السنن الكبرى للبيهقي

سائب بن یزید رضی اللہ عنہما نے علاء بن حضرمی رضی اللہ عنہ سے سنا کہ رسول اللہ ﷺ نے فرمایا: ”مہاجر مناسک کی ادائیگی کے بعد مکہ میں تین دن ٹھہریں۔“

عمر بن عبد العزیز رحمہ اللہ نے سیدنا سائب بن یزید رضی اللہ عنہ سے سوال کیا کہ کیا آپ نے مکہ کے قیام کے بارے میں کچھ سنا ہے؟ تو سیدنا سائب رضی اللہ عنہ نے فرمایا: میں نے حضرمی رضی اللہ عنہ سے سنا کہ رسول اللہ ﷺ نے فرمایا: ”مکہ میں داخل ہونے کے بعد مہاجر تین دن قیام کریں“، گویا آپ ﷺ نے فرمایا: ”زیادہ نہیں۔“

عبدالرحمن بن حمید رحمہ اللہ فرماتے ہیں کہ میں نے عمر بن عبدالعزیز رحمہ اللہ سے سنا، وہ اپنے اہل مجلس سے پوچھ رہے تھے کہ تم نے مکہ کے قیام کے بارے میں کچھ سن رکھا ہے؟ تو سائب بن یزید رضی اللہ عنہ فرمانے لگے: میں نے علاء رضی اللہ عنہ سے سنا یا علاء حضرمی رضی اللہ عنہ کہا، وہ کہتے ہیں کہ رسول اللہ ﷺ نے فرمایا: ”مناسک کی ادائیگی کے بعد مہاجر مکہ میں تین دن قیام کریں۔“

اسلم فرماتے ہیں کہ عمر بن خطاب رضی اللہ عنہ کے غلام ہیں کہ عمر بن خطاب رضی اللہ عنہ نے یہودیوں، عیسائیوں اور مجوسیوں کے لیے مدینہ میں بازار لگانے کے لیے تین دن قیام کی اجازت دی۔ وہ اپنی ضروریات بھی پوری کرتے تھے۔ تین دن کے بعد کسی کو قیام کی اجازت نہ تھی۔
نوٹ: امام شافعی رحمہ اللہ کے نزدیک جو چار دن قیام کا ارادہ کرے وہ پوری نماز ادا کرے گا۔ دیگر کا بھی یہی مؤقف ہے جیسے سعید بن مسیب رحمہ اللہ اور عثمان بن عفان رضی اللہ عنہ۔

عطاء بن عبداللہ خراسانی نے سعید بن مسیب رحمہ اللہ سے سنا کہ جو چار رات قیام کا ارادہ کرے اور وہ مسافر ہو تو نماز پوری پڑھے۔ امام مالک رحمہ اللہ فرماتے ہیں: اہل علم کا یہی مذہب ہے۔
نوٹ: امام شافعی رحمہ اللہ فرماتے ہیں: نبی ﷺ نے ”مناسک کی ادائیگی کے بعد مہاجرین کو تین دن قیام کی اجازت دی۔“ حضرت عمر رضی اللہ عنہ نے یہودیوں کے لیے جلا وطنی کے بعد تین دن مقرر کیے۔ اس لحاظ سے مسافر اگر تین دن سے زیادہ کا ارادہ رکھتا ہے تو وہ ان کے مشابہہ ہے جن کے بارے میں نبی ﷺ اور حضرت عمر رضی اللہ عنہ نے حکم دیا۔

یحییٰ بن ابی اسحاق فرماتے ہیں کہ میں نے سیدنا انس رضی اللہ عنہ سے سنا کہ ہم نے نبی کریم ﷺ کے ساتھ مکہ کے سفر میں قصر کی اور دس دن مکہ میں قیام کیا، آپ ﷺ واپسی تک قصر ہی کرتے رہے۔

یحییٰ بن ابی اسحاق سیدنا انس رضی اللہ عنہ سے روایت کرتے ہیں کہ ہم نے نبی ﷺ کے ساتھ حج کیا، تو واپسی تک آپ ﷺ ”دو دو رکعات پڑھتے رہے“، راوی کہتے ہیں میں نے کہا: ”تم مکہ میں کتنی دیر ٹھہرے؟“ انہوں نے فرمایا: ”دس دن۔“
نوٹ: دس دن ٹھہرنے سے سیدنا انس بن مالک رضی اللہ عنہ کی مراد مکہ، منیٰ، اور عرفات میں ٹھہرنا ہے، اس لیے کہ احادیث اس بات پر دلالت کرتی ہیں کہ نبی ﷺ مکہ تشریف لائے جب ذوالحجہ کے چار دن گزر چکے تھے، پھر آپ ﷺ نے تین دن قیام کیا اور قصر فرماتے رہے۔ لیکن مکہ میں آنے کے دن کو شمار نہیں کیا؛ اس لیے کہ آپ ﷺ اس دن سفر میں رہے اور نہ ہی آٹھ ذوالحجہ کو شمار کیا ہے؛ کیونکہ اس دن آپ ﷺ منیٰ چلے گئے جہاں ظہر، عصر، مغرب، عشاء اور صبح کی نماز ادا کی۔ پھر طلوعِ شمس کے بعد عرفات آگئے۔ پھر غروبِ شمس کے بعد مزدلفہ آگئے، وہاں دو راتیں صبح تک گزاریں۔ پھر منیٰ آئے اور مناسک ادا کیے۔ پھر مکہ آ کر طواف کیا۔ پھر منیٰ آ کر تین دن قیام کیا، اس میں قصر کرتے رہے۔ پھر وادیِ محصب میں قیام کیا اور اپنے صحابہ میں کوچ کا اعلان کروایا۔ پھر نمازِ فجر سے پہلے بیت اللہ کا طواف کیا۔ پھر مدینہ کو چل دیے۔ آپ ﷺ نے چار دن کسی ایک جگہ قیام نہیں کیا اور آپ ﷺ قصر کرتے رہے۔