السنن المأثورة

➊ امام بخاری رحمہ اللہ نے اس سے استدلال کیا ہے کہ کنکریاں مارتے وقت بھی مسئلہ پوچھا جا سکتا ہے اور سواری پر بھی پوچھا جا سکتا ہے۔
➋ 10 ذی الحجہ میں حاجی کے بالترتیب کرنے کے کام اس طرح ہیں: (1) کنکریاں مارنا (2) قربانی کرنا (3) بال کٹوانا (4) طواف کرنا (5) سعی۔ حج تمتع کرنے والے پر اور اگر حج مفرد اور قارن والے نے طواف قدوم کے ساتھ سعی نہیں کی تو وہ بھی سعی کرے گا، ان پانچ کاموں میں اگر ترتیب آگے پیچھے ہو جائے تو کوئی حرج نہیں۔
➌ اگر مسئلہ معلوم نہ ہو تو صاحب علم سے راہ نمائی لے لینی چاہیے۔

➊ سیدہ اسماء بنت عمیس رضی اللہ عنہا، سیدنا جعفر بن ابی طالب رضی اللہ عنہ کی زوجہ محترمہ تھیں انہوں نے جعفر رضی اللہ عنہ کے ساتھ ہجرت حبشہ بھی کی پھر غزوہ موتہ میں سیدنا جعفر رضی اللہ عنہ شہید ہو گئے تو بعد از عدت ان سے سیدنا ابو بکر رضی اللہ عنہ نے نکاح کیا۔ سیدنا ابو بکر رضی اللہ عنہ کی وفات کے بعد ان سے سیدنا علی بن ابی طالب رضی اللہ عنہ نے نکاح کیا یہ چالیس ہجری کو سیدنا علی رضی اللہ عنہ کی شہادت کے بعد فوت ہوئیں۔ آپ عبد اللہ بن جعفر رضی اللہ عنہ، محمد بن ابی بکر رحمہ اللہ اور یحییٰ بن علی رحمہ اللہ کی والدہ ہیں اور یہ تینوں باہم اخیافی بھائی تھے۔ سیدہ اسماء رضی اللہ عنہا، ام المومنین میمونہ بنت حارث رضی اللہ عنہا کی اخیافی بہن بھی تھیں۔
➋ سیدہ اسماء رضی اللہ عنہا کے ہاں محمد بن ابی بکر رحمہ اللہ کی احرام باندھنے سے قبل ہی ولادت ہوئی، وہ نفاس میں تھیں، حالت نفاس کو غسل پاک نہیں کرتا، یہ حکم غسل، سنتِ احرام میں سے ہے اگر صرف وضو کر لیا جائے تو بھی احرام کے لیے کافی ہے لیکن غسل افضل ہے۔

➊ عتبہ بن ابی وقاص دشمنِ اسلام کفر کی حالت میں ہی جہنم گیا جبکہ سیدنا سعد بن ابی وقاص رضی اللہ عنہ عشرہ مبشرہ میں سے صحابی جلیل ہیں۔ عتبہ نے زمعہ کی لونڈی سے زنا کیا تھا مرتے ہوئے اپنے بھائی کے لیے وصیت کر گیا عدالتِ محمدی صلی اللہ علیہ وسلم میں فیصلہ ہوا کہ بچہ اس کا گردانا جائے گا جس کے بستر پر پیدا ہوا ہے (الا یہ کہ وہ لعان کے ذریعے انکار کر دے) اور زنا کار کے لیے شرعی سزا سنگساری ہے۔
➋ سیدہ سودہ رضی اللہ عنہا کو احتیاطاً پردے کا حکم دیا گیا اس سے معلوم ہوا قاضی کا فیصلہ باطنی اور حقیقی امر نہیں بدلتا گو وہ بظاہر سیدہ سودہ رضی اللہ عنہا کا بھائی ٹھہرا مگر حقیقتاً عند اللہ بھائی نہ ٹھہرا اسی وجہ سے پردہ کا حکم دیا یہ نکتہ مولانا داؤد راز رحمہ اللہ مترجم و شارح صحیح بخاری نے بیان کیا ہے۔
➌ بچہ قانوناً اس کا تسلیم ہوتا ہے جس کے بستر پر پیدا ہوتا ہے یعنی جو شرعی و قانونی خاوند ہوتا ہے بچہ اسی کو ملے گا جب تک قانونِ لعان کے ذریعے وہ انکار نہ کرے اگر لعان کرتا ہے تو بچہ ماں کی طرف منسوب ہوگا اور ماں بیٹا ایک دوسرے کے وارث ہیں۔
➍ زانی مرد کا اگر مقدمہ زنا ثابت ہو جائے تو تب بھی الحاقِ نسب نہیں ہوگا زانی کو شادی شدہ ہونے کی صورت میں پتھر اور غیر شادی شدہ ہونے کی صورت میں کوڑے ملیں گے، بچہ نہیں ملے گا نہ اس کی طرف منسوب ہوگا اور نہ ہی شرعی وارث بنے گا۔
➎ قیافہ شناسی وہاں بطورِ دلیل معتبر ہوگی جہاں اس کے معارض کوئی قوی دلیل نہ ہو جہاں قوی دلیل اسلامک لاء موجود تھا، اور جہاں لعان کا قانون بھی حرکت میں ہو وہاں بھی قیافہ شناسی سے مقدمہ ثابت نہیں کیا جاتا۔

➊ وہ گمشدہ قیمتی اشیاء جس سے اس کا مالک بے نیاز نہیں ہو سکتا اس کی صفات یاد کر لیں مالک آئے تو اس کو واپس کی جائیں اور ایسی چیز کا سال بھر مجمع عام میں اعلان کرانا چاہیے پھر بھی مالک نہ ملے تو صدقہ کر دے یا استعمال کرے لیکن اگر سال بعد مالک آ جائے تو چیز واپس کرنی چاہیے یا اس کا بدل واپس کرنا چاہیے۔
➋ اگر چیز عام معمولی نوعیت کی ہے تو اسے استعمال کیا جا سکتا ہے علمائے امت ماہرینِ فن کا یہی فتویٰ ہے۔
➌ بکری اپنی حفاظت نہیں کر سکتی اس لیے بھیڑیے سے اس کی حفاظت ضروری تھی، سال بعد مالک آئے تو اس سے آدمی بکری کی دیکھ بھال کا خرچ لے سکتا ہے، بکری واپس کرے گا۔ اونٹ اپنی حفاظت خود کر لیتا ہے اس لیے اس کو پکڑنے سے منع کیا۔

➊ ایک ہے اولاد پر نفقہ اور دوسرا ہے اولاد کو تحفہ، نفقہ میں برابری ضروری نہیں مثلاً بڑے بیٹے کو دو روٹیاں دیتا ہے تو ضروری نہیں چھوٹے کو بھی دو روٹیاں زبردستی کھلائے، بڑے بیٹے کو کالج فیس ایک ہزار روپے دی تو ضروری نہیں دودھ پیتے کو بھی ہزار روپے دے یہ نفقہ اور اخراجاتِ تعلیم کے ہیں، جن میں برابری مشکل ہے۔ جبکہ تحفہ میں برابری ضروری ہے اور خصوصاً ایسا تحفہ جس نے بعد از موت میراث میں تقسیم ہونا ہے وہ اولاد میں سے کسی ایک کے لیے مخصوص نہیں کر سکتا۔
➋ امام احمد کے نزدیک اولاد کے درمیان ہبہ میں عدل کرنا واجب ہے ایک کو زیادہ دینا حرام ہے اس موقف کی تائید احادیث سے بھی ہوتی ہے رسول اللہ صلی اللہ علیہ وسلم نے فرمایا: «فلا تشهدني إذا فإني لا أشهد على جور»
"پھر مجھے گواہ نہ بناؤ، میں ظلم پر گواہ نہیں بنتا۔"
اس تحفہ کو رسول اللہ صلی اللہ علیہ وسلم نے ظلم قرار دیا اور ظلم حرام ہے لہذا امام احمد کا ہی مؤقف درست ہے کہ ایک وارث کو تحفہ دینا اور دوسروں کو محروم کر دینا درست نہیں ہے۔

➊ حدیث مبارکہ میں پڑوسیوں کے حقوق کا خیال رکھنے کی ہدایت کی گئی ہے اس سے ہمسائے کو ایک دیوار کم تعمیر کرنا پڑے گی اور اس کے ساتھ احسان ہوگا۔
➋ رسول اللہ صلی اللہ علیہ وسلم نے تین مرتبہ فرمایا وہ شخص مومن نہیں ہے صحابہ کرام رضی اللہ عنہم نے پوچھا کون؟ تو آپ صلی اللہ علیہ وسلم نے فرمایا: «من لا يأمن جاره بوائقه» [بخاری: 6016]
جس کی اذیت سے اس کے ہمسائے محفوظ نہیں ہیں۔
➌ ہمسائیوں سے حسن سلوک واجب ہے۔ دینِ اسلام میں اس کی بہت زیادہ تاکید کی گئی ہے، رسول اللہ صلی اللہ علیہ وسلم فرماتے ہیں: جبریل مجھے مسلسل ہمسائیوں سے متعلق تاکید کرتے رہے حتی کہ مجھے گمان ہوا کہ وہ ان کو جائیداد میں وارث بنا دیں گے۔ [بخاری: 6015]
➍ سیدنا ابو ہریرہ رضی اللہ عنہ حق گو اور بے باک تھے۔
➎ کتاب وسنت کی ترویج و تبلیغ میں آدمی کو مداہنت کا شکار نہیں ہونا چاہیے۔

اس حدیث میں رسول اللہ صلی اللہ علیہ وسلم نے جنرل پرنسپل عنایت فرمایا ہے۔

➊ اس سے مراد یہ ہے کہ ضرورت سے زائد پانی لوگوں کو استعمال کرنے دینا چاہیے کیونکہ پانی اصلا اللہ تعالیٰ کی نعمت ہے بعض لوگ اس غرض سے دوسرے چرواہوں کو اپنے کنویں سے پانی نہیں پینے دیتے تھے کہ جب پانی نہیں ملے گا تو پھر اس کنویں کے قرب و جوار کوئی نہیں آئے گا لہذا گھاس اس علاقے میں محفوظ رہے گی جو میرے مویشی کھائیں گے تو اس غرض سے پانی روکنے سے منع فرمایا ہے۔
➋ پانی جاندار کی بنیادی ضرورت ہے اس پر بلا وجہ کی روک رکاوٹ کو شریعت نے ناپسند کیا ہے۔
➌ ایک مسلمان کو وسیع الظرف ہونا چاہیے انتہائی معمولی اشیاء کے لیے بلا وجہ کی منصوبہ بندیاں نا مناسب ہیں۔

➊ صحابہ کرام رضی اللہ عنہم مشرکین کو نجس سمجھتے تھے چاہے سگی ماں یا باپ ہی کیوں نہ ہو۔
➋ اسلام نے والدین سے صلہ رحمی کا حکم دیا چاہے کافر ہی ہوں۔
➌ اس خاتون کا نام قبیلہ بنت عبد العزی تھا ابوبکر رضی اللہ عنہ نے اسے زمانہ جاہلیت میں ہی طلاق دے دی تھی یہ اپنے بیٹے حارث بن مدرکہ کے ہمراہ میوے اور گھی اپنی بیٹی کے لیے لائی تھی، ارشاد باری تعالیٰ ہے: ﴿لَا يَنْهٰكُمُ اللّٰهُ عَنِ الَّذِيْنَ لَمْ يُقَاتِلُوْكُمْ فِي الدِّيْنِ وَ لَمْ يُخْرِجُوْكُمْ مِّنْ دِيَارِكُمْ اَنْ تَبَرُّوْهُمْ وَ تُقْسِطُوْا اِلَيْهِمْ اِنَّ اللّٰهَ يُحِبُّ الْمُقْسِطِيْنَ﴾ [الممتحنة: 8]
اللہ تمھیں ان لوگوں سے منع نہیں کرتا جنھوں نے نہ تم سے دین کے بارے میں جنگ کی اور نہ تمھیں تمھارے گھروں سے نکالا کہ تم ان سے نیک سلوک کرو اور ان کے حق میں انصاف کرو، یقیناً اللہ انصاف کرنے والوں سے محبت کرتا ہے۔
➍ کافر سے دلی محبت نہیں رکھی جا سکتی نہ باپ سے نہ اولاد سے لیکن حسن سلوک کے ساتھ عام کافر سے بھی پیش آنے کی اسلام ترغیب دیتا ہے تا کہ مسلمانوں کو قریب سے دیکھنے کا انہیں موقع میسر آئے اور اللہ تعالیٰ انہیں راہ ہدایت سے نوازیں۔ ایک دفعہ رسول اللہ صلی اللہ علیہ وسلم نے سیدنا عمر رضی اللہ عنہ کو ایک ریشمی حلہ عطا فرمایا انہوں نے وہ اپنے ایک مشرک بھائی کو دے دیا جو مکہ میں رہتا تھا۔ [بخاری: 5981]
ان دلائل سے معلوم ہوتا ہے غیر محارب رواداری کا مظاہرہ کرنے والے کفار سے اچھا برتاؤ کرنا شریعت کا تقاضا ہے۔

➊ رسول اللہ صلی اللہ علیہ وسلم نے فرمایا: جب انسان وفات پا جاتا ہے تو تین اعمال کے سوا اس کا سلسلہ عمل منقطع ہو جاتا ہے۔ صدقہ جاریہ یا ایسا علم جس سے فائدہ اٹھایا جائے یا نیک اولاد جو اس کے لیے دعا کرے۔ [مسلم: 1631]
➋ ایصال ثواب کے غیر شرعی طریقوں کا اپنانا اور خلاف سنت راستوں پر چلنا دنیاوی و اخروی خسارے کا باعث ہے۔
➌ مذکورہ حدیث میں بھی ایصالِ ثواب کا ایک شرعی طریقہ بیان کیا گیا ہے کہ فوت شدہ کی طرف سے صدقہ کیا جا سکتا ہے۔

➊ ایک روایت میں ہے سیدنا عمر رضی اللہ عنہ نے فرمایا کہ میرے پاس 100 غلام تھے میں نے ان کے عوض خیبر کے علاقے میں سو حصے زمین خرید لی۔ [نسائی: 3604]
➋ سیدنا عمر رضی اللہ عنہ نے اس طرح سے صدقہ کیا کہ اصل زمین نہ فروخت کی جائے، نہ ہبہ کی جائے اور نہ کسی کو وراثت میں دی جائے اور اسے فقیروں میں رشتہ داروں میں غلام آزاد کرنے میں، جہاد میں مسافروں میں اور مہمانوں میں خرچ کیا جائے اور اس کا نگران معروف طریقے سے کھائے، دوست کو کھلائے تو کوئی حرج نہیں جبکہ وہ اس میں سے ذخیرہ اندوزی کرنے والا نہ ہو۔ یعنی آپ صلی اللہ علیہ وسلم نے زمین وقف کی آگے اس کا پھل صدقہ خیرات میں صرف ہوتا رہا۔ [ترمذی: 1375]
➌ رسول اللہ صلی اللہ علیہ وسلم نے خیبر کے یہود کو جلا وطن کرنا چاہا تو انہوں نے تجویز دی کہ ہم زمین کے معاملات دیکھ بھال میں آپ لوگوں سے زیادہ ماہر ہیں آدھی پیداوار پر ہمیں یہاں رہنے دیا جائے تو معاہدہ ہوا کہ جب تک مسلمان چاہیں گے تمہیں اس شرط پر باقی رکھیں گے اور جب چاہیں گے تمہیں جلا وطن کریں گے پھر عہد عمر رضی اللہ عنہ میں یہودیوں کی خباثتیں اور شرارتیں حد سے بڑھ گئیں تو ان سرکشوں کو عمر رضی اللہ عنہ نے خیبر سے جلا وطن کیا۔
چنانچہ سیدنا عمر رضی اللہ عنہ نے اس سلسلہ میں ارشاد فرمایا: بے شک رسول اللہ صلی اللہ علیہ وسلم نے خیبر کے یہودیوں سے یہ طے کیا تھا کہ جب ہم چاہیں گے انہیں خیبر سے نکال دیں گے، لہذا جس نے ان سے کچھ لینا ہو وصول کر لے میں یہودیوں کو نکالنے لگا ہوں، چنانچہ انہوں نے اس کے بعد انہیں خیبر سے نکال دیا۔ [ابی داؤد: 3007]

➊ بخیل آدمی کی بیوی کو گزران کے لیے صرف اتنا مال خاوند کا لینا چاہیے جس سے ضرورت پوری ہو جائے۔
➋ اس سے ثابت ہوا اولاد کا خرچ باپ کے ذمے ہے ہاں اگر ماں مالدار ہو اور باپ فقیر ہو تو اولاد کو خوراک مہیا کرنا ماں کی بھی ذمہ داری ہے۔
➌ اگر باپ گم ہو جائے یا معذور ہو تو دادے کی ذمہ داری ہے کہ پوتوں کو نان نفقہ دے اگر دادا صاحب مال ہے تو ذمہ داری پوری کرے۔ رسول اللہ صلی اللہ علیہ وسلم نے یہ ابوسفیان رضی اللہ عنہ کی غیر حاضری میں فیصلہ صادر کیا اس لیے امام بخاری رحمہ اللہ نے اس حدیث پر باب قائم کیا۔ «باب القضاء على الغائب» یک طرفہ فیصلہ صادر کرنے کا بیان امام نسائی رحمہ اللہ نے باب باندھا ہے حاکم کا کسی شخص کی غیر موجودگی میں فیصلہ کرنا جب وہ اسے پہچانتا ہو کہ واقع ہی وہ شخص ایسا ہے یعنی اس صورت میں یک طرفہ فیصلہ حالات واقعات کے تناظر میں ہوسکتا ہے۔
➍ غیبت عام طور پر حرام ہے لیکن اس کے کچھ مستثنات بھی ہیں مثلاً: 1 شرعی ضرورت جس کے بغیر چارہ نہ ہو۔
2 منکر کو تبدیل کرنے کے لیے پولیس کو شکایت۔
3 مفتی یا عالم سے فتوی کی غرض سے حقیقت حال بیان کرنا۔
4 مظلوم کا با اختیار اتھارٹی کے سامنے حقیقت بتانا۔
5 مسلمانوں کی خیر خواہی مطلوب ہو کہ شریر کے شر سے محفوظ ہو جائیں جیسے بدعتی، فاسق وغیرہ۔
6 رواۃ حدیث پر جرح بقدر ضرورت۔
7 مذکورہ شخص کا لقب ہو جیسے اندھا، گورا وغیرہ۔
➎ اس حدیث سے یہ بھی معلوم ہوا کہ غیر محرم کی آواز بقدر ضرورت سنی جاسکتی ہے۔
➏ بعض اوقات قاضی اپنی ذاتی معلومات کی بنا پر بغیر گواہ طلب کیے فیصلہ دے سکتا ہے لیکن یہ نادر حالات ہیں عام قاعدہ نہیں۔ عام قاعدہ یہی ہے کہ شہادت ظاہری پر انحصار کرے گا۔
➐ بعض نے لکھا ہے کہ اگر کوئی کسی کا حق ادا نہیں کر رہا تو اس کے امانتی مال سے اپنا حق لے سکتا ہے۔
➑ عورت کا ذخیرہ اندوزی یا فضول خرچی کے لیے خاوند کا مال بلا اجازت لینا حرام ہے۔
«المرأة مسئولة عن بيت زوجها ....»

➊ سیدنا سعد رضی اللہ عنہ سابقون الاولون میں سے ہیں، اسلام اور اہل اسلام کے لیے گرانقدر خدمات انجام دیں عشرہ مبشرہ میں شمار کئے گئے۔ آپ رضی اللہ عنہ نے ستر سال عمر پائی۔ پچپن ہجری میں فوت ہوئے۔
➋ بیمار کی تیمار داری سنت رسول صلی اللہ علیہ وسلم ہے۔
➌ ملکیتی مال کی وصیت کرنا شرعاً جائز اور درست ہے۔
➍ انسان کا ترکہ قرض کی ادائیگی اور وصیت کی تکمیل کے بعد تقسیم ہوگا۔
➎ ایک تہائی سے زیادہ کی وصیت کرنا جائز نہیں مستحب یہ ہے کہ ثلث سے بھی کم مال کی وصیت فرمائی جائے۔
➏ مہاجر کے لیے اس جگہ کو دوبارہ وطن بنانا جہاں سے ہجرت کر چکا ہے درست نہیں ہے جیسا کہ ابن عبدالبر رحمہ اللہ نے التمہید میں نقل کیا ہے کہ مہاجرین کو صرف تین ایام مکہ میں رہنے کی اجازت تھی مہاجرین صحابہ کرام رضی اللہ عنہم صرف حج و عمرہ کے لیے آتے تھے کسی نے دوبارہ مکہ کو وطن نہیں بنایا۔
➐ سیدنا سعد رضی اللہ عنہ بیمار ہوئے تو رسول اللہ صلی اللہ علیہ وسلم نے ایک آدمی کی ڈیوٹی لگائی کہ اگر سعد رضی اللہ عنہ فوت ہو جائیں تو ان کو مکہ دفن نہ کرنا۔
➑ بعض صحابہ رضی اللہ عنہم مکہ میں فوت ہوئے جیسے عبداللہ بن عمر رضی اللہ عنہما وغیرہ لیکن یہ وہ لوگ تھے جو حج یا عمرہ کے لیے وہاں گئے تھے اتفاقاً موت آگئی، انہوں نے مکہ مکرمہ میں مستقل سکونت اختیار نہ کی تھی۔

➊ احکام میراث کے نزول سے قبل وصیت کرنا فرض تھا ارشاد باری تعالیٰ ہے: ﴿كُتِبَ عَلَيْكُمْ إِذَا حَضَرَ أَحَدَكُمُ الْمَوْتُ إِن تَرَكَ خَيْرًا الْوَصِيَّةُ لِلْوَالِدَيْنِ وَالْأَقْرَبِينَ بِالْمَعْرُوفِ ۖ حَقًّا عَلَى الْمُتَّقِينَ﴾ [البقرة: 180]
تم پر فرض کر دیا گیا ہے کہ جب تم میں سے کسی کو موت آنے لگے، اگر وہ مال چھوڑے جا رہا ہو تو والدین اور رشتہ داروں کے لیے معروف طریقے سے وصیت کرے، یہ متقیوں پر لازم ہے۔
احکامِ وراثت کے نزول کے بعد وارث کے حق میں وصیت ختم ہو گئی کیونکہ اللہ تعالیٰ نے خود وصیت کرتے ہوئے ورثا کا حصہ متعین فرمایا: ﴿يُوصِيكُمُ اللَّهُ فِي أَوْلَادِكُمْ ۖ لِلذَّكَرِ مِثْلُ حَظِّ الْأُنثَيَيْنِ ۚ فَإِن كُنَّ نِسَاءً فَوْقَ اثْنَتَيْنِ فَلَهُنَّ ثُلُثَا مَا تَرَكَ ۖ وَإِن كَانَتْ وَاحِدَةً فَلَهَا النِّصْفُ ۚ وَلِأَبَوَيْهِ لِكُلِّ وَاحِدٍ مِّنْهُمَا السُّدُسُ مِمَّا تَرَكَ إِن كَانَ لَهُ وَلَدٌ ۚ فَإِن لَّمْ يَكُن لَّهُ وَلَدٌ وَوَرِثَهُ أَبَوَاهُ فَلِأُمِّهِ الثُّلُثُ ۚ فَإِن كَانَ لَهُ إِخْوَةٌ فَلِأُمِّهِ السُّدُسُ ۚ مِن بَعْدِ وَصِيَّةٍ يُوصِي بِهَا أَوْ دَيْنٍ ۗ آبَاؤُكُمْ وَأَبْنَاؤُكُمْ لَا تَدْرُونَ أَيُّهُمْ أَقْرَبُ لَكُمْ نَفْعًا ۚ فَرِيضَةً مِّنَ اللَّهِ ۗ إِنَّ اللَّهَ كَانَ عَلِيمًا حَكِيمًا﴾ [النساء: 11]
اللہ تمھیں تمھاری اولاد کے بارے میں وصیت کرتا ہے مرد کا حصہ دو عورتوں کے حصے کے برابر ہے، پھر اگر (دو یا) دو سے زیادہ عورتیں ہی ہوں تو ان کے لیے ترکے میں دو تہائی حصہ ہے اور اگر ایک ہی (لڑکی) ہو تو اس کے لیے آدھا (حصہ) ہے، اور اس (مرنے والے) کے ماں باپ میں سے ہر ایک کے لیے ترکے میں چھٹا حصہ ہے، اگر اس کی اولاد ہو۔ اور اگر اس کی اولاد نہ ہو اور اس کے ماں باپ ہی اس کے وارث ہوں تو اس کی ماں کے لیے تیسرا حصہ ہے۔ اور اگر اس (مرنے والے) کے (ایک سے زیادہ) بھائی بہن ہوں تو اس کی ماں کے لیے چھٹا حصہ ہے۔ (یہ تقسیم) اس کی وصیت پر عمل یا قرض ادا کرنے کے بعد ہو گی تمھارے باپ اور تمھارے بیٹے تم نہیں جانتے کہ ان میں سے کون نفع کے لحاظ سے تم سے زیادہ قریب ہے۔ (یہ تقسیم) اللہ کی طرف سے مقرر ہے، بے شک اللہ تعالیٰ خوب جاننے والا، بڑی حکمت والا ہے۔
﴿وَلَكُمْ نِصْفُ مَا تَرَكَ أَزْوَاجُكُمْ إِن لَّمْ يَكُن لَّهُنَّ وَلَدٌ ۚ فَإِن كَانَ لَهُنَّ وَلَدٌ فَلَكُمُ الرُّبُعُ مِمَّا تَرَكْنَ ۚ مِن بَعْدِ وَصِيَّةٍ يُوصِينَ بِهَا أَوْ دَيْنٍ ۚ وَلَهُنَّ الرُّبُعُ مِمَّا تَرَكْتُمْ إِن لَّمْ يَكُن لَّكُمْ وَلَدٌ ۚ فَإِن كَانَ لَكُمْ وَلَدٌ فَلَهُنَّ الثُّمُنُ مِمَّا تَرَكْتُم ۚ مِّن بَعْدِ وَصِيَّةٍ تُوصُونَ بِهَا أَوْ دَيْنٍ ۗ وَإِن كَانَ رَجُلٌ يُورَثُ كَلَالَةً أَوِ امْرَأَةٌ وَلَهُ أَخٌ أَوْ أُخْتٌ فَلِكُلِّ وَاحِدٍ مِّنْهُمَا السُّدُسُ ۚ فَإِن كَانُوا أَكْثَرَ مِن ذَٰلِكَ فَهُمْ شُرَكَاءُ فِي الثُّلُثِ ۚ مِن بَعْدِ وَصِيَّةٍ يُوصَىٰ بِهَا أَوْ دَيْنٍ غَيْرَ مُضَارٍّ ۚ وَصِيَّةً مِّنَ اللَّهِ ۗ وَاللَّهُ عَلِيمٌ حَلِيمٌ﴾ [النساء: 12]
اور تمھاری بیویوں کے ترکے میں تمھارا آدھا حصہ ہے، اگر ان کی اولاد نہ ہو، پھر اگر ان کی اولاد ہو تو ان کے ترکے میں تمھارا چوتھا حصہ ہے۔ (یہ تقسیم) ان کی وصیت پر عمل یا قرض ادا کرنے کے بعد ہوگی اور اگر تمھاری اولاد نہ ہو تو تمھارے ترکے میں تمھاری بیویوں کا چوتھا حصہ ہے، پھر اگر تمھاری اولاد ہو تو تمھارے ترکے میں ان کا آٹھواں حصہ ہے۔ (یہ تقسیم) تمھاری وصیت پر عمل یا قرض ادا کرنے کے بعد ہوگی اور اگر وہ آدمی جس کا ورثہ تقسیم کیا جارہا ہو، اس کا بیٹا ہو نہ باپ، یا ایسی ہی عورت ہو۔ اور اس کا ایک بھائی یا ایک بہن ہو تو ان دونوں میں سے ہر ایک کے لیے چھٹا حصہ ہے۔ پھر اگر ان کی تعداد اس سے زیادہ ہو تو وہ سب ایک تہائی حصے میں شریک ہوں گے۔ (یہ تقسیم) اس کی وصیت پر عمل یا قرض ادا کرنے کے بعد (ہوگی) جبکہ وہ کسی کو نقصان پہنچانے والا نہ ہو۔ یہ اللہ کی طرف سے تاکید ہے، اور اللہ خوب جاننے والا، بڑے حوصلے والا ہے۔
﴿تِلْكَ حُدُودُ اللَّهِ ۚ وَمَن يُطِعِ اللَّهَ وَرَسُولَهُ يُدْخِلْهُ جَنَّاتٍ تَجْرِي مِن تَحْتِهَا الْأَنْهَارُ خَالِدِينَ فِيهَا ۚ وَذَٰلِكَ الْفَوْزُ الْعَظِيمُ﴾ [النساء: 13]
یہ اللہ کی حدیں ہیں اور جو اللہ اور اس کے رسول کی فرمانبرداری کرے گا، اسے اللہ ایسے باغوں میں داخل کرے گا جن کے نیچے نہریں بہتی ہیں، وہ ان میں ہمیشہ رہیں گے۔ اور یہ بہت بڑی کامیابی ہے۔
﴿وَمَن يَعْصِ اللَّهَ وَرَسُولَهُ وَيَتَعَدَّ حُدُودَهُ يُدْخِلْهُ نَارًا خَالِدًا فِيهَا وَلَهُ عَذَابٌ مُّهِينٌ﴾ [النساء: 14]
اور جو کوئی اللہ اور اس کے رسول کی نافرمانی کرے گا اور اس کی حدوں سے آگے نکلے تو اللہ اسے آگ میں داخل کرے گا جس میں وہ ہمیشہ رہے گا اور اس کے لیے رسوا کرنے والا عذاب ہے۔
اسی طرح رسول اللہ صلی اللہ علیہ وسلم نے فرمایا: «إن اللہ أعطى كل ذي حق حقه فلا وصية لوارث» [نسائی: 3671]
یقیناً اللہ تعالیٰ نے ہر حقدار کو اس کا حق دے دیا ہے چنانچہ وارث کے لیے کوئی وصیت نہیں ہے۔
➋ وصیت اگر غیر شرعی ہے تو اس پر عمل نہیں ہوگا اور اس کی اصلاح کرنا درست ہے۔ ارشاد باری تعالیٰ ہے: ﴿فَمَنْ خَافَ مِنْ مُوصٍ جَنَفًا أَوْ إِثْمًا فَأَصْلَحَ بَيْنَهُمْ فَلَا إِثْمَ عَلَيْهِ إِنَّ اللَّهَ غَفُورٌ رَّحِيمٌ﴾ [البقرة: 182]
پھر اگر کسی کو وصیت کرنے والے کی طرف سے حق تلفی یا کسی گناہ کا ڈر ہو اور وہ ان میں صلح کروا دے تو اس پر کوئی گناہ نہیں، بے شک اللہ بہت بخشنے والا، بڑا رحم کرنے والا ہے۔
➌ موت کا پتہ نہیں اس لیے بعد کے معاملات طے شدہ ہونے چاہیں، وصیت تحریری ہو اور اس پر گواہ ہوں تو بعد میں جھگڑا نہیں ہوتا اگر اس کو عدالت دیوانی میں رجسٹر کروا دیا جائے تو جعلی فرضی وصیت ناموں کا خاتمہ ہو جاتا ہے۔
➍ وصیت واجب نہیں الا یہ کہ کسی کا قرض دینا ہو یا یتیم پوتوں کے لیے کچھ وصیت کر جائے تو اچھا ہے کیونکہ وہ شرعی وارث نہیں اور پھر وہ ایسے کمزور ہوتے ہیں جن کا چچے، تائے اور دیگر وارث خیال نہیں رکھتے۔
➎ دو راتوں اور بعض روایات میں تین راتوں کا ذکر سے مراد تحدید نہیں بلکہ جلدی کی ترغیب ہے واللہ اعلم۔
➏ یہ عام وصیت کی بات ہے مگر قرض، امانت، حقوق تو لازماً لکھ کر رکھنے چاہئیں اور اولاد کو اس سے آگاہ بھی رکھنا چاہیے۔ لکھی ہوئی وصیت میں انسان خود تبدیلی بھی کر سکتا ہے لیکن وارثوں کا تبدیل کرنا حرام ہے الا یہ کہ وصیت خلاف شرع ہو تو اس کی تبدیلی لازمی ہے۔
➐ میت کے مال میں پہلا حق کفن دفن کا خرچہ، پھر قرض، پھر وصیت اگر کوئی ہو تو اس کے بعد ترکہ میت تقسیم کیا جائے گا۔ جیسا کہ سورہ النساء میں تقسیم وراثت کے ضابطوں میں اس کی وضاحت کی گئی ہے۔

➊ اپنے دعوئی میں قسم کھانا اگر قسم کچی ہو تو جائز ہے جھوٹی ہو تو کبیرہ گناہ ہے اگر چہ معمولی شے کے حصول کے لیے ہو۔
➋ منبر کے پاس جھوٹی قسم کھائے تو اپنا ٹھکانہ جہنم بنالے مقدس مقامات پر قسم کھانا اور بڑا گناہ ہے اسلامی عدالتیں منبر پر ہی لگتی تھیں اس لیے «عند المنبر» کا لفظ آیا ہے۔
➌ مقدس مقام یا ایام کے دوران گناہ کی سنگینی میں اضافہ ہو جاتا ہے۔
➍ بہت سے لوگ عدالت میں جھوٹ بولنا ضروری سمجھتے ہیں حالانکہ یہ کبیرہ گناہ ہے عدالت کے فیصلہ کے باوجود ناحق مال جائز نہیں ہو جاتا رسول اللہ صلی اللہ علیہ وسلم نے فرمایا: میں ظاہری دلائل کی بنیاد پر فیصلہ صادر کرتا ہوں جس نے چرب زبانی سے اپنے حق میں فیصلہ کروالیا تو وہ یہ سمجھے اس نے جہنم کا ٹکڑا اپنے نام الاٹ کرایا چاہے تو لے لے چاہے تو چھوڑ دے۔ [بخاری: 1713]
➎ راوی حدیث، ابو امامہ بن ثعلبہ انصاری رضی اللہ عنہ ہیں اس سے مراد مشہور صحابی ابو امامہ باہلی رضی اللہ عنہ نہیں ہیں۔