السنن المأثورة

➊ معلوم ہوا عہد نبوی صلی اللہ علیہ وسلم میں بازار میں احتساب آفیسر مقرر تھے جو غیر شرعی بیوع کا جائزہ لیتے اور بر وقت خرید و فروخت اسلامی اصولوں پر کرنے کی ہدایت کرتے تھے۔
➋ حکومت کو چاہیے کہ تحصیلداروں اور انتظامی افیسران کو ہدایت کرے کہ منڈیوں کے چکر لگائیں جو ماپ تول یا عمدہ اور ردی خلط کر کے فروخت کرتا پایا جائے اسے عبرت ناک سزائیں دیں جرمانے کریں، مال ضبط کریں۔
➌ جس قوم کی تجارت اسلامی اصولوں پر استوار نہیں اس کی معیشت کبھی مضبوط نہیں ہو سکتی دھوکہ فراڈ معیشت کو تباہ کر دیتا ہے۔

➊ سیدنا ابن عباس رضی اللہ عنہ کے نزدیک قبضہ سے قبل فروخت کرنے والی بات کا تعلق محض غذائی اجناس سے ہے جبکہ طاؤوس رحمہ اللہ کہتے ہیں یہ حکم عام ہے۔
➋ اگر کسی چیز کی قسم، وزن، مقدار، رقم اور اوصاف کا تعین کر لیا گیا ہو اور پھر مقررہ مدت پر ادائیگی ہو جائے تو پیشگی قیمت دے کر وقت مقررہ پر چیز وصول کر لینا جائز ہے۔ اسے بیع سلم یا سلف کہتے ہیں۔

زمانہ جاہلیت میں اس بیع کی دو صورتیں تھیں ایک یہ کہ اونٹنی کے پیٹ کے بچے کا سودا کر دیتے مرے، جئے، نر ہو یا مادہ وضع حمل کے بعد خریدار طے شدہ رقم کے عوض اس کا مالک قرار پاتا اور دوسری بیع اس طرح کہ اس کی قیمت اس وقت قابل اداء ہو گی جب تیسری نسل معرض وجود میں آئے گی شرعاً یہ دونوں صورتیں ممنوع ہیں کیونکہ اس میں غرر اور دیگر غیر شرعی صورتیں موجود ہیں۔

➊ «اشتمال الصماء» سے مراد ایک کپڑے میں خود کو اس طرح جکڑ دینا ہے کہ وہی شلوار اور قمیض کا کام دے اور ہاتھ بھی باہر نہ آ سکیں شریعت نے اس سے منع کیا آدمی کو اس صورت میں اگر کوئی حادثہ پیش آجائے تو حرکت ممکن نہیں اور دوسرا جب سجدہ کرے گا تو پچھلی صف کے لیے بے پردہ ہو جائے گا۔ اس لیے اس حالت سے منع فرمایا۔
➋ «الاحتباء» سے مراد ایک کپڑا لپیٹ کر اس انداز میں بیٹھنا کہ شرم گاہ ننگی ہو جائے جیسے تہبند پہن کر گھٹنے پکڑ کر بیٹھنا یا مرد حضرات حالت احرام میں ایسے بیٹھیں تو پردہ ظاہر ہو جاتا ہے اس لیے اس سے بھی منع فرمایا۔
➌ شریعت ہمیں با حیا با پردہ دیکھنا چاہتی ہے۔ لہذا ہر وہ بیٹھنے یا لیٹنے کا طریقہ جس سے پردہ قائم نہ رہ سکے اس سے بچنا ضروری ہے۔

➊ «ملامسه» اس بیع میں خریدار کپڑے کو بغیر دیکھے چھوتا ہے اور اس کے چھونے سے ہی بیع لازم ہو جاتی ہے۔
«منابذه» ایک آدمی اپنا کپڑا بیچنے کے لیے خریدار کی طرف پھینکتا ہے قبل اس سے کہ خریدار کپڑے کو الٹ پلٹ کر کے غور و فکر سے دیکھے محض پھینکنے سے بیع لازم ہو جاتی ہے۔
مذکورہ بالا دونوں بیوع میں چونکہ دھوکہ و فریب کا اندیشہ ہے اس لیے ان سے منع کیا گیا ہے نیز یہ دونوں طریقے خیار مجلس کے ابطال کا بھی باعث ہیں اس لیے یہ بیوع جائز نہیں۔
➋ یہ اور اس طرح کی دیگر بیوع جاہلیت کی بیوع ہیں دور حاضر پھر سے پہلی جاہلیت کی طرف پلٹ گیا ہے اور اس کو جہالت کے سبب ترقی اور معاشیات کے اصول سمجھ بیٹھا ہے حالانکہ صدیوں قبل تاجدار مدینہ صلی اللہ علیہ وسلم ان جعلی اور مبنی بر دھوکہ بیوع کو ختم کر گئے ہیں۔
لوٹ جا عہد نبوی صلی اللہ علیہ وسلم کی سمت رفتار جہاں
پھر مری پسماندگی کو ارتقا درکار ہے
➌ دوسرا مقام افسوس یہ ہے کہ علماء نے تجارت چھوڑ دی ہے جبکہ محدثین آئمہ میں سے متعدد بزرگ تجارت کے پیشے سے منسلک تھے جن کی بدولت بازاروں میں لوگوں کو اسلامی تجارتی اصولوں سے واقفیت رہتی تھی اور دوسری طرف علماء معاش میں خود کفیل ہو جاتے بلا خوف حق بیان کرتے۔ اور حاکم/ خلیفہ کی طرف سے صاحب السوق آفیسر بھی گشت کرتا رہتا تھا جہاں خرابی نظر آتی اصلاح کرتا تھا۔

جب تک بائع یا مشتری نے مجلس بیع تبدیل نہیں کی ہر ایک کو بیع ختم کرنے کا اختیار ہے اگر دوکان چھوڑ کر گاہک چلا گیا تو بیع پکی ہوگئی یا مجلس میں طے کر لیں کہ بیع پکی ہے ہمارا خیار ختم پھر بھی بیع پکی متصور ہو گی۔ اگر دونوں طے کر لیں کہ اتنی مدت تک ہمیں سوچنے کا اختیار ہوگا تو اُس مدت تک اختیار باقی رہے گا۔

سیدنا ابن عمر رضی اللہ عنہما راوی حدیث کے عمل سے معلوم ہوا کہ اس حدیث میں خیار سے مراد مجلس کی تبدیلی ہے نہ کہ تبدیل کلام بعض کہتے ہیں کہ خیار سے مراد سودا کرتے ہوئے کلام میں خیار ہے یعنی کہے کہ بھائی میں نہیں لیتا، یا سودا کر کے اگر دائیں بائیں کی باتیں شروع کر دے تو بیع پکی ہے اب واپس نہیں کر سکتا جبکہ دلائل کا تقاضا ہے کہ جب تک مجلس تبدیل نہیں ہوتی بائع اور مشتری کو بیع کے نفاذ یا فسخ کا اختیار ہے۔

اگر کہیں خیار ختم ہے بیع پکی ہے تو اس صورت میں چونکہ انہوں نے خود خیار ختم کیا تو بیع پکی متصور ہوگی اگر کہیں دس دن قابلِ واپسی کا اختیار ہے تو جیسا انہوں نے طے کیا وہی ہوگا۔

➊ لین دین میں اختلاف کا ہو جانا عین ممکن ہے۔ اگر بائع اور مشتری میں اختلاف واقع ہو جائے تو ایسی صورت میں بائع کے قول کو معتبر مانا جائے گا اور مشتری کو بیع نافذ کرنے یا فسخ کرنے کا اختیار ہوگا۔
➋ سیدنا اشعث رضی اللہ عنہ نے سیدنا عبد اللہ بن مسعود رضی اللہ عنہ سے بیس ہزار میں کچھ غلام خریدے جو کہ خمس کے تھے سیدنا ابن مسعود رضی اللہ عنہ نے قیمت لینے کے لیے آدمی بھیجا تو انہوں نے کہا میں نے انہیں دس ہزار میں لیا ہے، سیدنا اشعث رضی اللہ عنہ نے کہا آپ خود ہی میرے اور اپنے درمیان فیصلہ کر دیں تو سیدنا عبداللہ بن مسعود رضی اللہ عنہ نے مذکورہ بالا حدیث سنائی۔ [سنن ابي داود: 3511]

➊ ایک آدمی نے قرض دینا ہے لیکن استطاعت نہیں رکھتا کوئی تیسرا آدمی کہتا ہے کہ میں اداء کر دوں گا تو قرض خواہ کو یہ بات تسلیم کر لینی چاہیے، یا قرض خواہ کو مقروض کسی تیسرے آدمی کی طرف بھیجتا ہے کہ اُس سے وصولی کر لیں تو آدمی کو اس سے رابطہ کرنا چاہیے تاکہ اپنا حق جلد وصول کر لے اگر تیسرا آدمی انکار کرتا ہے تو پہلے آدمی سے ہی وصول کرے گا۔
➋ مالدار کا ٹال مٹول ظلم ہے جیسے ایک آدمی قرض لیتا ہے پھر واپس کرنے کی استطاعت بھی رکھتا ہے اس کے باوجود ٹال مٹول کرتا ہے تو یہ ظلم ہے اگر نادار بندہ ہے تو اس کا ٹال مٹول ظلم نہیں اسے مہلت دینی چاہیے اور نرمی برتنی چاہیے۔
➌ رسول اللہ صلی اللہ علیہ وسلم کا ارشاد گرامی ہے کہ جو قرض ادائیگی کی نیت سے لیتا ہے اللہ اس کی مدد کرتے ہیں۔ یعنی اللہ تعالیٰ اسے توفیق دیتا ہے یا مالی حالت بہتر کر دیتا ہے اللہ کی مدد سے قرض واپس ہو جاتا ہے۔ [سنن نسائی، رقم الحدیث: 4687]
اس کا ایک مطلب یہ ہے کہ جو قرض اس نیت سے لیتا ہے کہ واپس نہیں کرے گا اللہ اسے قرض کی واپسی کی توفیق بھی نہیں دیتا نہ اس کی مدد کی جاتی ہے حتی کہ یہی قرض اس کو جہنم میں لے جائے گا۔ «العياذ بالله»
➍ قرض کا معاملہ بہت سخت ہے رسول اللہ صلی اللہ علیہ وسلم نے ارشاد فرمایا: اس ذات کی قسم جس کے ہاتھ میں میری جان ہے اگر ایک بندہ اللہ کے راستہ میں شہید کر دیا جائے پھر زندہ ہو پھر شہید پھر زندہ پھر شہید ہو جائے اور اس کے ذمے قرض واجب الاداء ہو تو (تین دفعہ شہادت کا مقام پانے والا) جنت میں داخل نہیں ہوگا جب تک کہ اس کی طرف سے قرض ادا نہ کر دیا جائے۔ [سنن نسائی، رقم الحدیث: 4684]
عام شہید شہادت کے ساتھ ہی جنت میں بغیر حساب پہنچ جاتا ہے لیکن قرض اسے بھی معاف نہیں جنت میں جانے میں قرض رکاوٹ ہے۔
➎ میت کے مال کو تقسیم کرنے سے قبل اس کی وصیت کو پورا کرنا اور اس کے ذمہ قرض کی ادائیگی لازم ہے پھر وراثت تقسیم ہوگی۔ [النساء: 12]
➏ رسول اللہ صلی اللہ علیہ وسلم مقروض کا جنازہ نہ پڑھاتے تھے ایک میت پر تین دینار قرض تھا آپ صلی اللہ علیہ وسلم نے فرمایا: «صلوا على صاحبكم» تم اپنے ساتھی کا جنازہ پڑھ لو۔ [صحیح بخاری، رقم الحدیث: 2289]
یہ بظاہر معمولی سی رقم ہے لیکن اس کے باوجود رسول اللہ صلی اللہ علیہ وسلم نے جنازہ پڑھانے سے انکار کر دیا، جب رقم کی ادائیگی کا ذمہ لیا گیا تو آپ صلی اللہ علیہ وسلم نے نماز جنازہ پڑھائی۔

➊ قرض واپس کرتے ہوئے اگر احسان کرتے ہوئے خود زیادہ یا عمدہ واپس کر دیا جائے تو جائز ہے جبکہ ابتداء میں اضافہ کی شرط لگانا اسی طرح قرض خواہ کا زیادہ مطالبہ کرنا سود ہے۔
➋ اس حدیث سے معلوم ہوا کہ قرض کی ادائیگی میں وکیل مقرر کرنا درست ہے۔
➌ جانور قرض لیا جا سکتا ہے اگر ہو بہو جانور لوٹانا ممکن ہو تو بہتر جانور واپس کرنا چاہیے۔
➍ جانور کا قرض ادھار درست ہے لیکن جانور کی بیع جانور کے ساتھ ہو تو ادھار حرام ہے رسول اللہ صلی اللہ علیہ وسلم نے حیوان کے بدلے حیوان کی ادھار بیع سے منع فرمایا۔ [سنن ابی داؤد، رقم الحدیث: 3356]
➎ حیوان کی بیع حیوان کے ساتھ نقد ہو تو کمی و بیشی درست ہے ایک بکری کے عوض دو چھوٹی بکریاں لینا جائز ہے۔ اس طرح بیع اور قرض کے حکم میں فرق ہے، عام طور پر گاؤں میں آلو، ماچس یا کوئی بھی گھریلو چیز ختم ہو جائے تو عورتیں پڑوس سے ادھار مانگ لاتی ہیں کہ جب ہم لائیں گے واپس کر دیں گے اور واپسی ظاہر ہے کمی پیشی کے ساتھ کرتی ہیں تو اگر یہ بیع ہوتی تو ادھار پر بیع حرام ہوتی کیونکہ جنس ایک ہے لیکن قرض تھا تو بوجہ ضرورت جائز ہے۔ تجارت میں ادھار صرف اس صورت منع ہے جب عوض میں وہی جنس دینی ہے اگر روپے واپس کرنے ہیں تو پھر ادھار تجارت بھی جائز ہے۔ رسول اللہ صلی اللہ علیہ وسلم نے ایک غلام دو کالے غلاموں کے بدلے خریدا۔ [صحیح مسلم، رقم الحدیث: 1602]
➏ تمام حیوانات کا یہی حکم ہے جبکہ غلہ، اشیاء خوردنی اور سونے چاندی میں کمی و بیشی سے منع کیا، لیکن نقد بنقد کی دونوں میں شرط ہے، نقد بنقد کی صرف اس وقت شرط نہیں جب خریدار اشیاء کے بدلے کرنسی ادا کرے۔

➊ مال کے متعلقہ منڈی میں پہنچنے سے پہلے اس کو خریدنا درست نہیں۔ کیونکہ ایک تو باہر سے آنے والے کو بازار کا بھاؤ پتہ نہیں ہوتا اس سے سستے دام خرید کر اس کا نقصان کرنا نامناسب ہے۔ دوسرا اس حرکت سے مہنگائی بڑھ جاتی ہے ذخیرہ اندوزی اور منڈی پر اجارہ داری بھی پروان چڑھتی ہے۔ باہر سے آنے والا بسا اوقات جاتے ہوئے عوام کو سستا سامان فروخت کر جاتا ہے جس سے غریب بھی استفادہ کرتے ہیں۔
➋ اسلام نہیں چاہتا کہ تاجر مسلمانوں کی منڈیوں سے واپس جائیں تو دلوں میں حسرت بغض اور نفرت لے کر جائیں اسلام ہر ایک کو معاشی آزادی دیتا ہے چاہے کافر ہو۔ اگر مسلمان حکمران ان سنہری اسلامی اصولوں پر عمل پیرا ہوں تو مہنگائی کو کنٹرول کر سکتے ہیں معیشت کے ڈوبتے بیڑے کا واحد سہارا اسلامی اصول تجارت ہی ہے۔

اگر کوئی آدمی منڈی میں مال پہنچنے سے پیشتر سودا کر لے تو بائع کو سودا فسخ کرنے کا اختیار ہے۔ سیدنا ابو ہریرہ رضی اللہ عنہ بیان کرتے ہیں رسول اللہ صلی اللہ علیہ وسلم نے فرمایا: «لا تلقوا الجلب فمن تلقى فاشترى منه فاذا اتى سيده السوق فهو بالخيار» باہر سے شہر غلہ لانے والوں کو آگے جا کر نہ ملو اور جو کوئی آگے جا کر ملاقات کر کے مال خرید لے اور مال کا مالک بعد میں منڈی میں آئے تو اسے سودا فسخ کرنے کا اختیار ہے۔ [صحيح مسلم: 1519]

➊ خرید و فروخت اور تجارت انسانی زندگی کی بنیادی ضروریات میں سے ہے۔ اس لیے شریعت اسلامیہ نے اس سے متعلق ایسے اصول وضوابط وضع کیے ہیں جن کو اپنا کر اس نظام کو ظلم و جور سے پاک منفعت بخش بنایا جاسکتا ہے۔
➋ تجارتی اصولوں میں سے ایک اہم اصول اس حدیث میں بیان ہوا ہے کہ بیع پر بیع جائز نہیں۔
➌ امام ابو داؤد رحمہ اللہ فرماتے ہیں: امام سفیان رحمہ اللہ نے کہا: بیع پر بیع نہ کرنے کا مطلب یہ ہے کہ کوئی تیسرا آدمی سودا کے وقت آ کر کہے کہ میرے پاس اس سے بہتر مال موجود ہے۔ [سنن ابی داؤد، رقم الحدیث: 3437]
➍ ایسی حرکات سے اجتناب لازم ہے جن سے دوسروں کی حق تلفی ہو یا فتنہ و فساد کا خدشہ ہو۔

➊ نجش: کسی کو دھوکا دینے کے لیے جو چیز بکتی ہے اس کی تعریف کرنا، دھوکا دینے کی نیت سے نرخ بڑھانا تاکہ دوسرا شخص اس کو جلد خریدے یا کسی بکتی چیز کی برائی کرنا تاکہ خریدار اس کو چھوڑ کر دوسری طرف جائے۔ [لغات الحدیث: 4/304، 305]
➋ ہمارے عرف میں بولی دے کر چیز فروخت کی جاتی ہے کہ 500 کی لے لو، اگر 500 پر کوئی آمادہ نہیں ہوتا تو 50 اور کم کر کے کہتا ہے 450 کی لے لو، یہ بولی جائز ہے کیونکہ اس میں کوئی دھوکا نہیں وہی حصہ لیتا ہے جس نے خریدنی ہوتی ہے، اگر اس کی بھی کوئی ایسی صورت ہے کہ غیر خریدار قیمت بڑھا رہا ہے تو پھر یہ بھی ناجائز ہو جائے گی۔
➌ حدیث میں مذکور صورت کو اس لیے ممنوع قرار دیا گیا کیونکہ بولی دینے والا جھوٹ بول کر محض دھوکا دہی کرتا ہے۔

➊ سیدنا عبد اللہ بن عباس رضی اللہ عنہما سے مذکورہ حدیث کی وضاحت طلب کی گئی تو انہوں نے فرمایا: «لا يكون له سمساراً» کہ کوئی شہری کسی دیہاتی کے لیے دلال نہ بنے۔ [صحیح بخاری، رقم الحدیث: 2158، صحیح مسلم، رقم الحدیث: 1521]
➋ امام نووی رحمہ اللہ فرماتے ہیں: ہمارے نزدیک اس سے مراد یہ ہے کہ ایک اجنبی آدمی دیہات سے یا دوسرے شہر سے ایسا سامان جس کی سبھی کو ضرورت ہے اس روز کے نرخ کے مطابق فروخت کرنے کے لیے لاتا ہے اور شہری اسے کہتا ہے اس کو میرے پاس چھوڑ دو تاکہ میں اسے بتدریج اعلیٰ نرخ پر بیچوں۔ [شرح مسلم: 164/10]
➌ شہری اور دیہاتی ہر ایک کو آزادانہ تجارت کا حق حاصل ہے۔
➍ لوگوں کے لین دین کے معاملات میں مداخلت جائز نہیں۔
➎ اس حدیث کے ذریعے ذخیرہ اندوزی، مصنوعی قلت پیدا کرنے کے رجحان کی بھی حوصلہ شکنی کی گئی ہے۔
➏ لوگوں کو ایک دوسرے سے رزق ملتا ہے لہذا تجارت آزاد رہنی چاہیے تاکہ اشیائے ضرورت ہر بندے تک آسانی سے پہنچتی رہیں۔

➊ بیع المصراۃ یا حدیث المصراۃ کے نام سے یہ حدیث مشہور ہے، اس حدیث میں دلیل ہے کہ عیب دار چیز بسبب عیب جو بائع نے مخفی رکھا ظاہر ہونے پر سودا منسوخ ہوگا۔
➋ جانوروں کا دودھ روکنے کا مقصد گاہک کو دھوکا دینا ہے کہ جانور بہت دودھ دینے والا ہے اسی حساب سے قیمت لگاتا ہے خریدار خریدنے کے بعد تین دن جانور چیک کر سکتا ہے دودھ آزما سکتا ہے اگر پسند ہے تو روک لے اگر پسند نہ آئے تو واپس کرے اور ساتھ ایک صاع کھجور یا جو بھی مواد غذائیہ ہو دے تاکہ جانور سے استفادے کا ازالہ ہو سکے اور مسلمانوں میں صلہ رحمی قائم رہے۔
➌ بعض الناس کا اس حدیث کو خود ساختہ فقہی اصولوں کے خلاف قرار دیتے ہوئے اس حدیث پر عمل نہ کرنا یا اسے منسوخ قرار دینا درست نہیں۔
خود بدلتے نہیں قرآن کو بدل دیتے ہیں
ہوئے کس درجہ فقیہانِ حرم بے توفیق
➍ حدیث کے راوی سیدنا ابوہریرہ رضی اللہ عنہ کو غیر فقیہ قرار دینا اور یہ کہنا کہ اگر کوئی غیر فقیہ راوی قیاس کے خلاف حدیث بیان کرے تو اس کو قبول نہیں کیا جائے گا سراسر نا انصافی اور ظلم ہے۔

➊ ایک روایت کی تفصیل یہ ہے کہ جس شخص نے ایسا جانور خریدا اسے تین دن تک اختیار رہتا ہے۔ کیونکہ اتنے دنوں میں اصل دودھ کا پتہ چل جاتا ہے اور دھوکا واضح ہو جاتا ہے۔
➋ گندم چونکہ عرب میں مہنگی اور کھجور سستی تھی اس لیے مہنگی کی قید نہیں لگائی جبکہ ہمارے ہاں کھجور مہنگی گندم سستی ہے گندم یا چاول اگر عام خوراک ہے تو وہ دی جائے گی۔
➌ امام ابو یوسف رحمہ اللہ کی رائے میں گندم کے صاع کی قیمت بھی دی جا سکتی ہے۔
➍ ایک صاع غلہ ساتھ دینا اخلاقی بنیاد پر ہے بائع ناراضگی محسوس نہ کرے تحفہ دلوں کو نرم کرتا ہے محبت بڑھاتا ہے اور تجارت کو منقطع نہیں کرتا۔
➎ جو لوگ صاع کا متبادل تلاش کرنے میں پڑ گئے ہیں کہ یہ پہلے دن کے دودھ کا عوض ہے۔ دودھ زیادہ تھا یا کم یہ سعی لا حاصل ہے ظاہر ہے جب جانور خریدا قیمت دی تو دودھ بھی تو ساتھ ہی خریدا تھا پھر چارہ وغیرہ بھی تو ڈالا ساتھ لے جانے واپس لانے میں بھی تو مشقت اٹھائی اور بسا اوقات گاڑی کا کرایہ بھی برداشت کیا منڈی کی رسید بھی خریدی شریعت کے احکام مستقل اور تا قیامت ہیں اس لیے محض عقلی گھوڑے دوڑانا اور راوی حدیث پر جرح شروع کر دینا کم عقلی کے سوا کچھ نہیں۔

دودھ روکنے سے منع کیا گیا ہے دھوکا حرام ہے اور اس سے جانور کو بھی تکلیف ہوتی ہے جو حرام ہے، ایسے سودے میں برکت اٹھ جاتی ہے جو مبنی بر دھوکا ہو۔

➊ حبان بن منقذ رضی اللہ عنہ کو غزوہ احد میں سر پر پتھر لگا جس سے سوجھ بوجھ میں کچھ خلل آگیا ان کے گھر والے رسول اللہ صلی اللہ علیہ وسلم کے پاس آئے کہ ان کو تجارتی معاملات سے روکیں اکثر دھوکا کھا جاتے ہیں لیکن انہوں نے عرض کی میں سودا بازی سے باز نہیں رہ سکتا چاہے کوشش بھی کروں تو رسول اللہ صلی اللہ علیہ وسلم نے فرمایا: خریدتے وقت شرط لگا آیا کر کہ دھوکا ہوا تو مال واپس کروں گا۔ اور ساتھ تین دن کی مدت مقرر کر دی۔ [سنن ابن ماجہ، رقم الحدیث: 2355]
➋ اس سے ثابت ہوتا ہے کہ حاکم سوق کسی سیدھے سادھے آدمی کے بارے اعلان کر سکتا ہے کہ اس سے اکثر دھوکا ہوتا ہے لہذا اس کا خرید کردہ مال تین دن تک قابلِ واپسی ہوگا لہذا فروخت کرنے والا دیکھ لے کہ کس کو فروخت کر رہا ہے۔
➌ واضح غبن کی واپسی ہوگی۔
➍ کم عقل انسان کے لیے بعض شرعی احکامات میں رخصت اور استثنا موجود ہے۔
➎ «لا خلابة» کے الفاظ سے بیع میں اختیار باقی رہتا تھا۔
➏ جس قدر اسلام حقوق انسانیت کا محافظ و نگہبان ہے دنیا کا کوئی اور دین و مذہب نہیں۔

➊ سیدنا سمرہ رضی اللہ عنہ بھی صحابی ہیں جو کہ سیدنا عمر رضی اللہ عنہ کے گورنر تھے ذمیوں سے ٹیکس اکٹھا کرتے تھے کہا جاتا ہے کہ ایک ذمی نے بطور ٹیکس شراب دی تو انہوں نے دوسرے ذمی کو دے کر قیمت وصول کر لی کیونکہ انہیں مسئلے کا پتہ نہ تھا کہ جو چیز استعمال میں نہ لائی جاتی ہو اس کا فروخت کرنا بھی منع ہے۔ [بخاري: 2223]
➋ امام خطابی رحمہ اللہ کا موقف ہے کہ سیدنا سمرہ رضی اللہ عنہ نے شراب کا سرکہ بنا کر فروخت کیا جبکہ سیدنا عمر رضی اللہ عنہ سرکہ کو بھی حرام سمجھتے تھے۔
➌ صحابہ میں سمرہ نام کے دو صحابی ہیں ایک سمرہ بن جنادہ رضی اللہ عنہ اور دوسرے سمرہ بن جندب رضی اللہ عنہ جن کا ذکر اس حدیث میں ہے۔
➍ اس سے ثابت ہوا حیلہ بازی سے حرام حلال نہیں ہو جاتا یہود پر چربی حرام تھی انہوں نے پگھلا کر اس کا نام "ودک" رکھ کر فروخت کرنا شروع کر دی حیلہ بازی کے باعث ان پر لعنت کی گئی۔ علامات قیامت میں سے ہے کہ اشیاء کے نام بدل کر حلال سمجھیں گے حالانکہ حیلہ بازی سے جرم کی نوعیت مزید سنگین ہو جاتی ہے۔
➎ مسلمان کے لیے جائز نہیں کہ خشخاش یا ہیروئن کاشت کرے کہ غیر مسلم کو فروخت کروں گا۔ کوفیوں کے حیلے کہ زکاۃ پر سال پورا ہونے لگے بیوی کو مال گفٹ کر دے زکاۃ کا ماہ گزر جائے بیوی واپس کر دے زکاۃ سے بچ جائیں گے یہ اور اس طرح کے سب امور حرام اور بنی اسرائیل کی روش ہے اللہ رب العزت ہمیں محفوظ رکھے۔
➏ شراب سے متعلق ہر قسم کا کاروبار مسلمان پر حرام ہے شراب کے پرمٹ لائسنس کے اجراء کی فیس سب حرام ہیں۔
➐ سیدنا عمر رضی اللہ عنہ کے قول «قاتل الله» سے مراد لعنت کرنا نہیں بلکہ اظہار غضب ہے کہ سیدنا سمرہ رضی اللہ عنہ فہیم آدمی اس معاملے میں لاعلم ہے۔
➑ بڑے چھوٹوں کی غلطیوں پر سخت الفاظ سے تنبیہ کر سکتے ہیں۔

➊ رسول اللہ صلی اللہ علیہ وسلم نے مردار، شراب، سور، بتوں کی خرید و فروخت سے منع فرمایا تو صحابہ رضی اللہ عنہم نے مردار کی چربی سے استفادہ کرنے کا دریافت کیا کہ ہم کشتیوں پر ملتے ہیں، کھالوں پر تیل ملتے اور چراغ جلاتے ہیں، آپ صلی اللہ علیہ وسلم نے فرمایا: نہیں وہ حرام ہیں۔ [صحیح بخاری، رقم الحدیث: 2236]
اس پر آپ صلی اللہ علیہ وسلم نے یہود کا مذکورہ واقعہ بیان فرمایا۔
➋ اس سے معلوم ہوا کہ کسی چیز کی ہیئت اور نام کی تبدیلی سے حکم تبدیل نہیں ہوتا۔
➌ دور حاضر میں سود اور جوئے کے مختلف نام رکھ کر جواز کے فتاوی دینا سراسر جہالت ہے پرائس بانڈ، جوبلی اسٹیٹ لائف، تکافل سب سود اور جوئے کی مختلف شکلیں ہیں، نام کی تبدیلی سے حکم تبدیل نہیں ہوسکتا۔ بینک کا نام اسلامی بینک یا مسلم کمرشل بینک رکھ لینے سے وہ مسلمان نہیں ہو جاتے جب تک ان کو سود سے خلاصی نہ ملے۔
بدلنا ہے اگر تو رندوں سے کہو کہ اپنا چلن بدلیں
فقط ساقی بدل جانے سے مے خانہ نہ بدلے گا

➊ ایک روایت میں ہے اس آدمی نے عرض کی کہ غلے پر بارش پڑ گئی تھی جس پر آنحضرت صلی اللہ علیہ وسلم نے فرمایا: تو نے بھیگے ہوئے غلے کو اوپر کیوں نہ کیا تاکہ لوگ اس کا مشاہدہ کر لیتے۔ [صحیح مسلم، رقم الحدیث: 102]
➋ بیع میں دھوکے کی مختلف صورتیں ہیں عیب چھپا لینا، ردی مال کی ملاوٹ کر لینا، گھٹیا مال پیکنگ میں اس طرح بند کرنا کہ عیب عیاں نہ ہو یا کھول کر چیک نہ کیا جا سکتا ہو ایسا کاروبار حرام اور ناجائز ہے۔
➌ «ليس منا من غشنا» سے مقصد وعید شدید ہے یعنی کبیرہ گناہ ہے، ان الفاظ سے نہ تو دائرہ اسلام سے خارج متصور کرنا چاہیے اور نہ ہی ان الفاظ کی ایسی نرم تاویل پیش کرنی چاہیے کہ الفاظ کی شدت ختم ہو جائے بلکہ جیسے الفاظ وارد ہوئے ہیں ایسے ہی استعمال کرنے چاہئیں۔