السنن المأثورة

➊ یحییٰ بن جعدہ رحمہ اللہ کا اگرچہ سیدنا عبداللہ بن مسعود رضی اللہ عنہ سے سماع ثابت نہیں تاہم روایت موصولاً صحیح ثابت ہے۔
➋ سیدنا عبداللہ بن مسعود رضی اللہ عنہ بڑے جلیل القدر صحابی تھے یہ رسول اللہ صلی اللہ علیہ وسلم کے جوتے اور پانی کا لوٹا اٹھا کر رسول اللہ صلی اللہ علیہ وسلم کے ہمراہ ہوتے، خدمتِ رسول اللہ صلی اللہ علیہ وسلم میں علم کے ساتھ ساتھ تربیت بھی سیکھتے تھے، ان ہی کے عمل سے دینی مدارس کے طلبہ نے اساتذہ کی خدمت سیکھی ہے جبکہ جہالت کی یونیورسٹیوں اور کالجوں میں طالب علم اپنے ہی استاذ کو مار پیٹ کرتے دکھائی دیتے ہیں، یہ دینی مدارس اور کالجز میں بنیادی فرق ہے۔

حاکمِ وقت جاگیر تقسیم کر سکتا ہے اور حد بندی بھی کر سکتا ہے۔ اسی طرح خالصہ زمین اگر کسی نے آباد نہیں کی تو اس سے واپس لے کر جو آباد کر سکتا ہے اس کے حوالے بغرض کاشت بھی حاکم دے سکتا ہے۔

➊ ہدی کا جانور اگر راستے میں مرنے لگے تو اسے ذبح کر کے اس پر خون ملنا ہے تاکہ معلوم ہو یہ حج کے لیے تھا، لوگ پہچان لیں اور کھائیں۔
➋ ہدی لے جانے والا اور اس کا قافلہ اس سے کچھ نہ کھائے جبکہ دوسرے راہگیر مسافر، یا دوسرے حاجی، یا مقامی افراد کھا لیں۔
➌ بغیر کسی مجبوری کے ایسے جانوروں کو راستے میں ذبح کرنا درست نہیں۔

➊ سنت طریقہ یہی ہے پہلے دائیں جانب کے بال کاٹے جائیں پھر بائیں جانب کے، رسول اللہ صلی اللہ علیہ وسلم معمول کے امورِ خیر بھی دائیں جانب سے آغاز فرما کر ادا کرتے تھے۔
➋ برکت کے لیے رسول اللہ صلی اللہ علیہ وسلم کے بال مبارک تقسیم کیے یہ رسول اللہ صلی اللہ علیہ وسلم کا خاصہ ہے، کسی ولی یا صالح بندے کی یہ خصوصیت نہیں، کیونکہ نبی کی خاصیت امتی میں منتقل نہیں ہو سکتی اور نہ ہی سلف نے آپ صلی اللہ علیہ وسلم کے بعد ابوبکر رضی اللہ عنہ و عمر رضی اللہ عنہ سے اس طرح کا معاملہ کیا فافہم جیسے رسول اللہ صلی اللہ علیہ وسلم کا لعاب مبارک باعث برکت تھا لیکن امت کا تھوک باعث جراثیم اور کرونا ہے۔
➌ رسول اکرم صلی اللہ علیہ وسلم کی اشیاء سے تبرک حاصل کرنے کا عقیدہ اسلافِ امت میں موجود تھا اور خلف بھی اس کے قائل ہیں۔
➍ جس چیز کی نسبت نبی مکرم صلی اللہ علیہ وسلم سے جڑ گئی وہ شرف و عزت اور تکریم میں ممتاز ٹھہری، آج ہم فقیروں کی پہچان بھی محض نسبتِ محمد صلی اللہ علیہ وسلم ہے: تیری نسبت سے ہے توقیر میری لوگوں میں
یہ حوالہ نہ ہو تو مری ذات میں رکھا کیا ہے

روایت اگرچہ ضعیف ہے تاہم قریشی توحید والا ہے تو قابل احترام ہے اگر مشرک ہے تو مانند ابوجہل ہے۔

➊ بحیثیت انسان قریش افضل ہیں جن کی نسل سے اللہ تعالیٰ نے رسول اکرم صلی اللہ علیہ وسلم کو مبعوث فرمایا جبکہ اسلام آنے کے بعد وہی افضل ہے جس نے توحید قبول کی اگر کسی قریشی نے کفر و شرک پر ابوجہل کی طرح اصرار کیا اور اسی پر اس کی وفات ہوئی تو اس کی کوئی فضیلت نہیں بلکہ محض جہنم کا ایندھن ہے، سیدنا بلال رضی اللہ عنہ ابوجہل سے افضل ہیں، ایسے ہی بے شمار سید کہلانے والے شرک کے بڑے بڑے داعی ہیں ان کی کوئی فضیلت نہیں، فضیلت اس وقت ہے جب «فقهوا فى الدين» وہ دین اسلام کی سمجھ حاصل کریں۔ عقیدہ و عمل پختہ کریں، کتاب و سنت کا قول و فعل میں التزام کریں۔
➋ قریش کی فضیلت میں وارد اکثر احادیث سنداً کمزور ہیں مجموعی اعتبار سے علامہ البانی رحمہ اللہ نے انہیں حسن کہا ہے۔ لہٰذا بحیثیت قوم قریش کو گالی دینا، برا سمجھنا ممنوع ہے کیونکہ ہر قوم میں اچھے لوگ بھی ہیں برے بھی، عام عرب میں بھی اتنے اعلیٰ کردار کے اچھے لوگ پائے جاتے ہیں کہ شاید پورے عجم میں ان کی مثال ملنی ممکن نہ ہو۔ اس لیے کسی بھی پوری قوم کو برا کہہ دینا درست نہیں۔
➌ فقاہت سے مراد قرآن و سنت کا گہرا فہم ہے قرآن و سنت میں جہاں بھی فقاہت کے فضائل آئے ہیں اس سے مراد قرآن و سنت کی سمجھ ہے محض رائے و قیاس کی کوئی فضیلت نہیں بلکہ مذموم ہے جس کے بہت سے دلائل ہیں۔
➍ قریش امانت والے ہیں سے بعض نے مراد خلافت کی ہے جیسا کہ الائمة من قریش ہے۔ اس کے علاوہ بھی ان کے پاس امانتیں ہیں، کعبہ کی کنجی، کعبہ کی تولیت، حج کے امور، مسلمانوں کی رہنمائی، توحید کی حفاظت، صحابہ کا دفاع وغیرہ وغیرہ۔

➊ اس حدیث میں اہل یمن کی فضیلت بیان ہوئی ہے، یمنی حدیثِ رسول صلی اللہ علیہ وسلم سے محبت کرنے والے لوگ ہیں، حق بات کو جلد قبول کر لیتے ہیں اللہ نے امام شوکانی رحمہ اللہ، شیخ مقبل رحمہ اللہ جیسے حضرات ان میں پیدا کیے، برصغیر میں بھی یمن کے مشائخ کے طلبہ محبانِ حدیث آئے جنہوں نے برصغیر کا کونہ کونہ فنِ حدیث سے منور کیا۔
➋ رسول اللہ صلی اللہ علیہ وسلم نے اہل یمن کے لیے دعائے برکت فرمائی۔ [صحيح بخاري: 1027]
➌ حدیث میں اہل یمن کی نرم مزاجی اور علم و ایمان کے یقین کو واضح فرمایا گیا ہے۔

➊ یہ غزوہ تبوک کی بات ہے گویا کہ اس مقام پر یمن اور شام کے علاقوں کی سرحدیں جدا ہوتی تھیں۔ یہ مرسل روایت ہے، حسن بن قاسم رحمہ اللہ نے رسول اللہ صلی اللہ علیہ وسلم کو نہیں پایا۔
➋ غزوہ تبوک حجاز اور شام کی سرحد پر واقع تبوک کے مقام پر ہوا۔ تبوک کے اردگرد کچھ عرب سردار جو عیسائی ہو گئے تھے وہ رومیوں کی ماتحتی میں تھے۔ ان عرب سرداروں میں غسانی خاندان کے عرب سب سے زیادہ طاقتور تھے۔ مدینہ پر ان کے حملے کی خبر پہنچی تو نبی اکرم صلی اللہ علیہ وسلم صحابہ کرام رضی اللہ عنہم کو لے کر تبوک پہنچے وہاں جا کر معلوم ہوا کہ حملہ کی خبر غلط تھی۔ نبی صلی اللہ علیہ وسلم نے مقام تبوک پر انیس دن قیام کیا اور واپس تشریف لے آئے۔ اس سفر میں آپ صلی اللہ علیہ وسلم کے ساتھ تیس ہزار کے قریب صحابہ کرام رضی اللہ عنہم تھے۔

➊ عرب کے تمام صوبوں میں سے یمن کا صوبہ سب سے بڑا تھا اور یمن کے بڑے قبائل میں سے ایک قبیلہ دوس کا تھا، سیدنا طفیل بن عمرو دوسی رضی اللہ عنہ انتہائی فہم و ذہین انسان تھے۔ قادر الکلام ادیب اور شاعر تھے۔ مکہ مکرمہ میں نبی اکرم صلی اللہ علیہ وسلم کے پاس حاضر ہو کر اسلام قبول کیا، بعد ازاں اپنے قبیلے کے افراد کو مسلسل دعوتِ اسلام دیتے رہے۔
➋ رسول اللہ صلی اللہ علیہ وسلم اپنوں اور بیگانوں سبھی کے لیے رحمت بن کر آئے۔
➌ سات ہجری میں جبکہ نبی اکرم صلی اللہ علیہ وسلم غزوہ خیبر کے لیے مدینہ سے نکل چکے تھے، اہل دوس مدینہ تشریف لائے۔
➍ دوس قبیلہ کے پچھتر افراد نے اپنے سردار سیدنا طفیل بن عمرو دوسی رضی اللہ عنہ کے ہمراہ اسلام قبول کیا، راویِ حدیث سیدنا ابوہریرہ رضی اللہ عنہ کا تعلق بھی دوس قبیلہ سے ہے۔

➊ رسول اللہ صلی اللہ علیہ وسلم نے یہ الفاظ غزوہ حنین کے موقع پر اموالِ غنیمت کی تقسیم کے وقت ارشاد فرمائے تھے۔
➋ غزوہ حنین 8 ہجری میں ہوازن و ثقیف کے دو مضبوط عرب قبائل کے خلاف لڑا گیا۔
➌ مسلمانوں کی تعداد بارہ ہزار تھی جس میں کثیر تعداد قریشِ مکہ کے نو مسلموں کی تھی۔
➍ اس غزوہ میں مسلمانوں کو مالِ غنیمت کی صورت میں چھ ہزار قیدی، چوبیس ہزار اونٹ، چالیس ہزار بکریاں اور چار ہزار اوقیہ چاندی حاصل ہوئی۔ (رحمت عالم سید سلیمان ندوی رحمہ اللہ ص: 104)

➊ غیلان بن جریر رحمہ اللہ کہتے ہیں میں نے سیدنا انس رضی اللہ عنہ سے پوچھا: کیا تم لوگوں نے خود اپنا نام انصار رکھا ہے یا اللہ نے تمہارا نام رکھا ہے؟ تو سیدنا انس رضی اللہ عنہ نے فرمایا: اللہ نے ہمارا نام انصار رکھا ہے۔ [صحیح بخاری: 3776]
➋ یہ ایسی قوم تھی جس نے بغیر کسی عہدے اور لالچ کے اسلام اور اہل اسلام کی نصرت فرمائی۔ اللہ تعالیٰ ان کی اس بے لوث قربانی کو بیان کرتے ہوئے فرماتے ہیں: ﴿وَ الَّذِیْنَ تَبَوَّؤُ الدَّارَ وَ الْاِیْمَانَ مِنْ قَبْلِهِمْ یُحِبُّوْنَ مَنْ هَاجَرَ اِلَیْهِمْ وَ لَا یَجِدُوْنَ فِیْ صُدُوْرِهِمْ حَاجَةً مِّمَّاۤ اُوْتُوْا وَ یُؤْثِرُوْنَ عَلٰۤى اَنْفُسِهِمْ وَ لَوْ كَانَ بِهِمْ خَصَاصَةٌ وَ مَنْ یُّوْقَ شُحَّ نَفْسِهٖ فَاُولٰٓىٕكَ هُمُ الْمُفْلِحُوْنَ﴾ [الحشر: 9]
اور (ان کے لیے) جنہوں نے ان سے پہلے اس گھر میں اور ایمان میں جگہ بنا لی ہے، وہ ان سے محبت کرتے ہیں جو ہجرت کر کے ان کی طرف آئیں اور وہ اپنے سینوں میں اس چیز کی کوئی خواہش نہیں پاتے جو ان (مہاجرین) کو دی جائے اور اپنے آپ پر ترجیح دیتے ہیں، خواہ انہیں سخت حاجت ہو اور جو کوئی اپنے نفس کی حرص سے بچا لیا گیا تو وہی لوگ ہیں جو کامیاب ہیں۔
➌ انصار نے اسلام کے لیے بڑی قربانیاں دیں، حق و باطل کے ہر معرکہ میں پیش پیش رہے۔ بڑے بڑے کفر کے سورماؤں کی گردنیں اڑائیں، میدانِ بدر میں سب سے پہلے مبارزت کا جواب دینے یہی لوگ اترے، قریش کے نمائندوں نے ان کے ہاتھوں ذبح ہونا پسند نہ کیا تو رسول اللہ صلی اللہ علیہ وسلم نے قریشیوں کی طبعِ نازک کی لاج رکھتے ہوئے سیدنا علی رضی اللہ عنہ، سیدنا عبداللہ رضی اللہ عنہ، سیدنا حمزہ رضی اللہ عنہ اور سیدنا ابوعبیدہ رضی اللہ عنہ کو بھیجا جنہوں نے جاتے ہی سردارانِ کفر کو واصلِ جہنم کیا۔
➍ غزوہ حنین کے موقع پر رسول اللہ صلی اللہ علیہ وسلم نے ان کے لیے تاریخی الفاظ ارشاد فرمائے: «الأنصار شعار والناس دثار» [صحیح بخاری: 4330]
انصار شعار (جسم کے ساتھ لگا ہوا کپڑا) ہیں اور دوسرے لوگ دثار (اوپر لیا جانے والا کپڑا) ہیں۔
➎ رسول اللہ صلی اللہ علیہ وسلم نے ان کے قبائل کا آدمی ہونے کی تمنا کی، ان کا بدلہ رسول اللہ صلی اللہ علیہ وسلم بھی ادا نہ کر سکے حتیٰ کہ آپ صلی اللہ علیہ وسلم نے فرمایا: تم صبر کرنا تمہارا بدلہ میں حوضِ کوثر پر ہی ادا کروں گا۔ [صحیح بخاری: 3792]
دورِ حاضر میں بھی انصاری بکثرت دین سے محبت رکھتے ہیں اور کم ہی کسی بڑے عہدے پر پائے گئے ہیں۔

➊ امام طحاوی رحمہ اللہ کہتے ہیں امام مزنی رحمہ اللہ نے یہ روایت جب بیان کی تو میرے والد رحمہ اللہ نے فرمایا: اہل علم مزید دو اشعار کا اضافہ کرتے ہیں جن کا مفہوم ان ہی اشعار سے ملتا ہے کہ اور وہ کہنے لگے آ جاؤ ہمارے گھر حتیٰ کہ ان کے حسنِ سلوک سے ہمارے غم دور ہو گئے، اور ان کے احسانات اندھے کو بھی نظر آنے لگے۔ ان احسانات کے بعد ہم سلمیٰ اور اس کے قبیلہ کے احسانات کے غلام اور گروی ہیں جبکہ اس سے قبل ہم سے تمام شہر تنگ آ چکے تھے۔
➋ یہ زمانہ جاہلیت کے ایک شاعر طفیل غنوی کا کلام ہے جس کے ساتھ ایک قبیلے نے احسان کیا تو سیدنا ابوبکر صدیق رضی اللہ عنہ نے فرمایا: انصار قبیلہ نے ہمارے ساتھ بھی اسی طرح حسنِ سلوک کیا ہے گویا شاعر نے یہ ہماری مثال اپنے اشعار میں بیان کر دی۔
➌ معلوم ہوا اچھا شعر کسی کافر کا بھی پڑھا جا سکتا ہے۔
➍ شعر و شاعری شرعاً فی نفسہ مذموم نہیں ہے البتہ اس کی طرف حد درجہ کا رجحان ناپسندیدہ ہے۔ مولانا حالی رحمہ اللہ نے اپنے زمانے کے شعراء کا خوب نقشہ کھینچا ہے: برا شعر کہنے کی گر کچھ سزا ہے
تو وہ محکمہ جس کا قاضی خدا ہے
عبث جھوٹ بکنا اگر ناروا ہے
مقرر جہاں نیک و بد کی سزا ہے
گنہگاروں چھوٹ جائیں گے سارے
جہنم کو بھر دیں گے شاعر ہمارے
یہ وہ شاعر ہیں جو ہر خیال کو اچھوتے انداز میں شعر کے قالب میں ڈھال دیتے ہیں وہ خیال شیطانی ہے یا رحمانی اس سے ان کو غرض نہیں ہے۔ یہی شاعری قابلِ مذمت ہے۔
➎ رسول اللہ صلی اللہ علیہ وسلم نے سیدنا حسان بن ثابت رضی اللہ عنہ کی دفاعِ اسلام و نبیِ اسلام صلی اللہ علیہ وسلم کے لیے شاعری کی ہمت افزائی فرمائی۔ [صحيح مسلم: 2490]

➊ کمزور خواتین اور بچوں کو آدھی رات کے بعد فجر سے پہلے مزدلفہ سے منی آنے کی اجازت دی گئی تھی جن میں ام المومنین سیدہ سودہ رضی اللہ عنہا بھی تھیں۔
➋ ضعیف و کمزور لوگوں کے لیے یہ حکم اب بھی برقرار ہے۔
➌ دو اکٹھی نمازیں پڑھتے ہوئے ایک اذان کہی جائے گی چونکہ لوگ موجود ہیں دوسری اذان کی ضرورت نہیں جبکہ ہر نماز کے لیے علیحدہ اقامت کہی جائے گی جیسا کہ جابر بن عبد اللہ رضی اللہ عنہ کی روایت میں ہے کہ باذان واحد و اقامتین اذان ایک کہی اور دو اقامتیں کہیں۔ [صحیح مسلم: 1218]
➍ سفر حج میں اتباع سنت کے بہت اسباق ہیں عقل کا تقاضا ہے کہ آدمی عبادت کے لیے گیا ہوا ہے نمازیں اپنے وقت پر پڑھے عصر کے وقت ویسے ہی عرفات میں اذکار میں مشغول ہوتا ہے تو وقت پر نماز پڑھے لیکن شریعت کہتی ہے نہیں آج وقت سے پہلے ظہر کے وقت ہی ظہر وعصر جمع کر لو اسی طرح نماز مغرب مزدلفہ جاتے ہوئے راستے میں مغرب کا وقت نکل رہا ہوتا ہے لیکن عقل کی نہیں مانی جاتی شریعت کہتی ہے آج مغرب مزدلفہ ہی اداء کرنی ہے چاہیے آدھی رات ہو جائے جبکہ ہم نے بعض پاکستانی بھی تبلیغی جماعت کا لیبل لگانے والے اپنی آنکھوں سے دیکھے کہ وہ عرفات سے نکلتے ہی اس خیال سے ہیں کہ مغرب کا وقت جا رہا ہے نماز شروع کر دیتے تھے، ہم جامعات کے طلبہ اُن کو منع کرتے، مسئلہ بتاتے پر وہ کسی کی نہ سنتے اور جگہ جگہ نمازیں پڑھنا شروع کر دیتے اور واپس آ کر یہی تبلیغ کی ذمہ داری نبھاتے ہیں جن کو خود سنت رسول صلی اللہ علیہ وسلم کا علم نہیں اور نہ ہی حق مانتے ہیں اور نہ ہی مطالعہ کرتے ہیں بس تبلیغ کا شوق ہے، جہالت سے کوئی تبلیغ نہیں ہوتی نیم حکیم خطرہ جان اور نیم ملاں خطرہ ایمان۔
عقل قربان کن بہ پیش مصطفی صلی اللہ علیہ وسلم
حسبی اللہ گو کہ اللہ از کفی
ترجمہ: جناب مصطفی صلی اللہ علیہ وسلم کے سامنے عقل ورائے کو قربان کر دے اور حسبی اللہ کا یہ پیغام ہے کہ صرف اللہ ہی کافی ہے۔
➎ حج کی تین اقسام ہیں: حج تمتع: عمرہ کر کے احرام کھول دو سارے جائز کام کرو بیوی کے پاس جاؤ پھر آٹھ ذوالحجہ کو حج کے لیے دوبارہ احرام باندھ لو۔
حج افراد:
صرف اکیلا حج کرنے کی نیت سے احرام باندھنا، یوم الترویحہ آٹھ ذوالحجہ کو سیدھے منی چلے جائیں اور حج کے ارکان ادا کریں۔ یہ حج افراد ہے۔
حج قران:
عمرہ اداء کر کے آٹھ ذوالحجہ تک احرام میں رہیں پھر اسی احرام میں حج ادا کریں یہ اس کے لیے ہے جو قربانی کا جانور ساتھ لایا ہو۔
➏ مقام تنعیم جہاں پر عصر حاضر میں مسجد عائشہ ہے یہاں سے ہر ایک کا احرام باندھ کر عمرہ اداء کرنا درست نہیں کیونکہ یہ میقات نہیں ہے بلکہ حرم سے باہر کی حدود ہے ام المومنین سیدہ عائشہ رضی اللہ عنہا چونکہ میقات سے عمرہ و حج دونوں کی نیت سے آئی تھیں حیض کے باعث طواف نہ کر سکیں کیونکہ حائضہ نہ نماز پڑھتی ہے نہ مسجد میں جاتی ہے نہ طواف کرتی ہے تو انہوں نے حج کے بعد تنعیم سے عمرہ کیا یعنی حل اور حرم کو جمع کیا آج بھی اگر کسی عورت کو حیض آجائے تو وہ تنعیم سے حج کے بعد عمرہ کرے گی جبکہ جس کو حیض نہیں آیا پہلا عمرہ قضاء نہیں ہوا اس کا تنعیم سے احرام باندھنا درست نہیں کیونکہ کسی صحابی رضی اللہ عنہ نے ایسا نہیں کیا نہ ہی سیدہ عائشہ رضی اللہ عنہا کے علاوہ کسی اور کو یہ حکم ملا۔
➐ اگر عمرہ کرنے کا زیادہ شوق ہو تو میقات پر جائیں وہاں سے احرام باندھ کر آئیں اور عمرہ کریں مکہ سے قریب ترین میقات طائف ہے، اس میقات سے بھی مجھے احرام باندھنے کا شرف حاصل ہوا ہے اللہ قبول فرمائے۔