السنن المأثورة

➊ ارشاد باری تعالیٰ ہے: ﴿ثُمَّ اَفِيضُوا مِنْ حَيْثُ أَفَاضَ النَّاسُ وَاسْتَغْفِرُوا اللهَ إِنَّ اللهَ غَفُورٌ رَّحِيمٌ﴾ [البقرة: 199]
"پھر جہاں سے سب لوگ لوٹیں وہیں سے تم بھی لوٹو اور اللہ سے بخشش مانگو، بے شک اللہ بہت بخشنے والا، بہت رحم کرنے والا ہے۔"
قریش اپنے آپ کو دیگر عرب سے ممتاز گردانتے تھے کہ ہم عیال اللہ ہیں اس لیے حدودِ حرم سے باہر میدانِ عرفات میں نہ جاتے اور کہتے ہم حرم کی حدود سے باہر نہیں جائیں گے، حرم کی حدود مزدلفہ تک ہے، قریش مزدلفہ میں وقوفِ حج کرتے تھے جبکہ عام عرب وقوفِ عرفہ میں کرتے تھے، اس بدعت کا نام محمس تھا، قریش کی اس بدعت کو رسول اللہ صلی اللہ علیہ وسلم نے آ کر ختم کیا۔
➋ اور اللہ تعالیٰ نے قریش کو یہ حکم دیا کہ سب لوگوں کے ساتھ عرفات جانا ہے اور ان کے ساتھ ہی وہاں سے واپس لوٹنا ضروری ہے۔ حمس کا مطلب بعض نے پختگی اور حماست اور بعض نے بہادری و شجاعت اور بعض کہتے ہیں کہ کعبہ کا ایک نام الحمساء بھی ہے اسی نسبت سے یہ اپنے آپ کو حمس کہتے تھے۔
➌ دین میں ایسی ٹھیکیداری کا کوئی تصور نہیں کہ بڑے اور چھوٹے کے لیے امتیاز روا رکھا جائے یا برادریوں کا اپنا اپنا دین ہو، ایسا ہرگز نہیں، اسلام مساوات کا درس دیتا ہے۔
ایک ہی صف میں کھڑے ہو گئے محمود و ایاز
نہ کوئی بندہ رہا اور نہ کوئی بندہ نواز
بندہ و صاحب و محتاج و غنی ایک ہوئے
تیری سرکار میں پہنچے تو سبھی ایک ہوئے