ترجمہ و تفسیر — سورۃ الشعراء (26) — آیت 168

(آیت 168) {قَالَ اِنِّيْ لِعَمَلِكُمْ مِّنَ الْقَالِيْنَ: ” الْقَالِيْنَ “ ”اَلْقَالِيْ“} کی جمع ہے جو {”قَلٰي يَقْلِيْ“} سے اسم فاعل ہے، جس کا معنی شدید نفرت اور دشمنی بھی ہے اور گوشت بھوننا بھی۔ لوط علیہ السلام نے فرمایا کہ میں تمھیں منع کرنے سے کیسے باز آ سکتا ہوں، جب کہ میں تمھارے اس کام سے شدید دشمنی رکھنے والوں میں سے ہوں، اتنی شدید کہ اس سے میرا دل جلتا ہے۔

168-1یعنی میں اسے پسند نہیں کرتا اور اس سے سخت بیزار ہوں۔

اس آیت کی تفسیر اگلی آیات کیساتھ ملاحظہ کریں۔

جب لوط علیہ السلام نے دیکھا کہ وہ اپنی بدکاری پر جمے ہوئے ہیں تو کہنے لگے: ﴿ قَالَ اِنِّیْ لِعَمَلِكُمْ مِّنَ الْقَالِیْ٘نَ﴾ ”میں تمھاری اس بدکرداری پر تم پر سخت ناراض ہوں “ میں تمھیں اس سے منع کرتا ہوں اور اس برے کام کے انجام سے ڈراتا ہوں۔ حضرت لوط علیہ السلام نے دعا کی: ﴿ رَبِّ نَجِّنِیْ وَاَهْ٘لِیْ مِمَّا یَعْمَلُوْنَ ﴾ ”اے میرے رب! مجھ کو اور میرے گھر والوں کو ان کے کاموں سے نجات دے۔“ یعنی ان کے فعل بد اور اس کے عذاب سے بچا۔ اللہ تعالیٰ نے آپ کی دعا قبول فرما لی۔

﴿ فَنَجَّیْنٰهُ وَاَهْلَهٗۤ اَجْمَعِیْنَۙ ۰۰ اِلَّا عَجُوْزًا فِی الْغٰبِرِیْنَ ﴾ ”پس ہم نے ان کو اور ان کے سب گھر والوں کو نجات دی مگر ایک بڑھیا کہ پیچھے رہ گئی۔“ یعنی یہ عورت ان لوگوں میں رہ گئی جن پر اللہ تعالیٰ کا عذاب نازل ہوا اور یہ عورت لوط علیہ السلام کی بیوی تھی۔ ﴿ ثُمَّ دَمَّرْنَا الْاٰخَرِیْنَ ۰۰ وَاَمْطَرْنَا عَلَیْهِمْ مَّطَرًا ﴾ ”پھر ہم نے دوسروں کو ہلاک کر دیا اور ان پر بارش برسائی۔“ یعنی ہم نے ان پر کھنگر کے پتھر برسائے ﴿فَسَآءَ مَطَرُ الْمُنْذَرِیْنَ ﴾ ”پس جو بارش ان ڈرائے گئے لوگوں پر برسائی گئی، بہت بری تھی۔“ اللہ تعالیٰ نے ان کے آخری متنفس تک کو ہلاک کر دیا۔ ﴿ اِنَّ فِیْ ذٰلِكَ لَاٰیَةً١ؕ وَمَا كَانَ اَكْثَرُهُمْ مُّؤْمِنِیْنَ ۰۰ وَاِنَّ رَبَّكَ لَهُوَ الْ٘عَزِیْزُ الرَّحِیْمُ ﴾ ”بے شک اس میں ایک نشانی ہے مگر اکثر لوگ ایمان لانے والے نہیں۔ بے شک آپ کا رب بڑا زبردست ہے اور نہایت رحم والا بھی۔“