السنن المأثورة

➊ رمضان المبارک کے روزے فرض ہیں، ارشاد باری تعالیٰ ہے: ﴿يَايُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ﴾ [البقره: 183]
"اے لوگو جو ایمان لائے ہو! تم پر روزہ رکھنا اسی طرح فرض کیا گیا ہے جس طرح ان لوگوں پر فرض کیا گیا تھا جو تم سے پہلے تھے تاکہ تم متقی بن جاؤ۔"
اعمال کی قبولیت کے لیے ایمان اور خالص نیت شرط ہے، روزہ گناہوں کو مٹا دیتا ہے البتہ حقوق العباد کی تقصیر کی اس سے تلافی نہیں ہوتی، جب تک جس کا حق تلف کیا اس سے تلافی نہ کرائی جائے یا وہ خود ہی معاف کر دے۔
➋ ایمان سے محرومی اخروی خسارے کا باعث ہے، ارشاد باری تعالیٰ ہے: ﴿وَمَن يَكْفُرْ بِالْإِيمَانِ فَقَدْ حَبِطَ عَمَلُهُ وَهُوَ فِي الْآخِرَةِ مِنَ الْخَاسِرِينَ﴾ [المائده: 5]
"اور جس نے ایمان کا انکار کیا یقیناً اس کے عمل ضائع ہو گئے اور وہ آخرت میں نقصان اٹھانے والوں میں سے ہے۔"
کفر اور شرک دونوں ایمان کے متضاد ہیں، لہٰذا انسان کو ایسے افعال و اقوال سے اجتناب کرنا چاہیے جن سے کفر و شرک لازم آتا ہے۔
➌ فرائض کی پابندی اور دیگر اعمالِ صالحہ سے محض صغیرہ گناہ معاف ہوتے ہیں، کبائر کی معافی کے لیے توبہ و استغفار لازم ہے۔ ارشاد باری تعالیٰ ہے: ﴿اِنْ تَجْتَنِبُوْا كَبَآىٕرَ مَا تُنْهَوْنَ عَنْهُ نُكَفِّرْ عَنْكُمْ سَیِّاٰتِكُمْ وَ نُدْخِلْكُمْ مُّدْخَلًا كَرِیْمًا﴾ [النساء: 31]
"اگر تم بڑے گناہوں سے بچو گے جن سے تمہیں روکا جاتا ہے، تو ہم تمہاری (چھوٹی چھوٹی) برائیاں تم سے دور کر دیں گے اور تمہیں عزت کی جگہ میں داخل کریں گے۔"