السنن المأثورة

➊ وتر رات کے آخری پہر میں پڑھنا افضل ہے البتہ مسئلہ میں گنجائش ہے، اگر آخری پہر میں اٹھنے کا یقین ہو تو آخری پہر وتر پڑھے یعنی نماز تہجد کے بعد اور اگر پتہ ہو کہ نہیں اٹھ سکوں گا تو سونے سے پہلے ہی پڑھے جیسا کہ رسول اللہ صلی اللہ علیہ وسلم نے فرمایا: «من خشى منكم ان لا يستيقظ من آخر الليل فليوتر اوله ومن طمع منكم ان يقوم من آخِرِ الليل فليو ترمن آخر الليل فان قراءة القرآن فى آخر الليل محضورة وهى افضل»
تم میں سے جس کو اندیشہ ہو کہ وہ رات کے آخری پہر میں نہیں اٹھ سکے گا تو وہ رات کے شروع میں ہی وتر پڑھ لے اور جو رات کے آخری حصہ میں اٹھنے کی امید رکھتا ہو تو وہ رات کے آخری حصہ میں وتر پڑھے کیونکہ رات کے آخری حصہ میں قرآن پڑھنے پر فرشتے حاضر ہوتے ہیں اور یہ افضل وقت ہے۔ [جامع ترمذی: 455]
➋ سیدنا ابوہریرہ رضی اللہ عنہ رسول اللہ صلی اللہ علیہ وسلم کی وصیت کے مطابق رات سونے سے قبل وتر پڑھ لیا کرتے تھے۔ [صحیح بخاری: 1178، صحیح مسلم: 721]

➊ سترہ تقریبا ڈیڑھ فٹ اونچا ہونا چاہیے۔
➋ سترے کا اہتمام کرنا چاہیے تاکہ گزرنے والوں کو بھی سہولت رہے اور آدمی کی نماز میں خلل بھی نہ پڑے، سترہ رکھنے سے خیالات منتشر نہیں ہوتے۔
➌ سترہ اور آدمی کے درمیان صرف سجدہ کی جگہ ہونی چاہیے، مسجد کا ستون، دیوار وغیرہ سے کوئی بھی رکاوٹ بطور سترہ استعمال میں لائی جاسکتی ہے۔
➍ نمازیوں کو چاہیے خالی مسجد میں بھی جب نماز پڑھنے لگیں تو دیوار کے قریب کھڑے ہوں نہ کہ مسجد کے وسط میں تاکہ شیطان آگے سے گزر کر نماز نہ توڑے اور خیالات منتشر نہ ہوں۔
➎ ویرانے میں سواری وغیرہ کو بھی سترہ بنایا جا سکتا ہے۔ [صحیح بخاری: 430]
➏ امام کا سترہ مقتدیوں کے لیے کافی ہے۔
➐ نمازی کے آگے سے گزرنا سخت گناہ ہے، چنانچہ سیدنا ابو جہیم رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: «لو يعلم المار بين يدى المصلى ما ذا عليه لكان ان يقف اربعين خيراله من أن يمر بين يديه»
اگر نمازی کے سامنے سے گزرنے والا جانتا کہ اس کا کتنا بڑا گناہ ہے تو اس کے سامنے سے گزرنے پر چالیس دن، مہینہ یا سال وہیں کھڑے رہنے کو ترجیح دیتا۔ [صحیح بخاری: 510]