السنن المأثورة

➊ مشترکہ غلام میں اگر صاحب مال اپنا حصہ آزاد کرے تو اس کی ذمہ داری ہے بقیہ قیمت ادا کر کے مکمل غلام کو آزادی دلائے اگر صاحب مال نہیں تو یہ غلام اتنا آزاد تصور ہوگا اس کا جتنا حصہ آزاد کیا گیا ہے۔
➋ اسلام نے انسانیت کی آزادی کی متعدد راہیں نکالی حتی کہ اب دنیا میں غلام بطور نظام نہیں پایا جاتا یہ اسلام کی انسانیت پر کرم نوازی ہے جبکہ دیگر تہذیبوں نے انسانیت کو منڈی میں بھیڑ بکریوں کی طرح ظلما فروخت کیا جبکہ اسلام میں اگر غلام آئے بھی تو حالت جنگ میں آئے پھر انہیں بھی متعدد طریقوں سے آزاد کیا، کبھی کفارے کی مد میں، کبھی شادیاں کر کے ام الولد کو کبھی مکاتبت اور کبھی اجر کی ترغیب دے کر انسانیت کو آزادی بخشی بلکہ اسلام کی بدولت ان ہی غلاموں کو گورنر اور بادشاہ تک بنایا گیا ایسی مثال پیش کرنے سے دیگر تہذیبیں قاصر ہیں۔
➌ مذکورہ احادیث سے یہ بھی معلوم ہوا کہ ایک غلام کئی افراد کی ملکیت بھی ہوسکتا ہے۔
➍ اسلام میں آج بھی کسی کو غلام بنا کر رکھنا جائز ہے بشرطیکہ وہ شخص شرعی اصولوں کے مطابق غلام بنا ہو۔
➎ ملازمت کے لیے بھٹہ خشت کے مزدوروں اور جانوروں کو چارہ ڈالنے والے ملازموں کو غلام سمجھنا درست نہیں۔

➊ ابوجعفر رحمہ اللہ کہتے ہیں امام شافعی رحمہ اللہ نے درست نام بتایا۔ ابو جعفر رحمہ اللہ کہتے ہیں امام مالک رحمہ اللہ اس حدیث کی سند میں ہلال بن اسامہ کہتے ہیں حالانکہ وہ ہلال بن علی رحمہ اللہ ہیں ایک قائل کا یہ بھی قول ہے کہ اُن کا نام ہلال بن علی بن اسامہ رحمہ اللہ ہے اگر معاملہ ایسا ہے تو امام مالک رحمہ اللہ نے راوی کو دادے کی طرف منسوب کیا۔
➋ لونڈی سے آپ صلی اللہ علیہ وسلم نے دو سوال کیے ایک اللہ تعالیٰ کہاں ہے؟ اس سوال کا جواب اس ترقی یافتہ دور میں بھی بڑے بڑے نام نہاد دانشوروں کو نہیں آتا کہتے ہیں اللہ تعالیٰ ہر جگہ موجود ہے جو کہ سراسر غلط ہے اور غیر اسلامی نظریہ ہے اللہ تعالیٰ کی ذات عرش پر مستوی ہے اللہ کا علم و مشاہدہ ہر چیز کو محیط ہے۔
➌ اللہ رب العزت کے مستوی علی العرش ہونے کا عقیدہ فطری اور ایمان کے بنیادی عقائد میں سے ہے۔ اللہ کی ذات سے متعلق جو گمراہ عقائد صوفیوں کی وجہ سے عوام الناس میں رائج ہوئے ان میں سے اللہ تعالیٰ کی ذات کو ہر جگہ ماننا، ہر چیز میں تصور کرنا بھی ہے۔ ایک حضرت صاحب کہتے ہیں: اور جو میں ہوں وہ تو ہے اور میں اور تو خود شرک در شرک ہے۔ [مکاتیب رشیدیہ: ص 10، فضائل صدقات حصہ دوم: ص 556]
جبکہ دوسرے صاحب بولے: وہی جو مستوی عرش تھا خدا ہو کر
اتر پڑا مدینہ میں مصطفیٰ ہو کر
➍ رسول اللہ صلی اللہ علیہ وسلم نے لونڈی کے ایمان کا امتحان لیتے ہوئے دوسرا سوال اپنے متعلق کیا تو اس نے کہا: آپ اللہ کے رسول ہیں جس پر آپ صلی اللہ علیہ وسلم نے فرمایا: اسے آزاد کر دو یہ مومنہ خاتون ہے۔ [مسلم: 537]
➎ اس سے ثابت ہوا جو اللہ تعالیٰ کو عرش پر مانے اور محمد صلی اللہ علیہ وسلم کو اللہ کا رسول تسلیم کرے اس کے مومن ہونے کی گواہی آنجناب صلی اللہ علیہ وسلم نے دی ہے اور معاملہ اس کے برعکس بھی ہے کہ جو اللہ تعالیٰ کو عرش پر نہیں مانتا اور پیارے پیغمبر کو اللہ کا رسول نہیں مانتا وہ مومن نہیں ہے۔
➏ اس حدیث میں شعبدہ باز، پیروں، فقیروں، نجومیوں، جادو گروں کے پاس جانے سے رسول اللہ صلی اللہ علیہ وسلم نے منع کر دیا کہ کاہن کے پاس مت جاؤ اور کتابیں نکالنے والے، طوطے والے، سب فراڈیوں سے روک دیا اللہ تعالیٰ مسلمانوں کو ان فتنوں سے محفوظ رکھے۔ «آمين»

➊ اونٹ دس افراد کی طرف سے بھی کفایت کر جاتا ہے۔ [سنن ابن ماجہ: 3131]
➋ ابن عباس رضی اللہ عنہ فرماتے ہیں صحابہ رضی اللہ عنہ سفر میں رسول اللہ صلی اللہ علیہ وسلم کے ہمراہ تھے عید قربان آگئی تو گائے میں سات سات افراد اور اونٹ میں دس دس افراد شریک ہوئے۔ [سنن ترمذي: 905]
➌ اس طرح رسول اللہ صلی اللہ علیہ وسلم نے مال غنیمت کی تقسیم کرتے ہوئے ایک اونٹ کے بدلے دس بکریاں تقسیم کیں جس سے بھی عیاں ہوتا کہ ایک اونٹ دس بکریوں کے برابر ہے۔
➍ بالا حدیث میں عمرہ کا ذکر ہے اس میں اونٹ میں سات آدمی شریک ہوئے ہیں اس سے قربانی میں اونٹ کے لیے سات کی قید لگا دینا درست نہیں۔

➊ قربانی نماز کی ادائیگی کے بعد ہوتی ہے «قبل الصلاة» ذبیحہ عام گوشت کا حکم رکھتا ہے۔
➋ قربانی کے لیے دو دانتا جانور شرط ہے ہاں اگر میسر نہ آئے تو ایک سال کا دنبہ ذبح کر لینا چاہیے میسر نہ آنے کی دو صورتیں ہیں۔
(1) منڈی میں دو دانتا ناپید ہے۔
(2) دو دانتا خریدنے کی طاقت نہیں تو جذعاً ذبح کیا جاسکتا ہے۔
➌ ہر عبادت کے لیے طریقہ رسول صلی اللہ علیہ وسلم کی تعلیم ضروری ہے۔
➍ اگر صحابی رضی اللہ عنہ بھی خلاف سنت عمل کرے تو نامقبول ہے۔
➎ جانور کو اللہ کے نام سے ذبح کرنا چاہیے۔
➏ قربانی میں عقیقے کے حصے شامل نہیں کیے جا سکتے اور نہ ہی ایک گائے میں سات عقیقے ہوں گے عقیقہ کے لیے بچے کی طرف سے دو مینڈھے اور بچی کی طرف سے ایک مینڈھا ذبح کرنا چاہیے۔
➐ ام المومنین سیدہ عائشہ رضی اللہ عنہا سے پوچھا گیا کہ عبد الرحمن بن ابی بکر کے بچے کی طرف سے ایک اونٹ بطور عقیقہ ذبح کریں تو انہوں نے فرمایا: معاذ اللہ!
«ولكن ما قال رسول الله صلى الله عليه وسلم شاتان مكافأتان»
یعنی میں اس بات سے اللہ کی پناہ چاہتی ہوں لیکن میں وہ کروں گی جو رسول اللہ صلی اللہ علیہ وسلم نے فرمایا: کہ دو بکریاں ایک جیسی لڑکے کی طرف سے ہیں۔ [السنن الکبری للبیھقی: 301/9]

➊ تجارت میں کسی دوسرے شخص کو اپنا وکیل بنایا جاسکتا ہے۔
➋ وکیل موکل کے لیے مفید تصرف کرے تو قابل تحسین ہے۔
➌ اس حدیث سے سیدنا عروہ البارقی رضی اللہ عنہ کی فراست و لیاقت اور فضیلت بھی عیاں ہوتی ہے کہ نبی علیہ السلام نے ان پر اعتماد کیا، اپنا وکیل بنایا اور بعد ازاں ان کے حق میں دعا بھی فرمائی۔
➍ امور خیر انجام دینے والوں کی حوصلہ افزائی کرنا اور انہیں دعاؤں سے نوازنا طریقہ رسول صلی اللہ علیہ وسلم ہے۔

➊ یہ حدیث حسن لغیرہ کے درجے کی ہے صحیح بات یہ ہے کہ جب دو دانتا کم پڑ جائے تو بھیڑ کا جذعہ کفایت کرے گا۔ [مسلم: 1963]
➋ جذعہ محققین نے ایک سال کا بھیڑ کا بچہ بتایا ہے بعض چھ ماہ بھی جذعہ کا ترجمہ کرتے ہیں اس حدیث کی رو سے کہتے ہیں کہ جذعہ صرف بھیڑ کا جائز ہے بکری کا جذبہ سیدنا ابو بردہ رضی اللہ عنہ کے ساتھ خاص تھا کسی اور کے لیے جائز نہیں۔ [دیکھئے حدیث نمبر: 558]

ٹڈی اور مچھلی بغیر ذبح کیے کھائی جاتی ہیں اور یہ دونوں اگر مردہ حالت میں ملیں تو بھی ان کو کھانا جائز ہے۔ رسول اللہ صلی اللہ علیہ وسلم نے فرمایا: «أحلت لنا ميتتان: الحوت والجراد» [سنن ابن ماجہ: 3218]
ہمارے لیے دو مردار حلال قرار دیے گئے ہیں: مچھلی اور ٹڈی۔

➊ عقیقہ ساتویں روز کرنا چاہیے بچے کی طرف سے دو بکرے یا مینڈھے اور بچی کی طرف سے ایک۔
➋ میل کچیل دور کرنے سے مراد سر کے بال کاٹنا، ختنہ وغیرہ کرنا اور بال کے برابر چاندی یا سونا صدقہ کرنا چاہیے۔
➌ ساتویں دن نام رکھنا بھی مسنون عمل ہے۔ رسول اللہ صلی اللہ علیہ وسلم نے فرمایا: «الغلام مرتهن بعقيقته يذبح عنه يوم السابع ويسمى ويحلق رأسه» [سنن ترمذی: 1522]
ہر بچہ اپنے عقیقہ کے عوض گروی رکھا ہوا ہے پیدائش کے ساتویں دن اس کا عقیقہ کیا جائے، اس کا نام رکھا جائے، اور اس کے سر کے بال منڈوائے جائیں۔

نر اور مادہ ملے جلے بھی عقیقہ میں ذبح کیے جا سکتے ہیں بکرے یا مینڈھے سے اوپر کا جانور گائے اونٹ بطور عقیقہ ذبح نہیں کیے جا سکتے جب ذبیح ہی نہیں کیے جا سکتے تو حصے کا سوال ہی پیدا نہیں ہوتا۔ [دیکھئے شرح حدیث نمبر: 555]

➊ سیدہ ام کرز رضی اللہ عنہا حدیبیہ کے موقع پر حاضر ہوئی تھیں دیگر لوگ سوال کر رہے تھے تو انہوں نے اپنے سوال کے علاوہ دیگر مسائل بھی سنے یا رسول اللہ صلی اللہ علیہ وسلم نے خود مزید مسائل بھی سمجھا دیے۔
➋ عالم دین کو چاہیے موقع میسر آنے پر ملتے جلتے مسائل بھی سائل کو بتا دے تاکہ اس کا فائدہ ہو۔