السنن المأثورة

➊ حدود اللہ میں صلح نہیں ہو سکتی اور حدود کی سزائیں عدالت اپنی مرضی سے کم یا زیادہ نہیں کر سکتی، حدود کی متعین سزائیں ہیں حدود اللہ میں معاوضہ بھی نہیں چلتا۔
➋ حدیث ہذا سے یہ بھی معلوم ہوا کہ مسئلہ اہل علم سے پوچھنا چاہیے۔
➌ معاملے کی دیکھ بھال کے لیے حاکم ایک آدمی بھی ارسال کر سکتا ہے یعنی خبر واحد حجت ہے چاہے احکام وحدود کا معاملہ ہو۔
➍ اگر ظلم پر صلح کر لی جائے تو وہ مردود ہوگی۔
➎ عورتوں کو عدالت میں لائے بغیر مسئلہ حل ہو سکتا ہو تو انہیں عدالت میں نہیں گھسیٹنا چاہیے۔
➏ اقرار جرم پر عدالت کا یہ کہنا کہ تم اقرار نہ کرو تمہیں سزا ہو جائے گی غیر اسلامی ہے۔ صرف یہ تسلی کرنا ضروری ہے کہ دماغی حالت ٹھیک ہے نشہ تو نہیں کیا ہوا۔ پولیس نے اپنی کارگزاری بنانے کے لیے ملزم کو دھوکہ میں تو نہیں رکھا ہوا کہ اقرار کرو بری ہو جاؤ گے وغیرہ۔
➐ عدالت سے بات کرنے سے پہلے اجازت طلب کرنا بھی اس حدیث سے ثابت ہوتا ہے۔
➑ حدود کا مقدمہ عدالت میں پہنچ جائے اور پھر ثابت بھی ہو جائے تو لازماً سزا ہو گی چاہے فریقین کے درمیان صلح ہو جائے۔
➒ امام مالک رحمہ اللہ نے فرمایا ہے کہ جلا وطنی کی بجائے جیل میں ڈال دیا جائے تو بھی ٹھیک موجودہ عدالتی نظام کے تناظر میں امام مالک رحمہ اللہ کا قول درست ہے کیونکہ مقصود حاصل ہو جاتا ہے جبکہ احناف کا کہنا کہ جلا وطنی سزا کا حصہ نہیں یہ قول حدیث کی مخالفت کے سوا کچھ نہیں۔
➓ کتاب اللہ سے مراد شریعت ہے چاہے قرآن میں مسئلہ نہ ہو۔
⓫ اس حدیث میں ہے کہ میں کتاب اللہ سے فیصلہ کروں گا اس سے علماء نے استدلال کیا ہے کہ حدیث بھی من جانب اللہ ہے کیونکہ دونوں اللہ کا قانون ہیں: گفته او گفته اللہ بود
گرچہ از حلقوم عبد اللہ بود
⓬ عورت شادی شدہ تھی اور لڑکا غیر شادی شدہ اس لیے سزا مختلف۔
⓭ اس حدیث سے یہ بھی معلوم ہوا کہ غیر شرعی طور پر لیا گیا تاوان واپس ہو گا۔ اہل علم کے فیصلے کے بعد اپیل کا فیصلہ رسول اللہ صلی اللہ علیہ وسلم نے فوراً کر دیا۔ جبکہ عصر حاضر میں عدالت اپیل گویا فیصلہ کرنا بھول ہی جاتی ہے۔
⓮ زنا کی وجہ سے میاں بیوی میں جدائی نہیں ہوتی جب تک کہ خاوند خود طلاق نہ دے اگر طلاق نہیں دیتا تو زنا سے نکاح ختم نہیں ہوتا۔
⓯ حدود کا نفاذ حکومت وقت کا نمائندہ کرے گا۔ انفرادی طور پر حدود اللہ کے نفاذ کے لیے عدالتیں یا جرگے قائم کر لینا معاشرتی بگاڑ کا باعث ہیں اور ایسا عمل خلاف شرع ہے۔
⓰ ادنیٰ درجہ کے اہل علم سے مسئلہ پوچھ لینے کے بعد اس کی بڑے علماء سے تصدیق کروانا سنت ہے۔
⓱ ہر وہ صلح یا معاملہ جو غیر شرعی اصولوں پر ہو باطل ہے۔
⓲ رسول اللہ صلی اللہ علیہ وسلم کے فیصلے کتاب اللہ کی حیثیت رکھتے ہیں لہذا صحیح احادیث کا منکر کتاب اللہ کا انکاری ہے۔

حدود کا نفاذ ایک مسلمان کے لیے گناہ کا کفارہ بن جاتا ہے۔

➊ زنا معاشرتی ناسور ہے اس لیے شریعت اسلامیہ نے اس کو حرام قرار دیا اور اس کی سزا سخت ترین مقرر کی۔
➋ کتمان علم اہل کتاب کا شیوہ ہے۔
➌ اہل حق، اہل اسلام نے ہر دور میں یہود کی سازشوں کا بروقت تدارک کیا اور انہیں واضح فرمایا۔
➍ سیدنا عبد اللہ بن سلام رضی اللہ عنہ جلیل القدر صحابی رسول صلی اللہ علیہ وسلم ہیں پہلے یہودی عالم تھے بعد ازاں اسلام قبول کیا اور صحابہ کرام رضی اللہ عنہم میں خوب علمی مقام رکھتے ہیں۔
➎ زنا کی جو سزا تورات میں ہے وہی اسلام میں ہے۔
➏ شادی شدہ زانی کو رجم اور غیر شادی شدہ کے لیے سو کوڑے اور ایک سال کی جلا وطنی ہوگی۔
➐ زنا سابقہ شریعتوں میں بھی جرم تھا اور ہماری شریعت میں بھی جرم ہے۔

فوائد کے لیے دیکھئے شرح حدیث نمبر 525۔

➊ زنا اور حدود اللہ میں فدیہ نہیں چلتا شادی شدہ زانی کی سزا رجم ہے اور غیر شادی شدہ کی سزا سو کوڑے اور جلا وطنی ہے۔
➋ جلا وطنی کو امام مالک رحمہ اللہ کے قول پر عمل کرتے ہوئے عصر حاضر میں بند حوالات جوڈیشل کیا جانا مناسب ہے۔
➌ زنا کے ثبوت کے لیے چار عینی شاہد ضروری ہیں جنہوں نے ذکر کو فرج میں جاتے دیکھا ہو تو جرم زنا ثابت ہوتا ہے کیونکہ گواہی پر مجرم کو رجم کیا جائے گا انسانی جان کے ضیاع کو مد نظر رکھتے ہوئے اسلام نے سخت شرائطِ گواہان رکھیں تاکہ ہر آدمی دوسرے کو بلا تحقیق الزام نہ لگائے اور اگر الزام ثابت کرنے میں ناکام ہو جائے تو حد قذف جاری ہوگی۔
➍ زنا اقرار جرم سے بھی ثابت ہو جاتا ہے عہد نبوی صلی اللہ علیہ وسلم میں جتنے زنا کے کیسز میں سزائیں ہوئیں وہ اقرار جرم سے ہی ہوئی ہیں۔
➎ زنا میں عینی شاہد مشکل ہیں مذکورہ حدیث میں بھی سعد رضی اللہ عنہ نے اسی لیے تعجب کیا تو قانون لعان نازل ہوا۔

➊ شرعاً بعض احکامات میں غلام اور لونڈی کے لیے تخفیف اور استثناء ہے جن میں سے ایک حکم حدیث بالا میں بیان ہوا۔
➋ غلام اور لونڈی پر رجم نہیں اگرچہ شادی شدہ ہوں جیسا کہ ارشادِ باری تعالیٰ ہے: ﴿وَمَنْ لَّمْ یَسْتَطِعْ مِنْكُمْ طَوْلًا اَنْ یَّنْكِحَ الْمُحْصَنٰتِ الْمُؤْمِنٰتِ فَمِنْ مَّا مَلَكَتْ اَیْمَانُكُمْ مِّنْ فَتَیٰتِكُمُ الْمُؤْمِنٰتِؕ-وَ اللّٰهُ اَعْلَمُ بِاِیْمَانِكُمْؕ-بَعْضُكُمْ مِّنْۢ بَعْضٍۚ-فَانْكِحُوْهُنَّ بِاِذْنِ اَهْلِهِنَّ وَ اٰتُوْهُنَّ اُجُوْرَهُنَّ بِالْمَعْرُوْفِ مُحْصَنٰتٍ غَیْرَ مُسٰفِحٰتٍ وَّ لَا مُتَّخِذٰتِ اَخْدَانٍۚ-فَاِذَاۤ اُحْصِنَّ فَاِنْ اَتَیْنَ بِفَاحِشَةٍ فَعَلَیْهِنَّ نِصْفُ مَا عَلَى الْمُحْصَنٰتِ مِنَ الْعَذَابِؕ-ذٰلِكَ لِمَنْ خَشِیَ الْعَنَتَ مِنْكُمْؕ-وَ اَنْ تَصْبِرُوْا خَیْرٌ لَّكُمْؕ-وَ اللّٰهُ غَفُوْرٌ رَّحِیْمٌ۠﴾ [النساء: 25]
اور تم میں سے جس کسی کو آزاد مسلمان عورتوں سے نکاح کرنے کی پوری وسعت وطاقت نہ ہو تو وه مسلمان لونڈیوں سے جن کے تم مالک ہو (اپنا نکاح کر لے) اللہ تمہارے اعمال کو بخوبی جاننے واﻻ ہے، تم سب آپس میں ایک ہی تو ہو، اس لئے ان کے مالکوں کی اجازت سے ان سے نکاح کر لو، اور قاعده کے مطالق ان کے مہر ان کو دو، وه پاک دامن ہوں نہ کہ علانیہ بدکاری کرنے والیاں، نہ خفیہ آشنائی کرنے والیاں، پس جب یہ لونڈیاں نکاح میں آجائیں پھر اگر وه بے حیائی کا کام کریں تو انہیں آدھی سزا ہے اس سزا سے جو آزاد عورتوں کی ہے۔ کنیزوں سے نکاح کا یہ حکم تم میں سے ان لوگوں کے لئے ہے جنہیں گناه اور تکلیف کا اندیشہ ہو اور تمہارا ضبط کرنا بہت بہتر ہے اور اللہ تعالیٰ بڑا بخشنے واﻻ اور بڑی رحمت واﻻ ہے۔
ان کی سزا آزاد سے نصف ہے جبکہ رجم نصف نہیں ہو سکتا کوڑے نصف ہوں گے اس پر امت کا اجماع ہے۔
➌ غلام و لونڈی شادی شدہ و غیر شادی شدہ پر بھی زنا کی حد نافذ ہوگی۔
➍ غلام یا لونڈی کی جلا وطنی یہی ہے کہ اسے آگے فروخت کر دو تاکہ ماحول تبدیل ہو شاید باز آ جائے یا شادی ہو جائے۔
➎ اس کے رجم میں مالک کا نقصان تھا جبکہ مالک بے قصور ہے اس حکمت کو بھی مدنظر رکھا گیا ہے۔
➏ زنا کرنے والے غلام و لونڈی کو بیچنا جائز ہے۔
➐ بد کردار اور بدفطرت غلام لونڈی اور نوکر کو گھر سے نکال دینا چاہیے۔
➑ غلام و لونڈی پر اس کا مالک حد نافذ کرے گا، ایک دفعہ سیدنا علی رضی اللہ عنہ نے خطبہ دیتے ہوئے فرمایا: «ياايها الناس اقيموا على ارقائكم الحد من احصن منهم و من لم يحصن» [صحیح مسلم: 1705]
اے لوگو! اپنے شادی شدہ اور غیر شادی شدہ غلاموں پر حدود نافذ کرو۔

➊ کسی شخص کا مال اس کی حفاظت کی جگہ سے چھپ کر چرا لینے کا نام چوری ہے۔
➋ اصل نصاب ڈھال نہیں کیونکہ ڈھال ہر زمانے میں مختلف قیمت کی ہوتی رہی ہے اصل نصاب ربع دینار ہے اور اتنی یا اس سے زائد مالیت کی اشیاء اگر اٹھالی جائیں تو اٹھانے والے پر حد کا نفاذ ہوگا۔
➌ چوری کی سزا کا ذکر قرآن میں بھی مذکور ہے، ارشادِ باری تعالیٰ ہے: ﴿وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِّنَ اللهِ وَاللهُ عَزِيزٌ حَكِيمٌ﴾ [المائدة: 38]
اور تم چوری کرنے والے مرد اور چوری کرنے والی عورت کے ہاتھ کاٹ دیا کرو، یہ اللہ کی طرف سے اس گناہ کی عبرت ناک سزا ہے جو انھوں نے کیا، اور اللہ غالب، خوب حکمت والا ہے۔
➍ اگر چوری ربع دینار سے کم ہے تو تعزیراً کوئی مناسب سزا قاضی وقت دے سکتا ہے حدود میں کمی پیشی عدالت نہیں کر سکتی البتہ تعزیری سزا میں کمی پیشی ممکن ہے حالات واقعات کے مطابق سزا مختلف ہو سکتی ہے۔
➎ عہد نبوی صلی اللہ علیہ وسلم میں ایک دینار بارہ درہم کا ہوتا تھا۔ موجودہ دور میں چوتھائی دینار تقریباً ایک گرام سونا کے برابر ہے، لہذا اتنی مالیت یا اس سے زیادہ کی کوئی چیز چرانے پر چور کا ہاتھ کاٹا جائے گا۔

➊ حدود کا مقدمہ قاضی یا حاکم تک پہنچنے سے پہلے معاف کیا جا سکتا ہے۔
➋ جرم ثابت ہونے کے بعد متاثرہ شخص بھی معاف نہیں کر سکتا رسول اللہ صلی اللہ علیہ وسلم نے فرمایا: «تعافوا الحدود قبل أن تأتوني به فما أتاني من حد فقد وجب» [سنن نسائی: 4885]
ملزمان کو میرے پاس پیش کرنے سے پہلے ہی حدود معاف کر دیا کرو میرے پاس کوئی حد والا مقدمہ آیا تو حد واجب ہوگی۔
➌ البتہ قصاص کے مقدمات اور 337 سے متعلقہ دفعات ضرر وغیرہ قابل راضی نامہ ہیں فیصلہ عدالت کے بعد بھی قانوناً اور شرعاً راضی نامہ کیا جاسکتا ہے۔
➍ حاکم اور قاضی کو چاہیے فوراً حدود شرعیہ کا فیصلہ دے اور نفاذ کرے اس سلسلہ میں بلا وجہ کی تاخیر درست نہیں ہے۔

➊ خلافتِ بنو امیہ بھی اسلام کی سربلندی اور امت مسلمہ کا سنہری دور تھا جس میں حدود اللہ نافذ تھیں قرآن و حدیث کی پاسداری کی جاتی تھی تاریخِ اسلام کی سب سے بڑی اسلامی سلطنت بنی امیہ کی خلافت و سلطنت ہے جس نے ہند و سندھ اور افریقہ و یورپ میں اسلام کے جھنڈے گاڑے اور تاریخ کے اوراق پر ان مٹ سنہری نقوش چھوڑے اگرچہ بعض ناگوار واقعات بھی رونما ہوئے۔
➋ مروان بن حکم رحمہ اللہ کے پاس حدیثِ رسول صلی اللہ علیہ وسلم پہنچی تو اس نے اپنا فیصلہ اور اپنی بات فوراً چھوڑ کر حدیثِ نبوی کو اختیار کیا: عقل قربان کن بہ پیش مصطفیٰ
مصطفیٰ صلی اللہ علیہ وسلم کی بات آجانے پر اپنی رائے اور عقل کو قربان کر دو۔
➌ معلوم ہوا پھل یا کھجور کی گری چوری کرنے پر ہاتھ نہیں کاٹا جائے گا، اگر قاضی اور عدالت مناسب سمجھے تعزیر سزا دے سکتی ہے۔
➍ حدیث میں موجود پھل سے مراد درختوں پر لگا ہوا پھل ہے کولڈ اسٹور وغیرہ سے پھل چرانے پر حد نافذ ہوگی۔ رسول اللہ صلی اللہ علیہ وسلم نے ارشاد فرمایا: «ومن سرق منه شيئا بعد أن يؤويه الجرين فبلغ ثمن المجن فعليه القطع ومن سرق دون ذلك فعليه غرامة مثليه والعقوبة» [سنن ابی داؤد: 4390]
اور جس نے پھل کو کھلیان میں محفوظ کر دینے کے بعد چرایا اور اس کی قیمت ایک ڈھال کو پہنچے تو اس پر چور کا ہاتھ کاٹنا ہے اور جو کوئی اس سے کم چرائے تو اس پر چوری شدہ کا دو گنا جرمانہ اور سزا ہے۔

➊ بتع یمن کا مشہور مشروب تھا رسول اللہ صلی اللہ علیہ وسلم کا مقصد یہ تھا کہ اگر نشہ آور ہو جائے تو حرام ہوگا اگر نشہ آور نہ ہو تو جائز ہے۔
➋ بعض مشروب زیادہ دن خاص برتن میں پڑے رہیں تو خراب ہو کر نشہ آور ہو جاتے ہیں۔ ➌ اگر نبیذ پڑی رہے تو نشہ آور ہو جاتی ہے اسی طرح دو مختلف اجناس اکٹھی بھگو لی جائیں تو نشہ پیدا کر دیتی ہیں۔ لہذا ایسا ہر وہ مشروب جس میں نشہ پیدا ہو جائے وہ پینا حرام ہے وہ کسی بھی جنس سے تیار شدہ ہے۔

➊ منع کرنے کی علت یہ ہے کہ دو پھلوں کی مشترکہ نبیذ ایک دوسرے کو قوی کر دیتی ہے جو باعث نشہ ہے جیسے منقیٰ اور کھجور یا تازہ کھجور اور خشک کھجور اس طرح کدو کے برتن، مٹکے، تارکول لگے ہوئے برتن، کھجور کی جڑ سے بنانے گئے برتن میں نبیذ بنانا بھی اسی علت کے باعث منع ہے۔

➊ ان برتنوں میں جلد چیز خراب ہو کر نشہ آور ہو جاتی ہے اس لیے اس سے منع فرمایا، بعض کی رائے ہے کہ ان برتنوں میں شراب بنائی جاتی تھی اس لیے ان برتنوں سے منع کیا تا کہ شراب کا خیال تک نہ آئے اب یہ ممانعت منسوخ ہو چکی ہے کیونکہ رسول اللہ صلی اللہ علیہ وسلم نے فرمایا: «نهيتكم عن النبيذ إلا فى سقاء، فاشربوا فى الأسقية كلها، ولا تشربوا مسكرا» [مسلم: 977]
میں نے تمہیں چمڑے کے برتنوں کے علاوہ تمام چیزوں میں نبیذ سے منع کیا تھا، اب تم نشہ آور چیز کے علاوہ ہر برتن میں پی سکتے ہو۔

یہ برتن شراب کے لیے استعمال ہوتے تھے اس لیے ان سے وقتی طور پر منع کر دیا۔ سفید مٹکے کے الفاظ سنن نسائی حدیث نمبر 5625 کے مطابق مدرج ہیں اور صحیح البخاری حدیث نمبر 5596 کے مطابق سبز گھڑے کا ہی ذکر ہے۔

➊ ابو جعفر رحمہ اللہ کہتے ہیں مذکورہ الفاظ حدیث میری کتاب میں ہیں جبکہ امام مزنی رحمہ اللہ سے جو میں نے حفظ کیا اس کے الفاظ اس طرح ہیں کہ مشکیزے کے اختناث سے منع فرمایا کہ اسے الٹا کر اس کے منہ سے پیا جائے۔ مسند ابی بکر بن ابی شیبہ رحمہ اللہ کے مطابق ایک آدمی نے مشکیزے سے منہ لگا کر پیا مشکیزے میں سانپ کا بچہ تھا جو اس کے پیٹ میں چلا گیا تو رسول اللہ صلی اللہ علیہ وسلم نے اس سے منع فرما دیا۔
➋ اس کی دیگر حکمتیں بھی ہو سکتی ہیں آدمی کا سانس برتن میں چلا جاتا ہے پھر پینے میں بھی دشواری ہوتی ہے، دوسرا آدمی اسی سے پینے میں دلی طور پر کراہت محسوس کرتا ہے، اس لیے تہذیب کا تقاضا یہی ہے کہ گلاس میں ڈال کر پیا جائے جن احادیث میں جواز ہے فتح الباری کے مطابق وہ جواز اس حدیث سے منسوخ متصور ہوگا۔ «والله اعلم»