے خلاف کہی جانے والی باتوں کو شہرت حاصل ہوئی اور ان کی خدمات کی بجائے اختلافی واقعات کو موضوعِ بحث بنایا جانے لگا۔ حالانکہ علمی دیانت کا تقاضا یہ ہے کہ ہر شخصیت کو اس کے پورے تاریخی پس منظر، تمام متعلقہ شواہد اور معتبر مصادر کی روشنی میں دیکھا جائے۔ اگر یہی اصول اختیار کیا جائے تو سیدنا معاویہ رضی اللہ عنہ کی شخصیت محض ایک سیاسی قائد یا تاریخی کردار کے طور پر نہیں بلکہ ایک ایسے جلیل القدر صحابی کے طور پر سامنے آتی ہے جس نے عہدِ نبوت میں صحبتِ رسول صلی اللہ علیہ وسلم کا شرف پایا، عہدِ صدیقی، فاروقی اور عثمانی میں اہم ذمہ داریاں ادا کیں۔ شام جیسے حساس محاذ کو استحکام بخشا، اسلامی بحری قوت کی بنیاد رکھی، رومی سلطنت کے مقابلے میں مسلمانوں کو نئی عسکری قوت عطا کی اور بالآخر امتِ مسلمہ کو ایک طویل خانہ جنگی کے بعد سیاسی وحدت فراہم کی۔ مزید برآں یہ بھی ایک ناقابلِ انکار حقیقت ہے کہ اگر کسی شخصیت کے بارے میں اختلاف پیدا ہو جائے تو اہلِ سنت کا منہج یہ نہیں کہ جذبات کی بنیاد پر فیصلہ صادر کر دیا جائے بلکہ قرآن، سنت اور اقوالِ سلف کی روشنی میں منصفانہ رائے قائم کی جائے۔ چنانچہ جب ہم سیدنا معاویہ رضی اللہ عنہ کے بارے میں صحابۂ کرام رضی اللہ عنہم، تابعین، آئمہ حدیث اور اکابر فقہاء کے اقوال کا جائزہ لیتے ہیں تو ہمیں ان کی شخصیت کے بارے میں احترام، توقیر اور حسنِ ظن کا ایک مسلسل اور مضبوط سلسلہ نظر آتا ہے۔ یہی وجہ ہے کہ آئمہ اہلِ سنت نے ہمیشہ ان کے فضائل کا تذکرہ کیا، ان کے مقام و مرتبہ کو تسلیم کیا اور ان کے بارے میں زبان و قلم کو اعتدال و انصاف کا پابند رکھا۔ یہاں یہ بات بھی یاد رکھنی چاہیے کہ کسی شخصیت پر اعتراضات کا وجود خود اس کے مجروح ہونے کی دلیل نہیں ہوتا۔ تاریخ میں انبیائے کرام علیہم السلام سے لے کر خلفائے اربعہ تک شاید ہی کوئی ایسی عظیم شخصیت ملے جس پر اعتراضات نہ کیے گئے ہوں بلکہ یہ بات بھی ایک حقیقت ہے کہ غیر مسلموں کی جانب سے سب سے زیادہ اعتراضات جس ہستی پر ہوئے ہیں وہ ہمارے پیارے نبی کریم صلی اللہ علیہ وسلم کی ذات ہے۔ اصل سوال یہ نہیں کہ اعتراض موجود ہے یا نہیں، بلکہ اصل سوال یہ ہے کہ آیا وہ اعتراض معتبر دلائل پر قائم ہے یا محض تعصب، سوء فہم یا غیر مستند روایات کا نتیجہ ہے۔ چنانچہ جب سیدنا معاویہ رضی اللہ عنہ کے بارے میں پیش کیے جانے والے اکثر اعتراضات کو اصولِ حدیث، قواعدِ جرح و تعدیل اور میزانِ تحقیق پر پرکھا جاتا ہے تو ان میں سے بڑی تعداد یا تو کمزور ثابت ہوتی ہے، یا سیاق و سباق سے ہٹ کر بیان کی گئی ہوتی ہے یا پھر تاریخی مبالغہ آرائی کا شکار نظر آتی ہے۔

❁ سببِ تالیف؛-

زیرِ نظر کتاب بھی اسی مقصد کے تحت مرتب کی گئی ہے کہ امیر المؤمنین سیدنا معاویہ رضی اللہ عنہ کی شخصیت کو افراط و تفریط کے بجائے اعتدال و انصاف کے ساتھ پیش کیا جائے۔ نہ تو ایسی مدح سرائی کی جائے جو تحقیق کے دائرے سے باہر ہو اور نہ ہی ایسے اعتراضات کو قبول کیا جائے جو دلیل و برہان سے محروم ہوں۔ بلکہ کوشش یہ ہے کہ قرآن و سنت، آثارِ صحابہ رضی اللہ عنہم، اقوالِ اہل بیت رضی اللہ عنہم اور تصریحاتِ آئمہ سلف کی روشنی میں ایک ایسی تصویر سامنے لائی جائے جو حقیقت کے زیادہ قریب اور انصاف کے زیادہ مطابق ہو۔ کیونکہ آفتاب کو وقتی طور پر غبار سے ڈھانپا تو جا سکتا ہے مگر اس کی روشنی کو بجھایا نہیں جا سکتا۔ امیر المؤمنین سیدنا معاویہ رضی اللہ عنہ کی شخصیت بھی تاریخِ اسلام کے افق پر ایسا ہی ایک روشن آفتاب ہے جس کی تابانی صدیوں کے اعتراضات کے باوجود آج بھی اہلِ انصاف کی نگاہوں کو خیرہ کرتی ہے۔ ہر کتاب کے پسِ منظر میں کوئی نہ کوئی داعیہ، محرک اور مقصد ضرور کارفرما ہوتا ہے اور زیرِ نظر کتاب بھی محض تاریخی واقعات کو جمع کرنے یا مناظرانہ مباحث کو دہرانے کے لیے مرتب نہیں کی گئی۔ بلکہ اس کی تالیف کا بنیادی محرک وہ فکری، علمی اور تاریخی خلا ہے جو امیر المؤمنین سیدنا معاویہ رضی اللہ عنہ کی شخصیت کے بارے میں پائے جانے والے افراط و تفریط کے نتیجے میں پیدا ہوا۔ ایک طرف وہ حلقے ہیں جنہوں نے تعصب، روایت پرستی اور غیر مستند حکایات کی بنیاد پر سیدنا معاویہ رضی اللہ عنہ کو تنقید و تنقیص کا مستقل ہدف بنا رکھا ہے، جبکہ دوسری طرف عام مسلمانوں کی ایک بڑی تعداد ایسی ہے جو اس تمام شور و غوغا کے درمیان اصل حقائق تک رسائی حاصل کرنے سے محروم رہتی ہے۔ چنانچہ ضرورت محسوس ہوئی کہ ایک ایسی جامع تصنیف سامنے آئے جس میں امیر المؤمنین سیدنا معاویہ رضی اللہ عنہ کی حیات، خدمات، فضائل، مناقب، علمی مقام، فقاہت، سیاست، طرزِ حکمرانی اور ان پر وارد کیے جانے والے اعتراضات کا جائزہ خالص علمی اصولوں اور معتبر مصادر کی روشنی میں لیا جائے۔ اس کتاب کی تالیف کا ایک اہم سبب یہ بھی ہے کہ عصرِ حاضر میں تاریخِ اسلام کو محض تاریخی مطالعے کے بجائے عقائد، شخصیات اور دینی اقدار پر حملے کے ایک ذریعہ کے طور پر استعمال کیا جا رہا ہے۔ چنانچہ صحابۂ کرام رضی اللہ عنہم، بالخصوص امیر المؤمنین سیدنا معاویہ رضی اللہ عنہ کے بارے میں شکوک و شبہات پھیلانا بعض حلقوں کا مستقل وطیرہ بن چکا ہے۔ نئی نسل کے ذہنوں میں یہ اعتراضات اس انداز سے پیش کیے جاتے ہیں گویا پوری تاریخِ اسلام کا سب سے بڑا مسئلہ یہی ہو۔ جبکہ حقیقت میں ان اعتراضات کا ایک بڑا حصہ یا تو ضعیف روایات پر قائم ہے، یا تاریخی سیاق و سباق سے کاٹ کر پیش کیا گیا ہے، یا پھر صدیوں پر محیط فرقہ وارانہ کشمکش کی پیداوار ہے۔ لہٰذا اس کتاب کا مقصد محض دفاع نہیں بلکہ تحقیق، توضیح اور تنقیح ہے تاکہ قاری کو اصل ماخذ اور صحیح علمی منہج سے روشناس کرایا جا سکے۔ مزید برآں یہ کتاب اس احساس کے تحت بھی لکھی گئی ہے کہ امیر المؤمنین سیدنا معاویہ رضی اللہ عنہ کی شخصیت کو اکثر اُن کے مخالفین کے بیان کردہ تعارف کے ذریعے پہچانا جاتا ہے۔ حالانکہ انصاف کا تقاضا یہ ہے کہ کسی شخصیت کا تعارف اس کے اپنے فضائل، خدمات اور معاصرین کی شہادتوں کی روشنی میں کیا جائے۔ یہی وجہ ہے کہ اس کتاب میں حتی المقدور قرآنِ کریم، احادیثِ نبویہ صلی اللہ علیہ وسلم، آثارِ صحابہ رضی اللہ عنہم، اقوالِ تابعین اور تصریحاتِ محدثین و آئمہ سلف کو بنیاد بنایا گیا ہے تاکہ قاری سیدنا معاویہ رضی اللہ عنہ کی شخصیت کو براہِ راست اُن مصادر کی روشنی میں دیکھ سکے جنہیں امت نے ہمیشہ معتبر سمجھا ہے۔ اس کتاب کا مقصد ہرگز یہ نہیں کہ تاریخ کے اختلافی ابواب کو جذباتی نعروں یا غیر علمی طرزِ استدلال کے ذریعے حل کیا جائے، بلکہ مقصود یہ ہے کہ محبتِ صحابہ رضی اللہ عنہم، تعظیمِ اہلِ بیت، احترامِ سلف اور اصولِ تحقیق کے مابین ایک ایسا متوازن راستہ اختیار کیا جائے جو اہلِ سنت والجماعت کے منہج کے مطابق ہو۔ چنانچہ اگر اس کتاب کے مطالعہ کے بعد ایک قاری بھی تعصب کے بجائے تحقیق، جذبات کے بجائے انصاف اور سنی سنائی باتوں کے بجائے دلائل و شواہد کی روشنی میں امیر المؤمنین سیدنا معاویہ رضی اللہ عنہ کی شخصیت کو سمجھنے لگے تو مؤلف اپنی محنت کو بارآور سمجھے گا، والحمد للہ رب العالمین۔

❁ افسانہ تاریخ اور میزان حدیث؛-

اسلامی تاریخ کا مطالعہ جتنا ضروری، مفید اور ناگزیر ہے اتنا ہی حساس، دقیق اور محتاط رویے کا متقاضی بھی ہے۔ تاریخ کے اوراق محض حقائق ہی کا ذخیرہ نہیں ہوتے بلکہ ان میں صحیح و سقیم، ثابت و غیر ثابت، حقیقت و افسانہ اور دیانتِ نقل و خیانتِ روایت سب کچھ ایک ساتھ جمع ہو جاتا ہے۔ یہی وجہ ہے کہ امتِ مسلمہ کے محدثین نے تاریخ کو کبھی بھی محض قصہ گوئی، حکایت سرائی اور واقعات کے انبار کا نام نہیں سمجھا بلکہ اس کے لیے تحقیق، تنقید، جرح و تعدیل اور نقدِ اسناد کے وہ اصول وضع کیے جن کی مثال دنیا کی کسی دوسری تہذیب میں نہیں ملتی۔ چنانچہ جہاں اکثر مؤرخین کا مقصد یہ تھا کہ جو کچھ انہیں پہنچا وہ اسے نقل کر دیں، خواہ وہ صحیح ہو یا غلط، وہاں محدثین کا منہج یہ تھا کہ ہر خبر کے ناقل کو جانچا جائے، ہر سند کا جائزہ لیا جائے، ہر راوی کے ضبط، عدالت اور ثقاہت کو پرکھا جائے اور پھر اس خبر کو قبول یا رد کیا جائے۔ یہی وجہ ہے کہ تاریخ کی بے شمار مشہور روایات ایسی ہیں جو صدیوں تک عوامی مجالس، مناظروں اور کتابوں میں دہرائی جاتی رہیں مگر جب انہیں محدثین کی عدالت میں پیش کیا گیا تو ان کا وجود ریت کی دیوار کی طرح بکھر گیا۔ بعض روایات منقطع نکلیں، بعض کے راوی مجہول ثابت ہوئے، بعض متروک و متہم بالکذب راویوں کے سہارے قائم تھیں، بعض سبائی اور رافضی رجحانات کے حامل قصہ گو افراد کی گھڑی ہوئی داستانیں ثابت ہوئیں اور بعض ایسی تھیں جنہیں خود آئمہ حدیث نے موضوع اور باطل قرار دیا۔ مگر افسوس کہ بعد کے ادوار میں بہت سے لوگوں نے تاریخ کو حدیث پر مقدم کر دیا، یہاں تک کہ اگر صحیح سند سے ثابت شدہ حدیث ایک طرف ہو اور کسی مؤرخ کی بے سند حکایت دوسری طرف، تو ترجیح تاریخی قصے کو دی جانے لگی۔ حالانکہ اہلِ علم کا مسلمہ اور متفقہ اصول یہ ہے کہ تاریخ بذاتِ خود حجت نہیں بلکہ محتاجِ حجت ہے جبکہ حدیث اپنے اصولِ ثبوت کے ساتھ حجت ہے۔ تاریخ گواہ ہے مگر حدیث قاضی ہے، تاریخ دعویٰ ہے مگر حدیث دلیل ہے، تاریخ احتمال ہے مگر حدیث تحقیق ہے۔ لہٰذا جب تاریخ اور حدیث میں بظاہر تعارض پیدا ہو تو فیصلہ میزانِ حدیث کرے گی نہ کہ بے سند تاریخی روایت۔ یہی وہ اصول ہے جسے ترک کر دینے کے نتیجے میں امت کے ایک طبقے نے افسانوں کو حقائق اور داستانوں کو تاریخ سمجھ لیا۔ خصوصاً امیر المؤمنین سیدنا معاویہ رضی اللہ عنہ کے بارے میں سب سے زیادہ ظلم اسی باب میں ہوا۔ ان کے فضائل و مناقب کو پسِ پشت ڈال دیا گیا، صحیح اور حسن روایات سے صرفِ نظر کیا گیا اور ان کے مقابلے میں ایسی تاریخی حکایات کو بنیاد بنایا گیا جن کی نہ کوئی معتبر سند تھی، نہ علمی بنیاد اور نہ ہی محدثین کی تصدیق۔ بعض روایتیں ایسی ہیں جن کی بنیاد سیف بن عمر جیسے متروک راویوں پر قائم ہے، بعض ابو مخنف لوط بن یحییٰ جیسے رافضی اخباریوں سے منقول ہیں اور بعض بعد کے مؤرخین نے بلا تحقیق ایک دوسرے سے نقل کر دی ہیں، یہاں تک کہ تکرار نے کمزور روایت کو عوام کی نظر میں حقیقت کا درجہ دے دیا۔ یہی وہ مقام ہے جہاں ایک منصف محقق اور ایک روایت پرست قصہ گو کے درمیان فرق نمایاں ہوتا ہے۔ روایت پرست شخص ہر لکھی ہوئی بات کو تاریخ سمجھ لیتا ہے جبکہ محقق ہر روایت سے پہلے اس کی سند، اس کے راویوں، اس کے متن اور اس کے تاریخی و شرعی قرائن کا جائزہ لیتا ہے۔ اسی لیے اس کتاب میں بھی کوشش کی گئی ہے کہ امیر المؤمنین سیدنا معاویہ رضی اللہ عنہ سے متعلق ہر الزام، ہر اعتراض اور ہر تاریخی دعوے کو پہلے میزانِ حدیث پر پیش کیا جائے، پھر محدثین کے اصولوں کی روشنی میں اس کی حیثیت متعین کی جائے اور اس کے بعد ہی کوئی نتیجہ اخذ کیا جائے۔ کیونکہ تاریخ اگر سند سے محروم ہو تو محض افسانہ رہ جاتی ہے جبکہ حدیث اگر صحیح سند سے ثابت ہو جائے تو وہی حق و باطل کے درمیان فیصلہ کن میزان بن جاتی ہے۔ لہٰذا اس کتاب کے مطالعہ کے دوران قاری سے بھی یہی توقع ہے کہ وہ مشہورات کے بجائے دلائل، جذبات کے بجائے تحقیق، تعصب کے بجائے انصاف اور افسانۂ تاریخ کے بجائے میزانِ حدیث کو اپنا رہنما بنائے۔ کیونکہ حقیقت تک رسائی کا راستہ یہی ہے اور امیر المؤمنین سیدنا معاویہ رضی اللہ عنہ سمیت تمام صحابۂ کرام رضی اللہ عنہم کے بارے میں منصفانہ رائے قائم کرنے کا واحد معتبر منہج بھی یہی ہے۔

❁ میزانِ جرح و تعدیل اور راقم کا طریقِ تحقیق؛-

زیرِ نظر کتاب کی تالیف میں راقم نے کسی جذباتی وابستگی، فرقہ وارانہ تعصب یا محض مناظرانہ جوش کو بنیاد نہیں بنایا بلکہ حتی المقدور اس منہجِ تحقیق کو اختیار کرنے کی کوشش کی ہے جسے آئمۂ حدیث، بالخصوص متقدمین محدثین رحمہم اللہ نے روایت، جرح و تعدیل اور تاریخی واقعات کی جانچ کے باب میں اختیار فرمایا۔ چنانچہ اس کتاب کا بنیادی اصول یہ ہے کہ امیر المؤمنین سیدنا معاویہ رضی اللہ عنہ کی ذاتِ گرامی کے متعلق جو بھی الزام، اعتراض، تنقیص یا منفی دعویٰ منقول ہے، اسے محض تاریخی شہرت یا کثرتِ نقل کی بنیاد پر قبول نہیں کیا جائے گا بلکہ اسے اسی کسوٹی پر پرکھا جائے گا جس پر محدثینِ کرام رحمہم اللہ نے روایات کو پرکھا ہے۔ کیونکہ اہلِ علم کے نزدیک کسی واقعہ کا مشہور ہونا اس کے صحیح ہونے کی دلیل نہیں بلکہ اس کی صحت کا مدار سند، روایت، راویوں کے احوال اور اصولِ نقد پر ہے۔ مزید برآں راقم نے حتی الامکان متاخرین کے اجتہادات پر اکتفا کرنے کے بجائے متقدمین محدثین رحمہم اللہ کے فیصلوں، تصریحات اور اصولوں کو ترجیح دی ہے، کیونکہ روایت کے اصل محافظ، رجال کے حقیقی ناقد اور اسانید کے سب سے بڑے ماہر وہی حضرات تھے جن کا زمانہ مصادرِ اولیہ سے قریب تر تھا۔ بلکہ جہاں اختلافِ اقوال پایا گیا وہاں راقم نے ان آئمہ رحمہم اللہ کے اقوال کو زیادہ اہمیت دی ہے جو جرح و تعدیل میں تشدد، احتیاط اور سختی کے لیے معروف ہیں، جیسے امام یحییٰ بن معین رحمہ اللہ، امام ابو حاتم الرازی رحمہ اللہ، امام ابو زرعہ الرازی رحمہ اللہ، امام بخاری رحمہ اللہ، امام نسائی رحمہ اللہ، امام دار قطنی رحمہ اللہ اور ان کے ہم مسلک دیگر ناقدینِ حدیث رحمہم اللہ۔ اس کی وجہ یہ ہے کہ جب ایک متشدد ناقد بھی کسی راوی یا روایت کو قبول کر لے تو اس کی قبولیت مزید مضبوط ہو جاتی ہے جبکہ اگر وہ کسی روایت پر اعتراض کرے تو اس اعتراض کو بھی سنجیدگی سے لیا جاتا ہے۔ اسی اصول کی روشنی میں راقم نے امیر المؤمنین سیدنا معاویہ رضی اللہ عنہ سے متعلق تمام معروف اعتراضات کا جائزہ لیا ہے۔ چنانچہ کسی الزام کو محض اس وجہ سے قبول نہیں کیا گیا کہ وہ کسی تاریخی کتاب میں مذکور ہے، بلکہ یہ دیکھا گیا کہ آیا اس کی سند کیا ہے؟ اس کے راوی کون ہیں؟ محدثین رحمہم اللہ نے ان کے بارے میں کیا فیصلہ دیا ہے؟ روایت شاذ تو نہیں؟ منکر تو نہیں؟ منقطع تو نہیں؟ اور کیا وہ قرآن و سنت اور دیگر صحیح روایات کے موافق ہے یا نہیں؟ کیونکہ انصاف کا تقاضا یہی ہے کہ کسی بھی مسلمان، خصوصاً ایک جلیل القدر صحابیِ رسول صلی اللہ علیہ وسلم کے بارے میں فیصلہ کرتے وقت وہی معیار اختیار کیا جائے جو شریعت اور علمِ حدیث نے مقرر کیا ہے۔ دنیا کی تمام مہذب عدالتوں میں یہ اصول مسلم ہے کہ شک کا فائدہ ملزم کو دیا جاتا ہے۔ جب کسی شخص کے جرم میں یقینی ثبوت موجود نہ ہو تو محض شبہات، احتمالات اور غیر قطعی قرائن کی بنیاد پر اسے مجرم قرار نہیں دیا جاتا اور یہی اصول شریعتِ اسلامیہ میں بدرجۂ اولیٰ موجود ہے۔ چنانچہ اگر ایک عام مسلمان کے بارے میں یہ اصول نافذ ہوتا ہے تو ایک ایسے صحابیِ رسول صلی اللہ علیہ وسلم کے بارے میں کیوں نافذ نہ ہو جو کاتبِ وحی، خال المؤمنین اور صحابیِ رسول صلی اللہ علیہ وسلم ہوں؟ لہٰذا جہاں کسی روایت کی صحت مشتبہ تھی، جہاں سند میں ضعف تھا، جہاں محدثین رحمہم اللہ نے نکارت کی نشاندہی کی تھی یا جہاں واقعات مختلف احتمالات کے متحمل تھے، وہاں راقم نے عدل و انصاف کے اسی اصول کو اختیار کیا ہے جس کے مطابق قطعی ثبوت کے بغیر الزام کو قبول نہیں کیا جا سکتا۔ اسی بنا پر اس کتاب میں امیر المؤمنین سیدنا معاویہ رضی اللہ عنہ کے بارے میں وارد روایات اور تاریخی حکایات کو محض جذباتی وابستگی کی بنیاد پر رد یا قبول نہیں کیا گیا بلکہ متقدمین محدثین کے اصولِ نقد کے مطابق ان کا تجزیہ کیا گیا ہے۔ اگر کسی روایت کی صحت ثابت ہوئی تو اسے قبول کیا گیا اور اگر وہ روایت متشدد محدثین کے معیار پر پوری نہ اتر سکی تو اسے حجت تسلیم نہیں کیا گیا خواہ وہ کتنی ہی مشہور کیوں نہ ہو۔ یہی وہ منہج ہے جو آئمہ جرح و تعدیل، ناقدینِ آثار اور محدثینِ امت کا منہج رہا ہے اور یہی وہ راستہ ہے جسے راقم نے اس پوری تصنیف میں اختیار کرنے کی کوشش کی ہے۔ اسی طرح راقم کا یہ بھی منہج رہا ہے کہ محض روایت کی سند ہی نہیں بلکہ اس کے متن کو بھی جانچا جائے۔ چنانچہ اگر کوئی روایت سنداً بظاہر قابلِ بحث نہ بھی ہو لیکن اس کا متن قرآنِ مجید، صحیح احادیث، معروف سیرتِ صحابہ رضی اللہ عنہم، اجماعی حقائق یا دیگر ثابت شدہ روایات سے متصادم ہو تو اس کے بارے میں آئمہ حدیث کے منہج کے مطابق توقف یا رد کا راستہ اختیار کیا گیا ہے۔ کیونکہ محدثین کے نزدیک صحتِ سند ہمیشہ صحتِ متن کو مستلزم نہیں ہوتی بلکہ بعض اوقات متن میں ایسی علت پائی جاتی ہے جو روایت کو ناقابلِ قبول بنا دیتی ہے۔ راقم نے یہ بھی کوشش کی ہے کہ واقعاتِ فتنہ، جنگِ صفین، شہادتِ سیدنا عثمان رضی اللہ عنہ اور دیگر اختلافی مسائل کو بعد کے فرقہ وارانہ لٹریچر کے بجائے اولین مصادر اور سلفِ امت کی تشریحات کی روشنی میں دیکھا جائے۔ کیونکہ تاریخ کا ایک بڑا حصہ سیاسی کشمکشوں، مذہبی تعصبات اور بعد کے ادوار کی فکری جنگوں سے متاثر ہو چکا ہے۔ چنانچہ بہت سی ایسی باتیں جو ابتدائی صدیوں میں معروف نہ تھیں، بعد میں مذہبی بیانیوں کا حصہ بنتی چلی گئیں۔ اس لیے راقم نے حتی الامکان اصل ماخذ، قدیم روایات اور متقدمین محدثین کی آراء کو بنیاد بنایا ہے۔ مزید برآں راقم اس اصول کا بھی قائل ہے کہ الزام ثابت کرنے کی ذمہ داری الزام لگانے والے پر ہوتی ہے، نہ کہ اس پر جس پر الزام لگایا گیا ہو۔ چنانچہ اگر امیر المؤمنین سیدنا معاویہ رضی اللہ عنہ پر کسی قسم کا دینی، اخلاقی یا سیاسی اعتراض وارد کیا جاتا ہے تو اس کے اثبات کے لیے ایسی دلیل درکار ہے جو سند، متن اور دلالت تینوں اعتبار سے مضبوط ہو۔ محض قصہ گوئی، مرسل حکایات، منقطع روایات، مجہول راویوں کی باتیں یا متہم بالکذب افراد کے نقل کردہ واقعات کسی صحابیِ رسول صلی اللہ علیہ وسلم کے خلاف حجت نہیں بن سکتے۔ یہی اصول محدثین نے اختیار کیا اور یہی اصول راقم نے اس کتاب میں اختیار کرنے کی کوشش کی ہے۔ اسی بنا پر اس کتاب میں متعدد ایسے اعتراضات کا جائزہ لیا گیا ہے جو صدیوں سے دہرائے جا رہے ہیں لیکن جب انہیں میزانِ حدیث پر پرکھا جائے تو ان کی بنیاد یا تو ضعیف روایات پر کھڑی نظر آتی ہے، یا منقطع اسانید پر، یا ایسے رواۃ پر جنہیں خود آئمہ جرح و تعدیل ناقابلِ اعتماد قرار دے چکے ہیں۔ لہٰذا راقم نے ان اعتراضات کے جواب میں کوئی نیا اصول وضع نہیں کیا بلکہ وہی اصول استعمال کیا ہے جو امام بخاری رحمہ اللہ، امام مسلم رحمہ اللہ، امام یحییٰ بن معین رحمہ اللہ، امام ابو حاتم الرازی رحمہ اللہ، امام ابو زرعہ الرازی رحمہ اللہ، امام نسائی رحمہ اللہ، امام دار قطنی رحمہ اللہ اور دیگر آئمہ نقدِ حدیث کا منہج رہا ہے۔ مختصراً یہ کتاب محبتِ بے دلیل پر نہیں بلکہ دلیل کے ساتھ محبت پر، تعصب پر نہیں بلکہ انصاف پر، جذبات پر نہیں بلکہ تحقیق پر اور تاریخی افسانوں پر نہیں بلکہ متقدمین محدثین کی میزانِ نقد پر قائم ہے۔ اگر کسی مقام پر امیر المؤمنین سیدنا معاویہ رضی اللہ عنہ کے حق میں دفاع نظر آتا ہے تو وہ کسی شخصی وابستگی کا نتیجہ نہیں بلکہ انہی اصولوں کا منطقی حاصل ہے جو محدثینِ امت رحمہم اللہ نے روایت، تاریخ اور رجال کے باب میں صدیوں پہلے متعین کر دیے تھے۔ یہی اس کتاب کا منہج ہے، یہی اس کی علمی روح ہے اور یہی اس کی سب سے بڑی خصوصیت ہے۔ اس کتاب میں راقم الحروف نے محض روایات کے اسانیدی جائزے پر اکتفا نہیں کیا بلکہ ایک ایسا منہج اختیار کیا ہے جو درایت و روایت، دونوں پہلوؤں کو یکجا کرتا ہے۔ چنانچہ ہر اعتراض، الزام یا تاریخی دعوے کے جواب میں سب سے پہلے اس موضوع سے متعلق صحیح، ثابت شدہ اور قابلِ اعتماد روایات، آثار اور تاریخی حقائق کو جمع کیا گیا تاکہ اصل تصویر قاری کے سامنے واضح ہو جائے اور وہ یہ جان سکے کہ جس شخصیت پر اعتراض وارد کیا جا رہا ہے اس کا حقیقی مقام، کردار اور سیرت کیا تھی۔ اسی مقصد کے تحت ہر باب اور ہر اعتراض سے قبل ایک مختصر مگر جامع تمہیدی مقدمہ تحریر کیا گیا ہے جس میں امیر المؤمنین سیدنا معاویہ رضی اللہ عنہ کی سیرت، ان کے اوصافِ حمیدہ، ان کے کردار، ان کے علمی مقام اور صحیح اسانید سے ثابت شدہ فضائل کو ذکر کیا گیا ہے تاکہ بحث کا آغاز تاریخی افسانوں سے نہیں بلکہ مسلماتِ شرعیہ اور ثابت شدہ حقائق سے ہو۔ اس کے بعد متعلقہ روایت یا الزام کو پوری دیانتِ علمی کے ساتھ نقل کیا گیا ہے اور صرف ایک ماخذ پر اکتفا کرنے کے بجائے حتیٰ الامکان ان تمام کتب و مصادر کا ذکر کیا گیا ہے جن میں وہ روایت مروی ہے تاکہ قاری کے سامنے ماخذ و مصادر کی مکمل تصویر موجود رہے۔ پھر روایت کے ذکر کے بعد اس پر ایک ابتدائی اور مختصر حکم درج کیا گیا ہے تاکہ ابتدا ہی میں یہ واضح ہو جائے کہ روایت صحیح، حسن، ضعیف، منقطع، منکر یا موضوع ہونے کے اعتبار سے کس درجے میں آتی ہے۔ اس کے بعد راقم نے ہر علت کا الگ الگ، مفصل اور تحقیقی جائزہ پیش کیا ہے۔ راویوں کے احوال، ان پر آئمۂ جرح و تعدیل کے اقوال، سند کے اتصال و انقطاع، متن کے نکارات، شذوذ، اضطراب اور دیگر تمام اصولی مباحث کو تفصیل سے بیان کیا ہے تاکہ قاری محض نتیجہ نہ پڑھے بلکہ نتیجے تک پہنچنے کا پورا علمی سفر بھی اس کے سامنے ہو۔ مزید برآں راقم نے اس بات کا بھی اہتمام کیا ہے کہ کسی روایت کا رد صرف سندی کمزوری کی بنیاد پر نہ کیا جائے بلکہ درایت کے میزان پر بھی اسے پرکھا جائے۔ چنانچہ متعدد مقامات پر صحیح اور ثابت شدہ روایات، آثارِ صحابہ رضی اللہ عنہم، اقوالِ تابعین اور تصریحاتِ آئمہ محدثین کو پیش کر کے یہ واضح کیا گیا ہے کہ متعلقہ الزام نہ صرف روایتاً کمزور ہے بلکہ درایتاً بھی ناقابلِ قبول ہے۔ کیونکہ جب کسی شخصیت کا عمومی کردار، اس کی سیرت، اس کے فضائل، اس کے معاصرین کی شہادتیں اور اس کے بارے میں صحیح روایات ایک سمت اشارہ کر رہی ہوں تو پھر اس کے برخلاف منقول منفرد، ضعیف یا مشتبہ روایات کو اصل معیار نہیں بنایا جا سکتا۔ اسی منہج کے تحت راقم نے پوری کوشش کی ہے کہ امیر المؤمنین سیدنا معاویہ رضی اللہ عنہ پر وارد ہونے والے ہر اعتراض کا صرف دفاعی جواب نہ دیا جائے بلکہ تحقیقی انداز میں یہ بھی ثابت کیا جائے کہ ان الزامات کی بنیادیں کہاں سے اٹھیں، کن رواۃ نے انہیں نقل کیا، کن تاریخی رجحانات نے انہیں فروغ دیا اور محدثین و ناقدینِ امت نے ان کے بارے میں کیا فیصلہ صادر فرمایا۔ چنانچہ متعدد مقامات پر یہ حقیقت روزِ روشن کی طرح واضح ہو جاتی ہے کہ امیر المؤمنین سیدنا معاویہ رضی اللہ عنہ کے خلاف مشہور ہونے والے بہت سے قصے یا تو ضعفِ سند کا شکار ہیں، یا سیاسی و فرقہ وارانہ ماحول کی پیداوار ہیں، یا پھر ان کے پیچھے وہی فکری اور تاریخی رجحانات کارفرما ہیں جن کی جڑیں ابتدائی سبائی افکار اور بعد کے متعصب بیانیوں میں پیوست نظر آتی ہیں۔ الغرض اس کتاب کا مقصود محض اعتراضات کا جواب دینا نہیں بلکہ امیر المؤمنین سیدنا معاویہ رضی اللہ عنہ کی شخصیت کو قرآن، سنت، آثارِ صحابہ رضی اللہ عنہم، اقوالِ تابعین اور اصولِ محدثین کی روشنی میں از سرِ نو پیش کرنا ہے۔ یہی وجہ ہے کہ راقم نے حتیٰ الامکان ہر وہ علمی، تاریخی، حدیثی اور عقلی پہلو جمع کرنے کی کوشش کی ہے جو اس باب میں قابلِ ذکر تھا، تاکہ قاری جب اس کتاب کا مطالعہ مکمل کرے تو وہ صرف یہ نہ جانے کہ فلاں اعتراض کا جواب کیا ہے بلکہ یہ بھی جان لے کہ اللہ تعالیٰ کا اپنے صحابہ کرام رضی اللہ عنہم کے بارے میں فیصلہ کیا ہے، رسول اللہ صلی اللہ علیہ وسلم کی تعلیمات کیا ہیں، سلف صالحین کا منہج کیا ہے اور آخر کیوں اہلِ سنت والجماعت کے نزدیک امیر المؤمنین سیدنا معاویہ رضی اللہ عنہ کے بارے میں حسنِ ظن، محبت، دعا اور توقیر ہی راجح، محفوظ اور منصفانہ موقف ہے۔

❁ سبائیت سے عصر حاضر تک؛-

حقیقت یہ ہے کہ تاریخِ اسلام میں سبائیت صرف ایک فرد یا ایک محدود جماعت کا نام نہیں بلکہ ایک ایسے فکری منہج کا عنوان بن گئی جس نے براہِ راست قرآن و سنت پر حملہ کرنے کے بجائے ان مقدس شخصیات کو نشانہ بنایا جن کے ذریعے قرآن و سنت امت تک پہنچے۔ یہی وجہ ہے کہ اس فکر کا اصل ہدف ہمیشہ صحابۂ کرام رضی اللہ عنہم رہے کیونکہ اگر ان کی عدالت، دیانت اور امانت کو مشکوک بنا دیا جائے تو دین کی پوری عمارت کو مشکوک بنانے کا راستہ ہموار ہو جاتا ہے۔ چنانچہ ابتدائی دور میں یہی فکر سیدنا عثمان رضی اللہ عنہ کی خلافت کے خلاف اضطراب پیدا کرنے، امت کے سیاسی اتحاد کو پارہ پارہ کرنے اور مسلمانوں کے درمیان فتنہ و انتشار پھیلانے کا ذریعہ بنی۔ پھر ان کی مظلومانہ شہادت کے بعد انہی واقعات کو بنیاد بنا کر اکابر صحابۂ کرام رضی اللہ عنہم خصوصاً امیر المؤمنین سیدنا معاویہ رضی اللہ عنہ کے خلاف اعتراضات، شبہات اور الزامات کا ایک مستقل ذخیرہ مرتب کیا گیا۔ وقت گزرنے کے ساتھ یہ فتنہ محض سیاسی بغاوت تک محدود نہ رہا بلکہ اس نے علمی اور تاریخی لبادہ بھی اوڑھ لیا۔ چنانچہ بعض اخباریوں، قصہ گو مؤرخین اور متعصب راویوں نے ایسی بے شمار حکایات نقل کرنا شروع کر دیں جن کی نہ کوئی صحیح سند تھی اور نہ ہی وہ محدثین کے معیارِ نقد پر پوری اترتی تھیں۔ پھر انہی روایات کو نسل در نسل نقل کیا جاتا رہا یہاں تک کہ کثرتِ تکرار نے بعض بے اصل قصوں کو تاریخی حقیقت کا درجہ دے دیا۔ حالانکہ اہلِ علم جانتے ہیں کہ کسی روایت کا مشہور ہو جانا اس کے صحیح ہونے کی دلیل نہیں بلکہ صحت کا مدار ہمیشہ سند، روایت اور درایت کے اصولوں پر ہی ہوتا ہے۔ یہی وجہ ہے کہ جب امیر المؤمنین سیدنا معاویہ رضی اللہ عنہ کے متعلق پھیلائے گئے اعتراضات کا جائزہ لیا جاتا ہے تو ان میں سے ایک بڑی تعداد انہی روایات پر قائم نظر آتی ہے جن کے مصادر یا تو متہم راوی ہیں، یا ضعیف ناقلین، یا ایسے افراد جن کی ثقاہت خود اہلِ فن کے نزدیک محلِ نظر رہی ہے۔ بعد کے ادوار میں یہی فکر مختلف فرقوں، جماعتوں اور نظریاتی تحریکوں کے ذریعے آگے منتقل ہوتی رہی، حتیٰ کہ عصرِ حاضر میں بھی اس نے اپنا قدیم مذہبی لباس بدل کر ”جدید تحقیق“ ”تنقیدی مطالعۂ تاریخ“ ”غیر جانبدار تجزیہ“ اور ”آزاد فکر“ جیسے خوشنما عنوانات اختیار کر لیے، مگر اعتراضات کا مرکز آج بھی وہی شخصیات ہیں جنہیں قرآنِ مجید نے ”رَضِيَ اللَّهُ عَنْهُمْ وَرَضُوا عَنْهُ“ کے شرف سے نوازا اور جن کے ذریعے دینِ اسلام نسل در نسل امت تک منتقل ہوا۔ نام بدل گئے، اسالیب تبدیل ہو گئے، اصطلاحات نئی ہو گئیں، لیکن تیر آج بھی انہی مقدس ہستیوں کی طرف پھینکے جاتے ہیں جن میں امیر المؤمنین سیدنا معاویہ رضی اللہ عنہ بطورِ خاص ہدف تنقید بنائے جاتے ہیں۔ اسی لیے اس کتاب میں صرف روایات کی اسنادی تحقیق ہی مقصود نہیں بلکہ اس فکری تسلسل کی نشاندہی بھی مقصود ہے جو سبائیت کے ابتدائی فتنہ سے شروع ہو کر عصرِ حاضر کے جدید شبہات تک پھیلا ہوا ہے، تاکہ قاری یہ سمجھ سکے کہ بہت سے اعتراضات بظاہر مختلف دکھائی دیتے ہیں مگر ان کی فکری جڑیں ایک ہی درخت سے پھوٹی ہوئی ہیں، اور وہ درخت وہی ہے جس کی آبیاری صدیوں پہلے صحابہ کرام رضی اللہ عنہم کے خلاف بغض، تعصب اور سوء ظن کے پانی سے کی گئی تھی۔ یہی وجہ ہے کہ زیرِ نظر کتاب میں کوشش کی گئی ہے کہ سبائیت کے ابتدائی فتنہ سے لے کر عصرِ حاضر کے فکری حملوں تک پھیلے ہوئے ان تمام شبہات کا جائزہ محدثین کے اصولوں، سلفِ امت کے فہم اور علمی تحقیق کے معیار پر لیا جائے تاکہ قاری افسانہ تاریخ اور حقیقتِ تاریخ کے درمیان فرق کر سکے اور امیر المؤمنین سیدنا معاویہ رضی اللہ عنہ کی شخصیت کو افواہوں، جذبات اور تاریخی پروپیگنڈے کے بجائے صحیح دلائل، ثابت حقائق اور منصفانہ تحقیق کی روشنی میں سمجھ سکے۔

❁ مقامِ صحابیت، فضائل و مناقب کی معراج؛-

جب صحابہ کرام رضی اللہ عنہم کے فضائل و مناقب کا تذکرہ آتا ہے تو حقیقت یہ ہے کہ تمام انفرادی فضیلتیں، تمام شخصی کمالات اور تمام امتیازی اوصاف ایک طرف رہ جاتے ہیں اور شرفِ صحابیت تنہا ایسی عظیم نعمت بن کر سامنے آتا ہے جس کے بعد کسی مزید فضیلت کی حاجت باقی نہیں رہتی۔ کیونکہ صحابی وہ خوش نصیب انسان ہے جسے نہ صرف دیدارِ مصطفی صلی اللہ علیہ وسلم کی سعادت نصیب ہوئی بلکہ اس نے براہِ راست آفتابِ نبوت کی کرنوں سے فیض پایا، وحی کے نزول کا مشاہدہ کیا، زبانِ رسالت صلی اللہ علیہ وسلم سے قرآن و سنت کو سنا اور اپنی زندگی کو بارگاہِ نبوت صلی اللہ علیہ وسلم کے سانچے میں ڈھال لیا۔ یہی وجہ ہے کہ اہلِ سنت کا متفقہ عقیدہ ہے کہ کوئی ولی، کوئی امام، کوئی محدث، کوئی فقیہ اور کوئی مجدد مقامِ صحابیت کو نہیں پہنچ سکتا، خواہ وہ علم و عمل کے کتنے ہی بلند درجات پر فائز کیوں نہ ہو۔ چند لمحوں کی صحبتِ نبوی صلی اللہ علیہ وسلم وہ دولت ہے جس کے مقابلے میں بعد والوں کی عمر بھر کی عبادتیں بھی نہیں ٹھہرتیں۔ چنانچہ اگر کسی صحابی کے لیے کوئی انفرادی منقبت ثابت نہ بھی ہو تب بھی اس کا صحابیِ رسول صلی اللہ علیہ وسلم ہونا ہی اس کی عظمت، فضیلت، عدالت اور جنتی ہونے کے لیے کافی ہے۔ یاد رہے کہ شرفِ صحابیت وہ تاجِ کرامت ہے جس کے سامنے تمام فضیلتیں سرِ نیاز خم کر دیتی ہیں اور جس کے بعد فضیلت کا کوئی اور زینہ باقی نہیں رہتا۔

❁ محبت صحابہ واہلبیت منہج سلف صالحین؛-

اہل بیت رضی اللہ عنہم اور صحابہ کرام رضی اللہ عنہم کا تذکرہ در حقیقت دو ایسے مبارک عنوانات کا تذکرہ ہے جنہیں بعض متعصب اذہان نے تاریخ کے مختلف ادوار میں ایک دوسرے کے مقابل لا کھڑا کرنے کی ناکام کوشش کی۔ حالانکہ حقیقت یہ ہے کہ یہ دونوں جماعتیں ایک ہی سرچشمہ نبوت صلی اللہ علیہ وسلم سے وابستہ، ایک ہی قافلہ ہدایت کی رفیق اور ایک ہی دینِ متین کی امین تھیں۔ اہلِ بیت کو نسبتِ رسول صلی اللہ علیہ وسلم کا شرف حاصل تھا اور صحابہ کرام رضی اللہ عنہم کو صحبتِ رسول صلی اللہ علیہ وسلم کی سعادت نصیب ہوئی، اس لیے اہلِ سنت کے نزدیک ان دونوں سے محبت ایمان کا حصہ اور ان دونوں کا احترام دین کا تقاضا ہے۔ یہی وجہ ہے کہ تاریخ کے اوراق گواہ ہیں کہ اہلِ بیت اور صحابہ کرام رضی اللہ عنہم کے درمیان تعلقات محبت، اخوت، خیر خواہی اور باہمی احترام پر قائم تھے۔ چنانچہ سیدنا علی رضی اللہ عنہ، سیدنا حسن رضی اللہ عنہ اور سیدنا حسین رضی اللہ عنہ سمیت اہلِ بیت کے اکابر نے صحابہ کرام رضی اللہ عنہم کے فضائل کا اعتراف کیا جبکہ صحابہ کرام رضی اللہ عنہم نے اہلِ بیت کی تعظیم و توقیر کو اپنے ایمان کا جزو سمجھا۔ اسی تناظر میں امیر المؤمنین سیدنا معاویہ رضی اللہ عنہ کی شخصیت کو بھی دیکھا جانا چاہیے کیونکہ وہ ایک طرف جلیل القدر صحابیِ رسول صلی اللہ علیہ وسلم ہیں اور دوسری طرف اہلِ بیت کے ساتھ ان کا تعلق محض سیاسی یا تاریخی واقعات تک محدود نہیں بلکہ احترام، محبت اور قرابتِ اسلامی پر مبنی تھا۔ بعد کے ادوار میں بعض فرقہ وارانہ رجحانات نے سیدنا معاویہ رضی اللہ عنہ اور اہلِ بیت کے تعلق کو باہمی عداوت کا رنگ دینے کی کوشش ضرور کی ہے مگر معتبر تاریخی و حدیثی مصادر اس تصور کی تائید نہیں کرتے۔ چنانچہ اس کتاب کا منہج بھی یہی ہے کہ اہلِ بیت اور صحابہ کرام رضی اللہ عنہم کو ایک دوسرے کے مقابل نہیں بلکہ ایک دوسرے کے معاون، مؤید اور امتِ محمدیہ صلی اللہ علیہ وسلم کے مشترکہ سرمایۂ افتخار کے طور پر دیکھا جائے اور بالخصوص سیدنا معاویہ رضی اللہ عنہ کی شخصیت کا مطالعہ بھی انہی اصولوں کی روشنی میں کیا جائے جو محبتِ صحابہ رضی اللہ عنہم، تعظیمِ اہلِ بیت اور انصافِ علمی پر قائم ہیں۔

❁ آفتابِ شام پر غبارِ الزام؛-

تاریخ اسلام کی وسیع فضاؤں میں بعض شخصیات ایسی ہیں جو اپنی خدمات، حسنِ تدبیر، وسعتِ کردار اور اثر آفرینی کے اعتبار سے آفتاب کی مانند روشن اور نمایاں نظر آتی ہیں، مگر ساتھ ہی وہ تعصبات، افسانوں اور الزامات کی گرد کا بھی سب سے زیادہ نشانہ بنتی ہیں۔ امیر المؤمنین سیدنا معاویہ رضی اللہ عنہ انہی جلیل القدر شخصیات میں سے ایک ہیں جن کی زندگی کا ہر گوشہ اسلام کی سربلندی، امت کی وحدت، سرحدوں کے استحکام، فتوحات کے تسلسل اور نظامِ حکومت کی مضبوطی سے عبارت ہے، مگر اس کے باوجود تاریخ کے بعض صفحات پر ان کی ذات کو ایسے انداز میں پیش کیا گیا کہ ان کے فضائل پس منظر میں چلے گئے اور اعتراضات کو اصل موضوع بنا دیا گیا۔ حالانکہ انصاف کا تقاضا یہ تھا کہ کسی شخصیت کا تعارف اس کی مجموعی خدمات، ثابت شدہ فضائل اور مسلمہ محاسن کی روشنی میں کیا جاتا، نہ کہ اختلافی واقعات یا غیر ثابت روایات کی بنیاد پر۔ یہ بھی ایک عجیب تاریخی حقیقت ہے کہ جن ہستیوں نے اسلام کے لیے جتنی بڑی خدمات انجام دیں، وہی اتنی ہی زیادہ مخالفتوں کا نشانہ بھی بنیں۔ چنانچہ امیر المؤمنین سیدنا معاویہ رضی اللہ عنہ کی ذات کے گرد بھی صدیوں کے دوران ایسے بہت سے قصے، حکایات اور الزامات جمع کر دیے گئے جن میں سے اکثر یا تو ضعیف روایات پر مبنی تھے، یا سیاسی تعصبات کی پیداوار تھے، یا پھر بعد کے ادوار کی فکری کشمکش کا نتیجہ تھے۔ یہاں تک کہ بعض لوگوں نے ان کی پوری شخصیت کو چند مخصوص واقعات کے آئینے میں دیکھنا شروع کر دیا۔ جبکہ ان کی صحبتِ نبوی صلی اللہ علیہ وسلم، کتابتِ وحی، فقاہت، حلم، عدل، سیاست، قیادت اور خدماتِ اسلامیہ کو نظر انداز کر دیا گیا۔ حقیقت یہ ہے کہ آفتاب پر گرد ڈالنے کی کوشش تو کی جا سکتی ہے مگر اس کی روشنی کو بجھایا نہیں جا سکتا۔ اسی طرح امیر المؤمنین سیدنا معاویہ رضی اللہ عنہ کی ذات بھی ان الزامات اور اعتراضات کے باوجود اپنے فضائل، مناقب اور تاریخی خدمات کے اعتبار سے امت کی تاریخ میں ایک روشن مقام رکھتی ہے۔ چنانچہ ضروری ہے کہ ان کے بارے میں رائج تصورات کو محض سنی سنائی باتوں، فرقہ وارانہ روایات یا تاریخی افسانوں کی بنیاد پر قبول نہ کیا جائے بلکہ قرآن، سنت، آثارِ صحابہ رضی اللہ عنہم، اقوالِ تابعین اور تصریحاتِ آئمہ محدثین کی روشنی میں ان کی شخصیت کا ازسرِ نو مطالعہ کیا جائے۔ یہی علمی دیانت کا تقاضا، یہی انصاف کا راستہ اور یہی اس کتاب کے مرتب کرنے کا بنیادی محرک ہے۔

❁ تاریخ کی عدالت اور امیر شام؛-

تاریخ جب اپنے اوراق کھولتی ہے تو وہ محض واقعات کا مجموعہ نہیں ہوتی بلکہ وہ کرداروں، خدمات، قربانیوں اور نتائج کا بھی محاسبہ کرتی ہے۔ اسی لیے کسی شخصیت کے بارے میں صحیح فیصلہ اُس وقت ممکن ہوتا ہے جب اسے تعصب کی عینک سے نہیں بلکہ انصاف کی میزان پر پرکھا جائے۔ امیر المؤمنین سیدنا معاویہ رضی اللہ عنہ بھی ان عظیم شخصیات میں سے ہیں جنہیں صدیوں سے تاریخ کی عدالت میں پیش کیا جاتا رہا ہے۔ کبھی انہیں ایک سیاست دان کی حیثیت سے دیکھا گیا، کبھی ایک حکمران کے طور پر، کبھی ایک فریقِ اختلاف کے طور پر اور کبھی اعتراضات کے محور کے طور پر، مگر افسوس کہ بہت کم لوگوں نے انہیں ایک صحابیِ رسول صلی اللہ علیہ وسلم، کاتبِ وحی، خال المؤمنین، فقیہِ صحابہ اور امت کے مصلح کی حیثیت سے جاننے کی کوشش کی۔ حالانکہ انصاف کا تقاضا یہ ہے کہ کسی شخصیت کا فیصلہ اس کے مکمل کردار، مجموعی خدمات اور ثابت شدہ فضائل کی بنیاد پر کیا جائے، نہ کہ چند اختلافی واقعات یا یک طرفہ روایات کی روشنی میں۔ اگر تاریخ کی عدالت میں امیر شام سیدنا معاویہ رضی اللہ عنہ کے کارناموں کو پیش کیا جائے تو وہ شام کی مضبوط ولایت، اسلامی سرحدوں کے استحکام، بحری بیڑے کے قیام، رومی طاقت کے مقابلے میں مسلسل فتوحات، امت کے انتشار کے خاتمے اور اسلامی ریاست کے استحکام کی صورت میں نمایاں نظر آتے ہیں۔ اگر ان کے فضائل کو دیکھا جائے تو وہ صحبتِ نبوی صلی اللہ علیہ وسلم، کتابتِ وحی، دعائے رسول صلی اللہ علیہ وسلم، فقاہت، حلم اور حسنِ تدبیر کی شکل میں جلوہ گر ہوتے ہیں۔ اور اگر ان کے مخالفین کے اعتراضات کو بھی سنا جائے تو انصاف کا تقاضا یہی ہے کہ انہیں قرآن، سنت اور اصولِ محدثین کی کسوٹی پر پرکھا جائے، نہ کہ محض جذبات، افسانوں یا سیاسی وابستگیوں کی بنیاد پر قبول کر لیا جائے۔ چنانچہ جب تاریخ کی عدالت میں گواہ کے طور پر قرآن کی آیات، احادیثِ نبویہ صلی اللہ علیہ وسلم، آثارِ صحابہ رضی اللہ عنہم، اقوالِ تابعین رحمہم اللہ اور تصریحاتِ آئمہ سلف پیش کی جاتی ہیں تو ایک ایسی شخصیت سامنے آتی ہے جسے محض ایک حکمران یا سیاسی قائد کے طور پر نہیں بلکہ امتِ مسلمہ کے ایک جلیل القدر صحابی اور عظیم خادمِ اسلام کے طور پر دیکھا جاتا ہے۔ یہی وجہ ہے کہ اس کتاب کا مقصد بھی کسی جذباتی دفاع یا غیر متوازن مدح سرائی کے بجائے تاریخ کی اسی عدالت میں امیر شام سیدنا معاویہ رضی اللہ عنہ کی شخصیت کو اصل مصادر اور معتبر شواہد کی روشنی میں پیش کرنا ہے، تاکہ فیصلہ تعصب نہیں بلکہ تحقیق کرے اور آوازِ الزام نہیں بلکہ صدائے انصاف سنی جائے۔

❁ اختتامیہ؛-

آخر میں راقم یہ دعویٰ ہرگز نہیں کرتا کہ اس نے اس موضوع کے تمام پہلوؤں کا احاطہ کر لیا ہے یا امیر المؤمنین سیدنا معاویہ رضی اللہ عنہ کے دفاع میں کہی جانے والی ہر بات کو جمع کر دیا ہے۔ کیونکہ علم کا سمندر انسانی استطاعت سے کہیں وسیع تر ہے اور ہر محقق اپنے ظرف و وسعت کے مطابق ہی اس میں سے حصہ حاصل کر سکتا ہے۔ تاہم پوری دیانتِ علمی، حتی المقدور وسعتِ مطالعہ اور اخلاصِ نیت کے ساتھ یہ کوشش ضرور کی گئی ہے کہ امیر المؤمنین سیدنا معاویہ رضی اللہ عنہ کے بارے میں پھیلائے گئے اعتراضات، شبہات اور تاریخی ابہامات کو متقدمین محدثین رحمہم اللہ کے اصولوں، آئمۂ نقد و جرح و تعدیل کی تصریحات، صحیح روایات، معتبر تاریخی شواہد اور منہجِ اہلِ سنت والجماعت کی روشنی میں پرکھا جائے اور حقائق کو حتی الامکان ان کے اصل مقام پر رکھا جائے۔ اگر اس کتاب کے صفحات میں کہیں کوئی درستی، تحقیق، انصاف اور حق گوئی نظر آئے تو وہ محض اللہ تعالیٰ کے فضل و کرم کا نتیجہ ہے۔ اسی طرح اگر کسی مقام پر لغزش، کوتاہی یا خطا واقع ہوئی ہو تو وہ راقم کی اپنی کم علمی، ضعفِ فہم اور بشری تقصیر کا نتیجہ ہے جس سے اللہ تعالیٰ کی بارگاہ میں معافی کا طلبگار ہوں۔ میری یہ کاوش کسی شخصیت پرستی، تعصب یا اندھی وابستگی کا مظہر نہیں بلکہ ایک ایسے صحابیِ رسول صلی اللہ علیہ وسلم کے بارے میں علمی امانت ادا کرنے کی ادنیٰ سی کوشش ہے جن کے متعلق اللہ تعالیٰ نے اپنی کتاب میں رَضِيَ اللَّهُ عَنْهُمْ وَرَضُوا عَنْهُ کا ابدی فیصلہ صادر فرمایا اور جن کے بارے میں اہلِ ایمان کا شعار ہمیشہ یہی رہا ہے کہ ان کے فضائل کو یاد رکھا جائے، ان کی بشری لغزشوں کے بارے میں سکوت اختیار کیا جائے اور ان کے لیے دعائے رحمت و مغفرت کی جائے۔ پس اگر اس کتاب کا مطالعہ کرنے والا قاری تعصب کے بجائے تحقیق، جذبات کے بجائے انصاف، روایتِ بازار کے بجائے میزانِ حدیث اور افسانۂ تاریخ کے بجائے منہجِ محدثین کو اختیار کرنے لگے اور اس کے دل میں امیر المؤمنین سیدنا معاویہ رضی اللہ عنہ سمیت تمام صحابہ کرام رضی اللہ عنہم کی محبت، توقیر اور حسنِ ظن میں اضافہ ہو جائے تو راقم اپنی اس طویل محنت کو کامیاب سمجھے گا۔ اللہ تعالیٰ سے دعا ہے کہ اس معمولی کاوش کو اپنی بارگاہ میں شرفِ قبولیت عطا فرمائے، اسے محبتِ صحابہ رضی اللہ عنہم و اہلِ بیت کے فروغ، دفاعِ حق اور احیاءِ منہجِ سلف کا ذریعہ بنائے اور بندۂ احقر و خاکسار، قارئین، معاونین اور جملہ اہلِ ایمان کے لیے ذخیرۂ آخرت قرار دے۔ بے شک وہی سننے والا، قبول فرمانے والا اور بندوں پر نہایت مہربان ہے۔

وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ