تفسیر السعدی (عبدالرحمٰن السعدی) — سورۃ النحل (16) — آیت 94

﴿ وَلَا تَتَّؔخِذُوْۤا اَیْمَانَكُمْ﴾ ”اور نہ ٹھہراؤ تم اپنی قسموں کو“ یعنی اپنے عہد اور میثاق کو ﴿ دَخَلًۢا بَیْنَكُمْ﴾ ”آپس میں دھوکے کا ذریعہ“ یعنی اپنی خواہشات نفس کا تابع نہ بناؤ کہ جب چاہو پورا کر دو اور جب چاہو توڑ دو۔ اگر تم ایسا کرو گے تو صراط مستقیم پر سے تمھارے قدم پھسل جائیں گے۔ ﴿ وَتَذُوْقُوا السُّوْٓءَ ﴾ ”اور چکھو گے تم سزا“ یعنی تم ایسے عذاب کا مزا چکھو گے جو بہت برا اور غمزدہ کر دینے والا عذاب ہو گا ﴿ بِمَا صَدَدْتُّمْ عَنْ سَبِیْلِ اللّٰهِ﴾ ”اس بات پر کہ تم نے اللہ کے راستے سے روکا“ کیونکہ تم خود بھی راہ راست سے بھٹکے اور دوسروں کو بھی بھٹکا دیا۔ ﴿ وَلَكُمْ عَذَابٌ عَظِیْمٌ﴾ ”اور تمھارے لیے عذاب ہے بڑا“ یعنی کئی گنا۔