السنن الكبرى للبيهقي

ابو عبید رحمہ اللہ کی تحریر کے مطابق ایک لفظ «حِوَارٌ» ”حوار“ ہے، یہ ابتدائی عمر ہے، پھر «فَصِيلٌ» ”فصیل“ ہے جب وہ دودھ چھوڑے، پھر «بِنْتُ مَخَاضٍ» ”بنت مخاض“ ہے یعنی ایک سال سے دو سال کی عمر تک، جب وہ تیسرے سال میں داخل ہو جائے تو وہ «بِنْتُ لَبُونٍ» ”بنت لبون“ ہے۔ جب اس کے تین سال پورے ہو جائیں تو وہ «حِقَّةٌ» ”حقہ“ ہے چار سال مکمل ہونے تک؛ کیونکہ وہ مستحق ہوتی ہے کہ اس پر اونٹ چھوڑا جائے اور وہ حاملہ ہو جائے، اور مذکر تب تک مؤنث کے پاس نہیں جاتا جب تک وہ اس لائق نہ ہو جائے اور یہ اس کے چار سال کی عمر میں ہوتا ہے اس لیے اسے «حِقَّةٌ» ”حقہ“ کہتے ہیں اور «حِقَّةٌ» ”حقہ“ کو «طَرُوقَةُ الْفَحْلِ» ”طروقۃ الفحل“ بھی کہتے ہیں۔ اور جب وہ پانچویں سال میں داخل ہو تو یہ «جَذَعَةٌ» ”جذعہ“ کہلاتا ہے پانچ سال پورے ہونے تک، اور جب وہ چھٹے سال میں داخل ہوتی ہے اور سامنے والے دانت گر جاتے ہیں اس لیے چھ سال پورے ہونے تک اسے «ثَنِيٌّ» ”ثنی“ کہتے ہیں، اور جب وہ اپنی عمر کے ساتویں سال میں داخل ہو تو مذکر کو «رَبَاعٌ» ”رباع“ اور مؤنث کو «رُبَاعِيَّةٌ» ”رباعیہ“ کہتے ہیں سات سال پورے ہونے تک، اور جب وہ عمر کے آٹھویں سال میں داخل ہوتا ہے تو اپنے «سَدَسٌ» ”سدس“ دانت گرا دیتا ہے جو رباعی دانتوں کے بعد ہوتے ہیں اور وہ آٹھ سال پورے ہونے تک «سَدَسٌ» ”سدس“ اور «سَدِيسٌ» ”سدیس“ کہلاتا ہے۔ اور جب وہ نویں سال میں داخل ہوتا ہے تو اس کی داڑھیں ظاہر ہوتی ہیں تو وہ «بَازِلٌ» ”بازل“ کہلاتا ہے داڑھوں کے استعمال کی وجہ سے۔ جب وہ دسویں سال میں داخل ہو جاتا ہے تو اسے «مُخْلِفٌ» ”مخلف“ کہتے ہیں، اس کے بعد اس کا کوئی نام نہیں، لیکن اسے «بَازِلُ عَامٍ» ”بازل عام“ (ایک سالہ بازل) یا «بَازِلُ عَامَيْنِ» ”بازل عامین“ (دو سالہ بازل)، «مُخْلِفُ عَامٍ» ”مخلف عام“ (ایک سالہ مخلف) اور «مُخْلِفُ عَامَيْنِ» ”مخلف عامین“ (دو سالہ مخلف) اور تین سالہ مخلف پانچ سال تک کہا جاتا ہے اور «خَلِفَةٌ» ”خلفۃ“ سے مراد حمل اٹھانے والی ہے۔
امام شافعی رحمہ اللہ نے حرملہ کی روایت میں اونٹوں کی عمر کا تذکرہ کیا ہے اور یہ بھی فرمایا ہے کہ جو «ابْنُ مَخَاضٍ» ”ابن مخاض“ نام رکھا ہے وہ مذکر کے لیے ہے کیونکہ اسے اس کی ماں سے جدا کر لیا جاتا ہے اور وہ اس وجہ سے حاملہ ہو جاتی ہے تو وہ «ابْنُ مَخَاضٍ» ”ابن مخاض“ کہلاتا ہے، اگرچہ وہ حاملہ نہ ہو، جو «ابْنُ لَبُونٍ» ”ابن لبون“ نام رکھا گیا ہے وہ اس لیے کہ اس کی ماں دوسرے کو جنم دیتی ہے اور وہ دودھ اس کا ہو جاتا ہے۔