السنن المأثورة

➊ قرآن کی تلاوت باعث اجر و ثواب ہے لیکن بے محل تلاوت کرنا ممنوع ہے جیسا کہ رکوع و سجود کی حالتیں اللہ کے نزدیک پسندیدہ ہیں لیکن تلاوت قرآن ممنوع ہے۔ لہذا جہاں جس صورت و حالت میں تلاوت قرآن مشروع ہے وہیں اس کو اختیار کرنا چاہیے۔
➋ سیدنا حذیفہ بن یمان رضی اللہ عنہ بیان کرتے ہیں کہ نبی اکرم صلی اللہ علیہ وسلم رکوع میں «سبحان ربي العظيم» اور سجدہ میں «سبحان ربي الاعليٰ» پڑھتے تھے۔ [صحيح مسلم: 772]
➌ درج بالا دعاؤں کے علاوہ بھی رکوع و سجود کی متعدد دعائیں نبی اکرم صلی اللہ علیہ وسلم سے ثابت ہیں جن کو ادعیہ ماثورہ کی کتب میں دیکھا جاسکتا ہے۔
➍ میں یہ نہیں کہتا کہ تمہیں منع کیا اس سے یہ مراد نہیں کہ اُمت میں صرف سیدنا علی رضی اللہ عنہ کو منع کیا تھا اور باقی کے لیے جائز ہے۔ بلکہ مراد یہ ہے کہ جس وقت آپ صلی اللہ علیہ وسلم نے ارشاد فرمایا اس وقت صرف میں موجود تھا۔
➎ ریشم اور سونا مردوں پر حرام ہے۔
➏ مردوں کے لیے ایسا کپڑا پہننا نا جائز ہے جو عورتوں کا خاص رنگ ہے عورت پیلا رنگ پہن سکتی ہے۔ جیسے سونا پہن سکتی ہے البتہ سجدہ اور رکوع میں تلاوت قرآن دونوں مرد و عورت کے لیے منع ہے۔ خالص ہندوانی رنگ یا جو بدھ مت کا شعار ہے ان کے ساتھ تشبیہ سے بچنے کے لیے دونوں کو نہیں پہننا چاہیے۔ جیسے کالا رنگ جائز ہے لیکن محرم میں جب مجوسی اس کو اپنا شعار بنا ئیں تو مشابہت سے بچنے کے لیے اجتناب کرنا چاہیے۔ کیونکہ اسلام کی اپنی ثقافت اور کلچر ہے وہ کسی سے متاثر نہیں ہوتا اور نہ ہی اسلام کسی ثقافت کا محتاج ہے۔
➐ جو کہتے ہیں قرآن ہی پڑھا ہے، قرآن پڑھنا کوئی منع ہے، ان کے لیے بھی ان احادیث میں سبق ہے کہ ہر جگہ قرآن نہیں پڑھنا جہاں شریعت نے پڑھنے کا حکم دیا وہاں پڑھیں خود شریعت سازی نہ کریں۔
➑ سجدہ میں دعا کی جاسکتی ہے علماء امت کے نزدیک فرائض میں ماثور ادعیہ کے علاوہ کچھ نہ پڑھیں اور نوافل میں حالت سجدہ میں جو مانگنا چاہیں مانگ لیں۔ واللہ اعلم۔

➊ جہری نمازوں میں اونچی آمین کہنا سنت رسول اللہ صلی اللہ علیہ وسلم و سنت سواد اعظم ہے، عطاء رحمہ اللہ کہتے ہیں عبداللہ بن زبیر رضی اللہ عنہ نے امامت کرائی، مقتدیوں نے اتنی اونچی آواز سے آمین کہی کہ مسجد گونج اٹھی۔ [صحیح بخاری: باب جہر الامام بالتامین]
➋ احناف میں سے علامہ عبدالحی لکھنوی رحمہ اللہ نے لکھا ہے کہ: «قد ثبت الجهر من رسول صلى الله عليه وسلم باسانيد متعددة تقوى بعضها بعضا»
اونچی آمین کہنا رسول اللہ صلی اللہ علیہ وسلم سے متعدد اسناد سے ثابت ہے جو ایک دوسری کو تقویت دیتی ہیں۔ ابن ہمام رحمہ اللہ نے فتح القدیر میں اور ان کے شاگرد ابن امیر الحاج رحمہ اللہ نے حلیۃ المصلی میں بھی بلند آواز میں آمین کہنے کو درست گردانا ہے۔ عبد القادر جیلانی رحمہ اللہ نے غنیہ الطالبین میں اونچی آمین اور رفع الیدین کو مدلل بیان کیا ہے۔
➌ بعض لوگوں کا کہنا ہے کہ تم چونکہ فرشتوں کی آمین نہیں سنتے لہذا تم بھی آہستہ کہو گے تو موافقت ہوگی جبکہ یہ بے مقصد بات ہے۔ مقصود آمین کا بآواز بلند کہنا ہے۔ جیسا کہ حدیث میں بیان ہوا عہد صحابہ رضی اللہ عنہم میں آمین سے مسجد گونج اٹھی تھی۔
➍ فرشتوں کی آواز آئے گی تو ہم آمین کہیں گے یہ بعینہ مشرکین مکہ جیسا مطالبہ ہے۔ ارشاد باری تعالیٰ ہے: ﴿أَوْ تَأْتِيَ بِاللَّهِ وَالْمَلَائِكَةِ قَبِيلًا﴾ [الاسراء: 92]
یا اللہ کو اور فرشتوں کو سامنے لے آ۔
﴿یَوْمَ یَرَوْنَ الْمَلٰٓىٕكَةَ لَا بُشْرٰى یَوْمَىٕذٍ لِّلْمُجْرِمِیْنَ﴾ [الفرقان: 22]
جس دن وہ فرشتوں کو دیکھیں گے اس دن مجرموں کے لیے کوئی بشارت نہیں ہوگی۔
﴿قُلْ لَّوْ كَانَ فِی الْاَرْضِ مَلٰٓىٕكَةٌ یَّمْشُوْنَ مُطْمَىٕنِّیْنَ لَنَزَّلْنَا عَلَیْهِمْ مِّنَ السَّمَآءِ مَلَكًا رَّسُوْلًا﴾ [الاسراء: 95]
کہہ دیجیے: اگر زمین میں فرشتے ہوتے جو یہاں مطمئن ہو کر چلتے پھرتے تو ہم ان پر آسمان سے کوئی فرشتہ ہی رسول بنا کر نازل کرتے۔
➎ متبع سنت کو عمل رسول اللہ صلی اللہ علیہ وسلم اور عمل صحابہ رضی اللہ عنہم ہی کافی ہے اور جس نے عناد کرنا ہے وہ فرشتوں کی آواز سن کر بھی نہیں کرے گا جیسا کہ مشرکین کی عادات قرآن مجید نے بیان کیں۔
خود بدلتے نہیں قرآں کو بدل دیتے ہیں
ہوئے کس درجہ فقیہان حرم بے توفیق
➏ اگر امام کی آمین سنائی نہ دے پھر بھی مقتدی کو آمین کہنی چاہیے۔ جیسا کہ حدیث بالا سے واضح ہے۔
➐ بعض روایات میں آمین پر «رب اغفر لي آمين» کا اضافہ درست نہیں یہ اضافہ سنداً ضعیف ہے۔ بھلا اس سے بڑا عاشق رسول اللہ صلی اللہ علیہ وسلم کون ہو گا جو ایسے اضافے جو احادیث میں تو ہیں لیکن سنداً ضعیف ہیں ان کو مسترد کر دیتا ہے کہ ان کی سند میرے آقا صلی اللہ علیہ وسلم تک نہیں پہنچتی، میں کسی بے سند بات کو اپنے پیارے نبی صلی اللہ علیہ وسلم کی طرف منسوب نہیں کر سکتا ایسا عقیدہ رکھنے والا ہی صحیح عاشق۔
➑ ام المومنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: یہودی تم سے کسی چیز پر اتنا حسد نہیں کرتے جتنا سلام کہنے اور آمین پر تم سے حسد کرتے ہیں۔ کیونکہ خود وہ اس نیکی سے محروم ہیں وہ چاہتے ہیں باقی بھی کوئی نہ کہے، یہاں سلام سے مراد ملاقات کے وقت جو السلام علیکم ہے جو ایک دوسرے کو ملاقات کے وقت مسلمان کہتے ہیں اور اونچی آمین اسلام کا شعار ہے۔ جیسے رفع الیدین اور سورۃ فاتحہ اسلام کے شعائر ہیں۔ [سنن ابن ماجہ: 856]