السنن المأثورة

➊ ان احادیث میں باجماعت نماز کی اہمیت بتائی گئی ہے کہ مردوں کی گھر میں بغیر جماعت کے نماز نہیں ہوتی۔
➋ جماعت فرض عین ہے جیسا کہ امام احمد رحمہ اللہ کا موقف ہے، اگر عورتوں اور بچوں کا خدشہ نہ ہوتا تو جماعت سے پیچھے رہنے والوں کے گھروں کو جلا دیا جاتا۔
➌ اگر نابینا کو اجازت نہیں ملی تو آنکھوں والوں کے لیے بالکل گنجائش نہیں؟
➍ مزید اس حدیث سے معلوم ہوا کہ مجرموں کے گھر پر چھاپہ مارا جا سکتا ہے اور ان کو مالی سزا بھی دی جا سکتی ہے۔ گھروں سے نکالا جا سکتا ہے لیکن اس دوران پردہ متاثر نہیں ہونا چاہیے۔
➎ بے نماز کو حاکم وقت کو سزا دینی چاہیے، جب صرف سستی برتنے والوں کے گھر جلائے جا سکتے ہیں تو بے نماز کو سزا بالاولیٰ دینی چاہیے۔
➏ مزید معلوم ہوا کہ مسجد کی جگہ وغیرہ کا قوم کے امام اعظم یا بڑے عالم سے افتتاح کرانا جائز امر ہے۔
➐ نابینا کی امامت بلا کراہت جائز ہے، اہل الرائے کہتے ہیں نابینا کو نجاست لگ جاتی ہے، متعدد صحابہ رضی اللہ عنہم نابینے تھے کیا وہ پلید ہی رہتے تھے؟ نعوذ باللہ! آنکھ کے اندھے کے پیچھے نماز ہو جاتی ہے البتہ عقل کے اندھے کے پیچھے پڑھنے سے پرہیز بہتر ہے، جو توحید کو چھوڑ کر شرک اور سنت کو چھوڑ کر بدعت اور حدیث کو چھوڑ کر حکایات کو دین بنائے بیٹھا ہے۔
➑ نابینا صحابی رضی اللہ عنہ نے مندرجہ ذیل عذر پیش کیے۔
1: «ضرير البصر» نابینا ہوں گھر نماز پڑھنے کی اجازت دیں۔
2: «شاسع الدار» گھر دور ہے۔
3: لا قائد لی، مسجد تک لے کر آنے والا کوئی نہیں۔
4: «إن المدينة كثيرة الهوام» مدینہ میں سانپ وغیرہ بہت ہیں۔
5: «واسباع» درندے بھی ہیں۔
6: «السيول تحول بيني وبين المسجد» راستہ میں نالہ بہتا ہے۔
جماعت سے پیچھے رہنے کے لیے نابینا صحابی رضی اللہ عنہ کے چھ عذر قبول نہیں تو آنکھوں والے کا کون سا عذر اس سے بڑھ کر ہوگا؟
➒ مساجد میں محض حرص و لالچ کے لیے حاضر ہونا غیر مستحسن ہے۔
➓ مخلص مومن حصول ثواب جبکہ منافقین مفادات کے لیے مساجد کو رونق بخشتے ہیں۔

➊ مؤذن کو اقامت اس وقت شروع کرنی چاہیے جب امام کو حجرے سے نکلتا دیکھے جیسا کہ اس حدیث سے امام نسائی رحمہ اللہ نے استدلال کیا ہے۔ «اقامة المؤذن عند خروج الامام»
➋ رسول اللہ صلی اللہ علیہ وسلم حجرے میں ہوتے مؤذن اجازت لے کر آتا کہ میں اقامت کہوں؟ آپ صلی اللہ علیہ وسلم فرماتے کہو، تو کبھی کچھ دیر بعد آپ صلی اللہ علیہ وسلم تشریف لاتے لوگوں کو پہلے کھڑا دیکھ کر احساس کرتے شاید ان کو مشکل درپیش ہوئی اس لیے فرمایا: لوگ اس وقت کھڑے ہوں جب امام کو نکلتے دیکھ لیں۔
➌ رسول اللہ صلی اللہ علیہ وسلم کا انتظار تو صحابہ کرام رضی اللہ عنہم اقامت کے بعد بھی فرماتے تھے، اقامت کے بعد ایک بندہ مسئلہ پوچھنے لگا آپ صلی اللہ علیہ وسلم کافی زیادہ دیر اسے سمجھاتے رہے پھر اسی اقامت سے جماعت کروائی۔ جبکہ آج کل ائمہ کا لوگ احترام و انتظار نہیں کرتے اس لیے امام نسائی رحمہ اللہ کا استدلال و موقف درست ہے کہ اقامت اس وقت کہی جائے جب امام نکل آئے، اگر زمانہ اولیٰ کی طرح گورنر ہی امام ہوتا تو لوگوں کی کیا مجال تھی احترام نہ کرتے یا انتظار نہ کرتے اور دوسرا یہ فائدہ ہوتا کہ گورنر کے ساتھ بقیہ سیاسی مالشیے بھی نماز میں آتے مسلمان ہونے کا ثبوت دیتے۔
➍ امام شافعی رحمہ اللہ کا موقف ہے کہ تکبیر ختم ہونے کے بعد اٹھنا چاہیے۔ امام مالک رحمہ اللہ کہتے ہیں تکبیر ہوتے ہی اٹھ جانا چاہیے۔ امام ابو حنیفہ رحمہ اللہ کہتے ہیں «قد قامت الصلاة» پر کھڑا ہونا چاہیے۔ امام احمد رحمہ اللہ «حي على الصلاة» پر اٹھنے کا موقف رکھتے ہیں۔ راجح بات یہ ہے کہ اگر امام مصلیٰ پر موجود ہے جیسا کہ آج کل ہوتا ہے تکبیر ہوتے ہی صفیں درست کر لینی چاہئیں، اور اگر امام صاحب حجرہ میں ہوں تو اُن کی آمد پر اٹھنا چاہیے، حتیٰ کہ مجھ دیکھ لو کا یہی تقاضا ہے۔
➎ تکبیر کے بعد امام کو صفیں درست کروا کر جماعت کھڑی کرنی چاہیے۔

➊ سجدہ کرتے وقت بازو پہلو اور پیٹ سے جدا رکھنے چاہئیں۔
➋ سیدنا ابن عباس رضی اللہ عنہما کہتے ہیں رسول اللہ صلی اللہ علیہ وسلم سجدہ فرماتے تو بازو اتنے کھولتے کہ بغلوں کی سفیدی نظر آتی۔ [سنن ابی داؤد: 899]
یہ حکم مرد و زن سب کے لیے ہے۔ سجدے میں عورتوں کا زمین کے ساتھ سمٹ جانا درست نہیں، مرد و عورت کے سجدہ کا ایک ہی طریقہ ہے۔