السنن المأثورة

➊ بارش سردی کی وجہ سے باجماعت نماز سے رخصت حاصل ہے، آئمہ محدثین امام ابو داؤد رحمہ اللہ، امام نسائی رحمہ اللہ وغیرہ نے «أَلَا صَلُّوا فِي الرِّحَالِ» کے الفاظ سے یہی استدلال کیا ہے، بارش میں نمازیں جمع کرانے کی بجائے یہ اعلان بھی کیا جا سکتا ہے کہ گھر میں ہی ادا کر لو۔
➋ سیدنا عبداللہ بن عمر رضی اللہ عنہما نے مقام ضجنان جو ایک پہاڑی کا نام ہے مکہ سے ایک منزل دور ہے اس مقام پر اذان دے کر یہ حدیث بیان کی۔ [صحیح بخاری: 632]
➌ «أَلَا صَلُّوا فِي الرِّحَالِ» کے الفاظ «حي على الصلاة» اور «حي على الفلاح» کی جگہ دو دو دفعہ پڑھے جا سکتے ہیں یا اذان کے بعد ان الفاظ سے اعلان کیا جا سکتا ہے جیسا کہ حدیث کا ظاہر اس بات پر دلالت کرتا ہے واللہ اعلم۔

➊ شریعت اسلامیہ نے اذان کا جواب دینے کی تاکید کی ہے لہذا اس کا اہتمام کرنا چاہیے۔
➋ اذان شعائر اسلام میں سے ہے یہ مسلم معاشرے کی پہچان ہے۔ مسلم آبادی کو اس کا ہر صورت اہتمام کرنا چاہیے۔
➌ «حى على الصلاة» اور «حي على الفلاح» کی آواز سن کر «لَا حَوْلَ وَلا قُوَّةَ إِلَّا بِاللَّهِ» کہنا چاہیے۔ جس کا مطلب ہے "گناہ سے بچنا اور نیکی کرنا اللہ تعالی کی توفیق کے بغیر ممکن نہیں۔"
➍ فجر کی اذان میں «الصلاة خير من النوم» کی جگہ یہی الفاظ دوہرائے جائیں گے۔
➎ اذان کا جواب دینے کے بعد درود ابراہیمی پڑھا جائے گا پھر دعائے وسیلہ پڑھی جائے گی جس موحد نے یہ کام ہمیشگی کے ساتھ کیا اس کے لیے شفاعت رسول صلی اللہ علیہ وسلم لازم ہو جائے گی۔[صحیح مسلم: 384]
➏ اذان کے بعد «أشهد أن لا إله إلا الله وحده لا شريك له وأن محمدا عبده ورسوله، رضيت بالله ربا وبمحمد رسولا وبالإسلام دينا» پڑھنے والے کے لیے گناہوں کی بخشش کا پروانہ جاری ہوتا ہے۔ [صحیح مسلم: 386]
➐ دعاء وسیلہ میں مسنون الفاظ پر ہی اکتفاء کرنا چاہیے «والدرجة الرفيعه» کا اضافہ خود ساختہ ہے۔ اس کا کوئی ثبوت نہیں ہے۔
➑ ﴿وإنك لا تخلف الميعاد﴾ سنن بیہقی میں الفاظ آئے ہیں لیکن شاذ اور سنداً نا قابل حجت ہیں لہذا یہ الفاظ بھی نہیں کہنے چاہئیں صرف دعا کے وہی الفاظ پڑھنے چاہئیں جو صحیح سند کے ساتھ حدیث میں موجود ہیں۔
➒ اذان کا جواب ساتھ ساتھ دینا چاہیے بعض علماء کا کہنا ہے کہ اگر کسی عذر کے باعث بر وقت جواب نہیں دیا تو اذان کے آخر میں جواب دے کر دعا پڑھ لی جائے۔ ہمارے استاذ محترم شیخ الحدیث مولانا محمد اکرم جمیل رحمہ اللہ ایک دفعہ ہمیں درس دے رہے تھے اس دوران اذان ہونے لگ گئی انہوں نے اذان ختم ہونے اور درس مکمل کرنے پر پوری اذان کا جواب دیا اور دعائیں پڑھیں۔ بہتر و افضل یہی ہے کہ بروقت جواب دیا جائے۔ (واللہ اعلم!)
➓ حالت حیض، جنابت، بے وضو ہونا اذان کا جواب دینے میں مانع نہ ہے۔

➊ ایک ہی مفہوم کی دو تین احادیث بعض دفعہ امام صاحب جب اکٹھی لاتے ہیں تو ان کی اسناد مختلف ہوتی ہیں، جن میں کئی علم حدیث سے متعلقہ فنی فوائد ہیں۔ جس سے اہل علم اور اس فن کے ماہرین مستفید و محظوظ ہوتے ہیں۔
➋ ان احادیث میں اس بات کا ذکر ہے کہ امام کو جہری نماز میں قرآت کرتے ہوئے الحمد للہ سے قرآت بآواز بلند شروع کرنی چاہیے قراءت سے ماقبل والی دعا استفتاح اور بسم اللہ آہستہ آواز سے پڑھنی چاہیے یہ مراد نہیں کہ پہلے کچھ نہیں پڑھنا۔
➌ سیدنا انس رضی اللہ عنہ کے بیان کے مطابق نبی اکرم صلی اللہ علیہ وسلم، سیدنا ابوبکر رضی اللہ عنہ، سیدنا عمر رضی اللہ عنہ اور سیدنا عثمان رضی اللہ عنہ قراءت فاتحہ کا آغاز الحمد للہ سے کرتے۔ [صحیح بخاری: 743، صحیح مسلم: 399]
صحیح مسلم کی مذکورہ روایت میں یہ بھی ہے کہ قرآت کے اول و آخر بسم اللہ نہیں پڑھتے تھے۔ ایک روایت میں ہے۔ «كانوا يسرون» بسم اللہ سری پڑھتے تھے۔ [صحیح ابن خزیمہ: 491]
ان روایات کا ما حاصل یہ ہے کہ قرآت کے آغاز میں بسم اللہ سرا پڑھتے تھے جہرا نہیں پڑھتے تھے۔ واللہ اعلم بالصواب!

➊ اس حدیث میں ہر سورۃ سے پہلے جہری بسم اللہ پڑھنے کا ذکر ہے اس مسئلہ میں راجح یہی ہے کہ بسم اللہ فاتحہ کے ساتھ سری پڑھی جائے بقیہ سورتوں کے ساتھ جہری پڑھی جائے۔ اور اگر اونچی پڑھ لی جائے تو اس طرح کی احادیث سے جواز ثابت ہوتا ہے۔ واللہ اعلم۔
➋ اگر امام سے غلطی ہو جائے تو اہل علم مقتدیوں کو اچھے انداز سے آگاہ کرنا چاہیے۔
➌ شرعی امور میں اصلاح کو قبول کر لینا اسلاف امت کا طرز عمل تھا جو مرور زمانہ کے ساتھ ضد، تعصب اور ہٹ دھرمی کی نظر ہوتا جا رہا ہے۔ واضح شرعی نصوص کو دیکھ سن لینے کے باوجود لوگ تقلید جامد چھوڑنے کو تیار نہیں۔ «هداهم الله»
➍ اس حدیث سے صحابہ رضی اللہ عنہم کی جرات اور دین کی حرص بھی معلوم ہوتی ہے کہ وہ سنت رسول صلی اللہ علیہ وسلم کی کس طرح سے پاسداری کرتے تھے۔

➊ اس حدیث سے معلوم ہوا کہ دورانِ خطبہ کلام درست نہیں خاموش رہنا واجب ہے۔
➋ امام خاموش کرا سکتا ہے امام کو دوران خطبہ مقتدیوں سے بات کی اجازت ہے جیسا کہ سلیک غطفانی رضی اللہ عنہ سے متعلق بات پیچھے گذر چکی ہے۔ [حدیث نمبر: 18]
➌ خطبہ جمعہ کے دوران ایک بندہ آیا کہ اے اللہ کے نبی صلی اللہ علیہ وسلم! بارش کے لیے دعا فرمائیں آپ صلی اللہ علیہ وسلم نے دعا فرمائی۔ [صحیح بخاری: 1013]
اس سے پتہ چلتا ہے کہ مقتدی بھی بقدر ضرورت امام سے بات کر سکتا ہے۔
➍ خطبہ جمعہ ایک ہفتے بعد آتا ہے جس میں دین سیکھنے کا موقع ملتا ہے اگر اس میں بھی بے جا حرکات کر کے ٹائم ضائع کر دیا جائے تو اس سے بڑی جہالت اور خسارہ کیا ہوسکتا ہے۔
➎ اس حدیث سے دین کے نظم و ضبط کا بھی پتہ چلتا ہے کہ مساجد کا انتظام امام کے ہاتھ میں دیا تاکہ ہر چندہ دینے والا اللہ کو چندہ دے کر رعب لوگوں پر نہ جمائے۔
➏ حدیث سے امام و خطیب کی عظمت بھی واضح ہوتی ہے کہ جب وہ منبر پر خطبہ ارشاد فرما رہا ہو تو اس کے بولنے کے دوران کسی کو بولنے کی اجازت نہیں ہے۔
➐ اسی طرح کنکریوں یا صف کے تنکوں سے کھیلنا بھی لغو قرار دیا گیا ہے جس سے ثواب ضائع ہو جاتا ہے۔
➑ ہر وہ عمل جو خطبہ کے استماع اور انہماک میں خلل ڈالے وہ دوران خطبہ جمعہ ممنوع ہے۔
➒ مسجد نبوی میں خطبہ جمعہ کے دوران میں نے ایک طالب علم کو کانوں سے ہیڈ فون لگائے دیکھا نماز کے بعد میں نے اس سے پوچھا آپ نے خطبہ نہیں سنا؟ اس نے کہا میں آن لائن حرم مکی میں الشیخ سدیس یا شریم کا خطبہ جمعہ سن رہا تھا۔ اس طرح کی حرکات بھی نہیں کرنی چاہئیں، فطری دین میں فطری چیزوں پر ہی اکتفاء کرنا چاہیے۔