السنن المأثورة

➊ خرید و فروخت اور تجارت کسب معاش کا بہترین ذریعہ ہے، دین اسلام نے صادق و امین اور جائز ذرائع اختیار کر کے تجارت کرنے والوں کی حوصلہ افزائی فرمائی اور ان کے لیے اخروی نوید سنائی ہے۔
➋ ہمارے پیارے پیغمبر صلی اللہ علیہ وسلم نے بھی تجارت کے پیشہ کو اختیار کیا اور آپ صلی اللہ علیہ وسلم کے صحابہ رضی اللہ عنہم کی کثیر تعداد، خاص طور پر مہاجرین صحابہ رضی اللہ عنہم اسی پیشہ تجارت سے وابستہ تھے۔
➌ عہد نبوی میں غلاموں کی تجارت ہوتی تھی اور ان کو مالِ تجارت شمار کیا جاتا تھا، اس لیے شریعت میں ان سے متعلق ہدایات دی گئیں۔
➍ چونکہ غلام کسی چیز کا مالک نہیں ہوتا، اس کا مال حقیقت میں اس کے مالک کا ہی ہوتا ہے، اس لیے رسول اللہ صلی اللہ علیہ وسلم نے اس امر کی وضاحت فرمائی۔

➊ کھجور کا کھانا اور اس کی خرید و فروخت کرنا جائز ہے۔
➋ درختوں کی پیوند کاری کرنا جائز اور درست ہے۔
➌ بائع اور مشتری سامانِ تجارت سے متعلق شروط رکھ سکتے ہیں۔
➍ شرائط کے ساتھ منسلک تجارت جائز ہے البتہ اس امر کا خیال رہے کہ شروط خلافِ شرع نہ ہوں۔ رسول اللہ صلی اللہ علیہ وسلم نے فرمایا: «من اشترط شرطاً ليس فى كتاب الله فهو باطل و ان اشترط مائة شرط» [صحیح بخاری: 2155]
جس نے خلافِ شرع شرط لگائی وہ باطل ہے اگرچہ سو شرائط ہوں۔

➊ شریعت اسلامیہ کی یہ خصوصیت ہے کہ اس نے تجارت کے اصول وضوابط متعین کیے ہیں ہر وہ بیع جس میں دھوکا فریب یا خیانت یا فریق واحد کا سراسر نقصان ہو تو شریعت نے اس سے منع کیا ہے۔
➋ سوق تمر میں ٹھیکیدار آج بھی مالکان سے پھل درختوں پر ہی خرید لیتے ہیں خود اتار کر اپنی دکانوں پر جیسے جیسے ضرورت پڑتی ہے لاتے رہتے ہیں شریعت نے اصول دیا کہ جب تک پھل سرخی مائل نہ ہو جائے یعنی اس بات کا یقین نہ ہو جائے کہ ابھی آفت سے پھل بچ گیا ہے فروخت نہ کرے کیونکہ اگر کچا فروخت کر دیا جائے تو اس سے خدشہ ہے کہ بیماری یا کیڑا کی وجہ سے اور بسا اوقات پھل کچے ہی گرنا شروع ہو جاتے ہیں تو اس سے خریدار کو سراسر نقصان تھا جب پھل سُرخ ہو جائے تو پھر آندھی وغیرہ سے گر بھی جائے تو کسی حد تک قابل استعمال ہوسکتا ہے۔
➌ جب ثریا ستارہ طلوع ہو جاتا ہے اس وقت عموماً پھل آب و ہوا کی بیماریوں سے محفوظ ہو جاتا ہے موسم معتدل ہو جاتا ہے اس میں ستارے کا کوئی کمال یا تاثیر نہیں اور نہ اسلام اس طرح کی تاثیر کا قائل ہے مقصود وقت بتانا ہے پرانے وقتوں میں اوقات کار سائے کی لمبائی، ستاروں کے جھرمٹ، اور طلوع، غروب سے ہی متعین کیے جاتے تھے، رات کے مسافر بھی ستاروں کو دیکھ کر ٹائم کا اندازہ لگاتے تھے میرے والد صاحب ہمیں بچپن میں بتایا کرتے تھے کہ یہ ستاروں کا جھرمٹ جب وہاں پہنچے گا تو سحری ہو جائے گی وغیرہ وغیرہ۔
➍ پھل پکنے سے پہلے فروخت کرنا منع ہے تو ضرورت کے پیش نظر اجازت بخشی گئی، یہ اجازت تجارت کی غرض سے نہیں محض کھانے کے لیے ہے۔
➎ "عریہ" یہ ہے کہ ایک آدمی کے پاس اپنا درخت یا باغ نہیں اس کے بچے رطب کھجور کھانا چاہتے ہیں تو وہ آدمی کسی کو خشک کھجور دے کر اس کے بدلے رطب لے لے تو پانچ وسق تک یہ جائز ہے۔ اس سے زیادہ تجارت بن جاتی ہے لہذا پانچ وسق تک تازہ کھجور کھانے کا شوق پورا کیا جاسکتا ہے۔
➏ تجارت کے لیے آدمی خشک کھجور کے بدلے تازہ رطب کھجور نہیں لے سکتا ہے بلکہ خشک علیحدہ فروخت کرے گا جو پیسے ملیں گے اُن سے علیحدہ رطب کا سودا کرے گا ایسے ہی اعلیٰ ایک کلو کھجور ردی دو کلو کے بدلے لینا جائز نہیں ان کو علیحدہ علیحدہ فروخت کرے گا۔
➐ کئی سالوں کے لیے درخت کا پھل فروخت کرنے میں دھوکا تھا اور اس بات کے قوی امکان تھے کہ آئندہ سالوں میں درخت جل جائیں، کیڑا لگ جائے یا کوئی اور خرابی واقع ہو جائے۔
➑ ایسے ہی ہر دھوکے کی تجارت جیسے پانی میں موجود مچھلی، آسمان پر اڑتا کبوتر، بھیڑ کی پیٹھ پر اون، تھن میں دودھ، پیٹ میں بچہ، دودھ میں گھی یہ سب مجہول اشیاء ہیں جن کو فروخت کرنا حرام و ناجائز ہے کیونکہ اس میں دھوکے کا امکان ہے۔
➒ آفت میں قیمت کا ساقط ہونا یہ اس وقت کی بات ہے جب پھل پکنے سے قبل فروخت کرنا منع نہ کیا گیا تھا جو پہلے سودے ہو چکے تھے اور آفات آگئی ان کی قیمت ساقط کر کے تلافی کی گئی اب چونکہ پکنے سے پہلے سیل کرنا منع ہے اگر بعد میں سیل کرتا ہے پھر آفت آ جاتی ہے تو از راہ کرم مالک کو کچھ معاف کر دینا چاہیے اور اس آدمی پر مخیر حضرات صدقہ کریں کہ نقصان پورا ہو جائے کیونکہ تمام مسلم جسد واحد کی طرح ہیں ایک کو تکالیف پہنچتی ہے تو سارے بے چین ہو جاتے ہیں۔
➓ یہ ضابطہ پھلوں کے بارے میں ہے اگر گاڑی خریدی ایکسیڈنٹ ہو گیا تو فروخت کرنے والا ذمہ دار نہیں اور نہ تلافی کرنے کا پابند ہے۔ البتہ از راہ کرم کچھ رقم معاف کر دے تو اس کی نیکی ہے۔

➊ سلت ایک دانے کا نام ہے جو گندم کے دانے سے چھوٹا اور جو سے بڑا ہوتا ہے لیکن اس پر جو کے دانے کی طرح چھلکا نہیں ہوتا تاثیر کے اعتبار سے جو کی طرح ٹھنڈا ہوتا ہے۔
➋ ایک ہی جنس کی دو چیزیں وزن کی کمی بیشی کے ساتھ فروخت کرنا ممنوع ہیں۔ [مزید دیکھئے شرح حدیث نمبر 203، 209، 210]

➊ خیبر مدینہ سے شمال مشرق کی جانب واقع ہے مدینہ کے جلا وطن یہودی قبائل یہاں آباد ہوئے پھر اُن کی سازشوں کے باعث محرم 7ھ میں 1400 صحابہ رضی اللہ عنہم کے ہمراہ رسول اللہ صلی اللہ علیہ وسلم نے یہ علاقہ فتح کیا پھر نصف پیداوار پر انہوں نے صلح کی ہر سال رسول اللہ صلی اللہ علیہ وسلم کا تحصیلدار اپنا حصہ وصول کرنے جاتا جو آفیسر ریونیو کہلاتا ہے اس کا نام سیدنا سواد بن غزیہ رضی اللہ عنہ تھا۔
➋ اس حدیث سے معلوم ہوا کہ اشیاء خوردنی ہم جنس کا تبادلہ کمی و بیشی کے ساتھ درست نہیں گو قیمت کے اعتبار سے ایک مہنگی ہی کیوں نہ ہو کیونکہ یہ اشیاء خوردنی میں سود ہے لہذا ہر ایک کو علیحدہ علیحدہ بیچو جب جنس ایک ہو۔
➌ جب جنس ایک اور وزن برابر ہو مثلاً ایک کلو گندم کے بدلے ایک کلو ہی گندم لی جائے تو نقد جائز ہے۔
➍ اگر گندم کلو کے بدلے دو کلو کھجور دی جائے یعنی جنس مختلف ہو تو کمی و بیشی بھی جائز ہے لیکن یہ بھی سودا نقد ہونا ضروری ہے ادھار ناجائز ہے۔ یعنی گندم آج لے لے اور کھجور کل دے دینا یہ ناجائز ہے۔ «يدا بيد» کی شرط ہے نقد و نقد۔ اس کی مزید وضاحت حدیث نمبر 209 اور 210 میں آئے گی۔

➊ بظاہر لگتا ہے کہ بیضاء سلت کی ہی ہم جنس یا اسی کی اعلی قسم ہے اس لیے سیدنا سعد رضی اللہ عنہ نے اس سے منع کر دیا۔

➊ محاقلہ اور مزابنہ کی بیوع منع ہیں البتہ بیع عرایا اس سے مستثنیٰ ہے جس کی ایک صورت اس طرح بھی ہوتی ہے کہ باغ والا ایک درخت غریب کو دے دیتا ہے کہ اس کا پھل تم لے لو درخت مالک کا ہی رہتا ہے تو غریب بار بار چکر لگائے گا کبھی پانی دینے کبھی کھجور اتارنے اس سے مالک کی ٹینشن میں اضافہ ہوگا اس مجبوری کو سامنے رکھ کر شریعت نے عرایا کی اجازت دی کہ وہ مالک سے خشک کھجور اس درخت پر لگے پھل کے عوض لے لے یہ بھی ایک عرایا کی شکل ہے۔ [مزید دیکھئے: شرح حدیث نمبر 199، 200]
➋ مزابنہ اور محاقلہ سے منع کرنے کی وجہ یہ ہے کہ اس میں ایک فریق کے نقصان کا احتمال ہے کہ ہو سکتا ہے پھل تھوڑا نکلے یا اس پر کوئی آفت آن پڑے پھر جھگڑا کھڑا ہو جائے تو شریعت ہر فراڈ، دھوکے اور ایسی بیوع جو امت مسلمہ میں حسد بغض، نفرت کدورت کا باعث بنتی ہوں یا اغلب گمان ہو اس سے منع کرتی ہے۔

➊اس بیع میں بھی کمی و بیشی کا احتمال ہے جب اشیاء ہم جنس ہوں تو کمی و بیشی کے ساتھ فروخت کرنا سود ہے۔ ایسی صورت میں برابر وزن اور نقد سودا کرنا جائز ہے۔

➊ زمین ٹھیکے پر دینا یا بٹائی پر دینے کو استکراء، کراء وغیرہ کہا جاتا ہے، اس کی دو صورتیں ہیں۔
(الف) ناجائز صورت: زمین ٹھیکے پر اس طرح دی جائے کہ اچھی پیداوار والی مالک اپنے لیے مخصوص کرے اور بنجر زمین مزارع کو دے دے یا فصل اگنے کے بعد اچھی فصل والا رقبہ مالک کہے میں لوں گا یہ صورت حرام ہے۔
(ب) جائز صورت یہ ہے کہ پیداوار جتنی بھی ہو اس کا نصف یا 1/3 یا جو بھی پرسنٹیج طے پائے یا پیسے لے کر زمین کرائے پر دے دینا یہ دونوں صورتیں جائز ہیں۔
➋ حنظلہ بن قیس رحمہ اللہ کہتے ہیں میں نے سیدنا رافع رضی اللہ عنہ سے زمین کرائے پر دینے کے بارے میں پوچھا انہوں نے فرمایا کہ رسول اللہ صلی اللہ علیہ وسلم نے زمین بٹائی پر دینے سے منع فرمایا میں نے کہا درہم و دینار یعنی بعوض پیسے بھی منع ہے؟ انہوں نے کہا نہیں آپ صلی اللہ علیہ وسلم نے صرف زمین کی پیداوار کے عوض دینے سے منع فرمایا تھا سونے چاندی کے عوض تو کوئی حرج نہیں۔ [سنن نسائي: 3900] اس ممانعت سے مراد خاص حصہ اپنے لیے مخصوص کر لینا ہے، اگر مالک جملہ پیداوار سے حصہ لیتا ہے تو منع نہیں بلکہ رسول اللہ صلی اللہ علیہ وسلم نے خود ارض خیبر یہودیوں کو کرائے پر دی سالانہ نصف پیداوار لیتے تھے۔[بخاری: 2328]
➌ اس لیے ممانعت سے مراد یہ ہے کہ پہلے ہی مخصوص غلہ لے کر ٹھیکہ پر دی جائے یا فصل میں سے اچھا حصہ مخصوص کر لینا منع ہے۔

➊ جب اشیاء خوردنی کا تبادلہ ہو رہا ہو تو نقد و نقد ہونا چاہیے اگر ایک ادھار ہو تو سود ہو گا۔ یہ لمبی حدیث کا ایک ٹکڑا ذکر ہوا ہے۔ اس کی وضاحت پہلے گزر چکی ہے اور مزید وضاحت کے لیے دیکھئے حدیث نمبر 210۔

➊ اس حدیث میں خرید و فروخت کا سود بیان ہوا ہے۔ اصول یہ ہے کہ اشیاء خوردنی اگر بعوض اشیاء خوردنی ہوں تو دونوں طرف سے مال حاضر ہو، ایک ہاتھ لو اور دوسرے ہاتھ دو، ورنہ سود ہے اور اگر دونوں اشیاء ہم جنس ہیں تو وزن بھی برابر برابر اور نقد و نقد کی بھی شرط ہے ورنہ سود ہے اور اگر جنس مختلف ہے ایک طرف گندم جبکہ دوسری طرف جو ہے تو وزن کم زیادہ ہو سکتا ہے لیکن نقد و نقد کی اس میں بھی شرط ہے ورنہ سود ہے۔
➋ اگر پیسوں کے عوض خریدنا ہے تو ادھار بھی جائز ہے۔

➊ ہم جنس اشیاء کا تبادلہ وزن کی کمی و بیشی اور ادھار کے ساتھ جائز نہیں، دینار اگر ایک ہے، نیا ہو یا پرانا وہ ایک ہی رہے گا کیونکہ مارکیٹ ویلیو میں ایک دینار کے ہی برابر ہے۔
➋ اس حدیث کی روشنی میں یہ بات بھی معلوم ہوئی کہ نئے نوٹ کو پرانے نوٹ زیادہ دے کر خریدنا قطعاً حرام اور سود ہے۔

➊ عہد نبوی صلی اللہ علیہ وسلم میں مختلف درہم و دینار رائج تھے لیکن ہر درہم دوسرے درہم کے برابر ہی سمجھا جاتا تھا۔ لہذا ایک ہی جنس کی کرنسی کا باہمی تبادلہ برابری کی بنیاد پر تو درست ہے لیکن کمی و بیشی سے جائز نہیں ہے۔

➊ دینار سونے سے بنایا جاتا تھا اور درہم چاندی سے، جو حکم سونے کا ہوتا وہی دینار کا اور جو حکم چاندی کا وہی درہم کا تھا۔
➋ موجودہ زمانے میں کاغذی روپیہ چاندی اور سونے کا متبادل ہے اس لیے زیور خریدتے ہوئے مارکیٹ ویلیو سے زیادہ کاغذی روپیہ نہ دیا جائے، مزدوری علیحدہ طے کی جانی چاہیے۔ یعنی بنوائی کی اجرت علیحدہ طے ہونی چاہیے۔ زیورات سے سونے کی صورت میں کٹوتی درست نہیں۔ واللہ اعلم۔
➌ اس طرح سونا اور چاندی کی جیولری کا لین دین کرتے وقت ادھار لین دین کرنا اور کمی و بیشی بھی جائز نہیں ہے۔

➊ سونے چاندی کا برتن کھانے پینے کے استعمال میں لانا منع ہے، کسی دوسرے مقصد کے لیے، تجارت، زینت نمائش کے لیے استعمال ہو سکتا ہے۔ سیدنا حذیفہ بن یمان رضی اللہ عنہ نے بیان کیا کہ ہمیں رسول اللہ صلی اللہ علیہ وسلم نے سونے اور چاندی کے برتنوں میں کھانے پینے سے منع کیا۔ [بخاري: 5837]
➋ اس حدیث میں بھی اجرت کا معاملہ زیر بحث آیا کہ سیدنا معاویہ رضی اللہ عنہ نے اس میں کوئی حرج نہیں جانی کہ محنت تو ہوئی ہے جس پر سیدنا ابو درداء رضی اللہ عنہ نے اعتراض اٹھایا۔ اس کا حل یہ ہے کہ سونے کی چیزیں خریدنے کے لیے عوض میں چاندی دے دی جائے پھر اگر اندر اجرت بھی شامل ہو جائے تو چونکہ جنس مختلف ہے تو کمی بیشی جائز ہے۔ اور چاندی کی چیزیں خریدے تو دینار سے خریدے کمی پیشی جائز ہے کیونکہ جنس مختلف ہے۔ یا دوسرا حل یہ ہے کہ اجرت علیحدہ سے طے کر لی جائے۔
➌ صحابہ کرام رضی اللہ عنهم میں بعض مسائل کی تفہیم میں فرق تھا اور اس طرح کا معمول اختلاف عیب نہیں ہے۔
➍ سیدنا عمر رضی اللہ عنہ خلیفہ راشد تھے اور کبار صحابہ کرام رضی اللہ عنهم کی رائے کا احترام کرتے تھے۔
➎ باہمی اختلاف کا حل سنت رسول صلی اللہ علیہ وسلم کی اتباع ہے۔

➊ اس میں برابری اور نقد کی شرط ہے کیونکہ جنس ایک ہے ورنہ سود ہو جائے گا۔

➊ ان اشیاء میں ہم وزن اور اسی مجلس میں ہی قبضہ شرط ہے وگرنہ سود ہو جاتا ہے کیونکہ کرنسی ریٹ یا مارکیٹ ریٹ روزانہ تبدیل ہوتا رہتا ہے شریعت متوقع سود سے بھی نفرت کرتی ہے کیونکہ سود رب تعالیٰ سے اعلانِ جنگ ہے۔

➊ جنس مختلف ہو جائے تو کمی و بیشی جائز ہے لیکن دونوں میں نقد ونقد کی شرط ہے۔
➋ سوال یہ ہے کہ اگر کلو کھجور دے کر کلو ہی لینی ہے تو کیا فائدہ ہے؟ ظاہر ہے کلو ردی کے بدلے تو اعلیٰ قسم کی کلو تو کوئی نہیں دے گا۔ تو بعض علماء نے لکھا ہے کہ اس سے ایک مقصد سادگی اور قناعت پسندی بھی ہے کہ لوگ ذائقے کی تلاش میں سرگرداں نہ رہیں جو پاس موجود ہے وہی کھاؤ اس سے مہنگائی بھی کنٹرول ہوتی ہے، اب یہ حکم صرف مذکورہ چھ اشیاء میں ہے یا باقی بھی اشیاء خوردنی میں ہے اس بارے میں امام مالک رحمہ اللہ کا کہنا ہے کہ ہر وہ چیز جو بطور خوراک استعمال ہوتی ہے اور ذخیرہ کی جاسکتی ہے اس کا یہی حکم ہے۔
➌ اہلِ فقہ ظاہریہ صرف ان چھ اشیاء میں یہ حکم تسلیم کرتے ہیں امام ابو حنیفہ رحمہ اللہ کے نزدیک ہر وہ چیز اس میں داخل ہے جو ناپی یا تولی جاتی ہے۔ امام شافعی رحمہ اللہ کہتے ہیں ناپی تولی کے ساتھ خوراک ہونی چاہیے۔
➍ راقم کے نزدیک موجودہ دور میں تو کاغذی کرنسی نے یہ اشکال دور کر دیے ہیں اگر کرنسی کی بجائے اشیاء کا تبادلہ کیا جائے تو ہر چیز کا یہی حکم ہوگا الا یہ ہے کہ نص نے کوئی چیز مستثنی کی ہو۔ کیونکہ حدیث نے سونے اور چاندی کے تبادلے میں بھی یہی شرط لگائی ہے جبکہ یہ دونوں خوراک نہیں اس لیے اس حکم کو محض خوراک اور ذخیرے سے مشروط کر دینا درست معلوم نہیں ہوتا (واللہ اعلم)۔

➊ چاندی کے بارے میں علیحدہ سے نصوص بھی موجود ہیں جیسا کہ پہلے یہ مسئلہ تفصیل سے گزر چکا ہے۔
➋ اس مسئلہ میں سیدنا ابو سعید خدری رضی اللہ عنہ نے نص یاد نہ ہونے پر قیاس کیا۔
➌ اس حدیث میں اس بات کا بھی ذکر ہے کہ مسئلہ عالم سے دلیل کے ساتھ دریافت کرنا چاہیے۔ اور دلیل کا تقاضا کرنا ہر فرد کا حق ہے۔ دلیل کے مطالبے پر سیخ پا ہو جانا انتہائی نامناسب عمل ہے جیسا کہ پیر وطریقت کے سلسلوں سے وابستگی رکھنے والوں میں یہ معاملہ عام موجود ہے۔

➊ سیدنا معاویہ رضی اللہ عنہ کا انکار کرنا اس لیے تھا کہ انہیں مسئلہ کا پتہ نہ تھا بعض مجوسی النسل اس سے نعوذ باللہ سیدنا معاویہ رضی اللہ عنہ پر طعن کرتے ہیں۔ حالانکہ تاریخ شاہد ہے کہ رافضیوں نے نہ کبھی اسلام کی خاطر تیر چلایا نہ تلوار اور نہ ہی تا قیامت انہوں نے اسلام کی خدمت کرنی ہے بلکہ الٹا اسلام میں شک وشبہات پیدا کر رہے ہیں۔
➋ سیدنا معاویہ رضی اللہ عنہ کو سیدنا ابو درداء رضی اللہ عنہ کی شکایت پر عمر رضی اللہ عنہ نے لکھا تھا کہ یہ سود ہے جیسا کہ اس حدیث میں عبادہ رضی اللہ عنہ نے کہا تو وہ باز آگئے تھے۔ دیکھیے حدیث نمبر 217۔

➊ کھانے پینے کی اشیاء کو قبضے میں لینے سے قبل فروخت کر دینا جائز نہیں غلہ یا مال کو پورا وصول کر لینے اور قبضہ میں لینے کے بعد فروخت کرنے میں بے شمار حکمتیں ہیں جن میں سے چند درج ذیل ہیں: (الف) ماپ تول کے عمل سے گزرنے پر اس کا اصل وزن معلوم ہو جاتا ہے۔ نتیجتا خریدار دھوکے سے بچ جاتا ہے۔
(ب) مال کی کوالٹی اور معیار سامنے آجاتا ہے۔
(ج) مارکیٹ میں جمود نہیں رہتا۔
(د) سرمایہ دارانہ نظام کی حوصلہ شکنی ہوتی ہے اور سرمایہ گردش میں رہتا ہے۔
(س) مہنگائی کنٹرول ہوتی ہے اور ذخیرہ اندوزی کی حوصلہ شکنی ہوتی ہے۔
(ص) مال کے ایک جگہ سے دوسری جگہ منتقل ہونے سے مزدور کو مزدوری ملتی ہے۔
➋ موجودہ مارکیٹنگ اسی فیصد سود اور حرام بیوع پر مبنی ہے۔ الا ماشاء الله بڑے تاجر ایک ہی سٹور میں پڑی چیز کا سودے پر سودا کیے جاتے ہیں حالانکہ قبضہ میں لینے سے قبل فروخت کر دینا نا جائز وحرام ہے۔ کیونکہ اس میں بہت سی قباحتیں ہیں مبیع سامان تجارت کو نہ کوئی دیکھتا ہے اور نہ ماپ تول کرتا ہے تو گویا کہ یہ روپیہ روپے کے بدلے کمی و بیشی سے فروخت ہوا اور پھر اگر چیز خراب ہوئی تو اس کا نقصان آخری خریدار کو ہو گا۔
➌ امام شافعی رحمہ اللہ نے غیر غذائی اجناس میں قبضہ کی شرط لگائی ہے بیوع میں اگر بنظر عمیق دیکھا جائے تو اسلام محنت کا قائل ہے اس لیے وہ تمام بیوع جس پر بغیر محنت کے مال مل جائے جیسے انعامی سکیمیں، قرعہ انداز یاں، پرائیس بانڈز وغیرہ یہ سب جوا اور سود کے زمرے میں آتے ہیں۔
➍ سیدنا عبداللہ بن عباس رضی اللہ عنہ سے غلہ کو پوری طرح قبضہ میں لینے سے قبل فروخت کرنے کی ممانعت سے متعلق دریافت کیا گیا کہ ایسا کیوں ہے؟ تو انہوں نے فرمایا: (اگر ایسا نہ ہو) تو یہ تو درہموں کا درہموں کے بدلے بیچنا ہوا جبکہ غلہ تو میعاد آنے پر ہی دیا جائے گا۔ [بخاري: 3132]
اس کی صورت یہ ہے کہ ایک آدمی گندم کی ایک بوری دس ہزار کے عوض خرید لے اور گندم ایک ماہ بعد لینا طے پائے پھر خریدار کسی تیسرے آدمی کو وہی گندم بارہ ہزار میں فروخت کر دے جبکہ گندم ابھی اس کے قبضہ میں نہ آئی ہو تو ایسی صورت میں پہلے شخص نے دس ہزار کو بارہ ہزار کے عوض بیچا جو صریحاً سود ہے کیونکہ گندم تو وقت مقررہ پر ملنی ہے۔ (واللہ اعلم!)