السنن الكبرى للبيهقي

اللہ تعالیٰ کا فرمان ہے: ﴿فَتَحْرِيرُ رَقَبَةٍ مُؤْمِنَةٍ﴾ ”تو ایک مومن گردن (غلام) آزاد کرنا ہے۔“ [سورة النساء: 92]

مالک بن انس رحمہ اللہ، امام زہری رحمہ اللہ سے روایت کرتے ہیں کہ ایک آدمی نے ایک عورت کو مارا، جس سے اس کا حمل ساقط ہو گیا؛ ابن شہاب رحمہ اللہ کہتے ہیں کہ اس کے بچے کے بدلے اس پر جرمانہ ہے اور اس پر کفارہ ہے۔

ابن شہاب رحمہ اللہ کہتے ہیں کہ ایک عورت کو مارا گیا، اس کے پیٹ میں تین بچے تھے جو ساقط ہو گئے، تو زہری رحمہ اللہ کہتے ہیں کہ ہر ایک کے بدلے ہماری رائے کے مطابق جرمانہ ہے، اور ہماری رائے یہ ہے کہ ہر وہ جنین جس کا حمل ہونا واضح ہو چکا ہو، اس میں جرمانہ ہے۔ یونس رحمہ اللہ کہتے ہیں کہ ابن شہاب رحمہ اللہ نے اس عورت کے بارے میں فرمایا کہ جس کو ایک شخص نے مارا، وہ مر گئی اور اس کا حمل بھی ضائع ہو گیا، فرمایا: عورت کی تو دیت ہے، رہا بچہ تو وہ بھی عورت کے ساتھ تھا، اس کی کوئی دیت ہمارے خیال میں نہیں ہے، اور ہمیں معلوم نہیں کہ اس بارے میں پہلے کوئی فیصلہ ہوا ہو۔ امام مالک رحمہ اللہ نے بھی یہی کہا ہے۔
ابن منذر رحمہ اللہ نے جنین میں کفارہ عطاء، حسن اور نخعی رحمہم اللہ سے نقل کیا ہے۔

ابوزناد رحمہ اللہ فقہائے مدینہ (تابعین) رحمہم اللہ سے نقل کرتے ہیں کہ وہ اس شخص کے بارے میں فرماتے ہیں جو مار کر عورت کا حمل ضائع کر دے، اگر وہ مردہ ہی ساقط ہوا ہے تو اس میں جرمانہ ہے اور اگر زندہ ساقط ہوا ہے اور بعد میں مرا ہے تو مکمل دیت ہے، اور وہ فرماتے تھے کہ جو حاملہ قتل کی جائے اور بچہ اس کے پیٹ ہی میں ہو تو صرف عورت کی دیت ہوگی، بچے کی نہیں۔

سیدنا زید بن ثابت رضی اللہ عنہ فرماتے ہیں کہ بچہ جب زندہ ساقط ہو جائے، وہ چیخا ہو یا نہ، اس میں مکمل دیت ہے۔
اس کی سند میں انقطاع ہے۔

حضرت عمر رضی اللہ عنہ فرماتے ہیں کہ قیس بن عاصم تمیمی نبی ﷺ کے پاس آئے اور کہا: میں نے جاہلیت میں آٹھ بیٹیوں کو زندہ درگور کیا تھا، تو آپ ﷺ نے فرمایا: ”ہر ایک کے بدلے ایک جان آزاد کر۔“

سیدنا قیس بن عاصم رضی اللہ عنہ کہتے ہیں کہ میں نبی ﷺ کے پاس آیا اور عرض کیا: میں نے جاہلیت میں بارہ یا تیرہ بچیاں زندہ درگور کیں، تو آپ ﷺ نے فرمایا: ”ان کی تعداد کے مطابق گردن آزاد کر دے۔“

شہر بن حوشب رحمہ اللہ فرماتے ہیں کہ سیدنا عمر رضی اللہ عنہ نے ایک عورت کو بہت زور سے ڈانٹا تو اس عورت کا بچہ ساقط ہو گیا، تو سیدنا عمر رضی اللہ عنہ نے اس کا جرمانہ ادا کیا۔
اس کی سند منقطع ہے۔