السنن المأثورة

سہل بن ابی خیثمہ رحمہ اللہ سے روایت ہے انہیں قوم کے بزرگوں نے خبر دی کہ سیدنا عبد اللہ بن سہل رضی اللہ عنہ اور سیدنا محیصہ رضی اللہ عنہ خیبر میں تنگ دستی کے باعث (کھجور لینے گئے) دونوں اپنی ضروریات کے لیے جدا ہوئے تو سیدنا محیصہ رضی اللہ عنہ کو خبر دی گئی کہ سیدنا عبد اللہ بن سہل رضی اللہ عنہ کو قتل کر کے گڑھے یا چشمہ پر پھینک دیا گیا ہے تو انہوں نے یہود سے کہا: واللہ تم نے انہیں قتل کیا ہے، یہود نے کہا اللہ کی قسم ہم نے قتل نہیں کیا تو محیصہ واپس آئے قوم کو خبر دی پھر وہ اور ان کے بڑے بھائی سیدنا حویصہ اور سیدنا عبدالرحمن بن سہل رضی اللہ عنہ مقتول کے بھائی رسول اللہ صلی اللہ علیہ وسلم کے پاس آئے تو محیصہ رضی اللہ عنہ بات کرنا چاہتے تھے کیونکہ خیبر میں وہی تھے لیکن رسول اللہ صلی اللہ علیہ وسلم نے محیصہ رضی اللہ عنہ سے کہا: ”بڑے کو بات کرنے دیں“ تو سیدنا حویصہ رضی اللہ عنہ نے بات کی پھر محیصہ رضی اللہ عنہ نے بات کی رسول اللہ صلی اللہ علیہ وسلم نے فرمایا: ”یہود یا دیت اداء کریں یا جنگ کے لیے تیار ہو جائیں“ اس نسبت رسول اللہ صلی اللہ علیہ وسلم نے یہود کو خط لکھا تو یہود نے جواب لکھا کہ اللہ کی قسم ہم نے قتل نہیں کیا تو رسول اللہ صلی اللہ علیہ وسلم نے سیدنا حویصہ رضی اللہ عنہ اور سیدنا محیصہ رضی اللہ عنہ اور سیدنا عبد الرحمن رضی اللہ عنہ سے کہا: ”کیا تم قسم کھا کر اپنا کیس ثابت کر سکتے ہو؟“ صحابہ رضی اللہ عنہم نے کہا نہیں ہم عینی شاہد نہ تھے پھر آپ صلی اللہ علیہ وسلم نے فرمایا: ”کیا آپ کی بجائے یہود پچاس قسمیں کھائیں اور بری ہو جائیں (کہ انہوں نے قتل نہیں کیا)؟“ صحابہ نے کہا: ”آپ صلی اللہ علیہ وسلم کیسے کفار کی قسم کو قبول کریں گے؟ (یعنی وہ کافر ہیں قسم کی حرمت کی پاسداری نہیں کریں گے)“ رسول اللہ صلی اللہ علیہ وسلم نے دیت اپنی طرف سے اداء کر دی۔ تو رسول اللہ صلی اللہ علیہ وسلم نے ان کی جانب سو اونٹنیاں بھیجیں حتی کہ ان کے گھر آ گئیں تو سہل رضی اللہ عنہ کہتے ہیں ان میں سے ایک سرخ اونٹنی نے مجھے لات ماری تھی۔

بشیر بن یسار رحمہ اللہ سے روایت ہے سیدنا عبد اللہ بن سہل انصاری رضی اللہ عنہ اور سیدنا محیصہ بن مسعود رضی اللہ عنہ دونوں خیبر گئے دونوں اپنی ضروریات کے لیے جدا ہوئے تو سیدنا عبد اللہ بن سہل رضی اللہ عنہ قتل کر دیے گئے، سیدنا محیصہ رضی اللہ عنہ واپس آئے تو وہ اور ان کا بھائی سیدنا حویصہ رضی اللہ عنہ اور مقتول کا بھائی سیدنا عبد الرحمن بن سہل رضی اللہ عنہ رسول صلی اللہ علیہ وسلم کے پاس آئے تو عبدالرحمن رضی اللہ عنہ نے بات کرنا چاہی تو رسول اللہ صلی اللہ علیہ وسلم نے فرمایا: ”بڑے کو بات کرنے دیں۔“ محیصہ رضی اللہ عنہ اور حویصہ رضی اللہ عنہ نے عبد اللہ بن سہل رضی اللہ عنہ کی بات کی تو آپ صلی اللہ علیہ وسلم نے فرمایا: ”تم پچاس قسمیں اٹھا کر خون کے حق دار بن سکتے ہو؟“ کہنے لگے اے اللہ کے رسول صلی اللہ علیہ وسلم ہم عینی شاہد نہیں، آپ صلی اللہ علیہ وسلم نے فرمایا: ”پھر یہود پچاس قسمیں اٹھا کر بری ہو جائیں گے۔“ کہنے لگے ہم کفار کی قسموں کو کیسے قبول کریں؟ مالک رحمہ اللہ کہتے ہیں یحییٰ رحمہ اللہ نے کہا: بشیر رحمہ اللہ کا خیال ہے رسول اللہ صلی اللہ علیہ وسلم نے اپنی (ریاست) کی طرف سے دیت ادا کر دی۔

سیدنا سہل بن ابی خیثمہ رضی اللہ عنہ سے روایت ہے سیدنا عبداللہ بن سہل رضی اللہ عنہ خیبر کے ایک گڑھے میں مقتول پائے گئے یا خیبر کے ایک کنویں میں، تو ان کے بھائی سیدنا عبدالرحمن بن سہل رضی اللہ عنہ اور سیدنا حویصہ رضی اللہ عنہ اور سیدنا محیصہ رضی اللہ عنہ رسول اللہ صلی اللہ علیہ وسلم کے پاس مقدمہ لے کر گئے عبدالرحمن بن سہل رضی اللہ عنہ نے گفتگو کرنا چاہی تو رسول اللہ ﷺ نے فرمایا: ”بڑے کو بات کرنے دیں۔“ تو سیدنا محیصہ رضی اللہ عنہ نے بات کی اور کہا: ”اے اللہ کے رسول صلی اللہ علیہ وسلم ! ہم نے عبداللہ بن سہل کو مقتول پایا اور یہود کافر اور دھوکے باز قوم ہے انہوں نے ہی قتل کیا ہے“ رسول اللہ صلی اللہ علیہ وسلم نے پوچھا: ”کیا تم پچاس قسمیں کھاؤ گے اور خون کے حقدار ٹھہرو گے؟“ تو وہ کہنے لگے ”اے اللہ کے رسول! ہم ایسے معاملے پر کیسے قسمیں کھائیں جو ہم نے مشاہدہ نہیں کیا آنکھوں سے دیکھا نہیں“ تو رسول اللہ صلی اللہ علیہ وسلم نے فرمایا: ”پھر یہود پچاس قسمیں کھا کر بری الذمہ ہو جائیں گے۔“ انہوں نے عرض کی ”ہم مشرک قوم کی قسموں پر کیسے یقین کریں۔“ رسول اللہ صلی اللہ علیہ وسلم نے اپنی طرف سے دیت اداء کی سہل رضی اللہ عنہ کہتے ہیں ان ہی اونٹوں میں سے ایک نے مجھے لات ماری تھی۔ امام شافعی رحمہ اللہ فرماتے ہیں سفیان رحمہ اللہ کبھی بیان کرتے ہوئے کہتے کہ مجھے نہیں معلوم قسم انصار سے شروع کی یا یہود سے، تو انہیں کہا گیا لوگوں کا کہنا ہے قسم کا آپشن پہلے انصار کو دیا گیا کہنے لگے ایسے ہی لگتا ہے اور بہت دفعہ بغیر شک کے بھی سفیان رحمہ اللہ روایت ہذا بیان کرتے تھے۔

سیدنا سہل بن ابی حثمہ رضی اللہ عنہ سے روایت ہے سیدنا عبد اللہ بن سہل رضی اللہ عنہ اور سیدنا محیصہ بن مسعود رضی اللہ عنہ خیبر گئے وہاں اپنی ضروریات کے لیے جدا ہوئے تو عبداللہ بن سہل رضی اللہ عنہ کو قتل کر دیا گیا عدالت رسول صلی اللہ علیہ وسلم میں وہ اور مقتول کے بھائی سیدنا عبدالرحمن رضی اللہ عنہ اور سیدنا حویصہ بن مسعود رضی اللہ عنہ گئے انہوں نے سیدنا عبداللہ بن سہل رضی اللہ عنہ کا کیس بیان کیا تو رسول اللہ صلی اللہ علیہ وسلم نے فرمایا: ”کیا تم پچاس قسمیں کھاؤ گے اور اپنے خون کے حقدار ٹھہرو گے؟“ انہوں نے عرض کی ہم نہ حاضر تھے نہ دیکھا تو آپ صلی اللہ علیہ وسلم نے فرمایا: ”پھر یہود پچاس قسمیں کھا کر بری ہو جائیں گے“ تو کہنے لگے اے اللہ کے رسول! ہم کفار کی قسمیں قبول کریں؟ تو رسول اللہ صلی اللہ علیہ وسلم نے بیت المال سے دیت اداء فرمائی۔ راوی بشر کہتے ہیں کہ سہل بن ابی حشمہ رضی اللہ عنہ نے کہا: ان دیت کے اونٹوں میں سے ہمارے باڑے میں مجھے ایک اونٹ نے لات ماری۔