السنن الكبرى للبيهقي

سیدنا ابوہریرہ رضی اللہ عنہ سے روایت ہے کہ رسول اللہ ﷺ صبح کی نماز کی دوسری رکعت میں جب رکوع سے سر اٹھاتے تو پڑھتے: «اللَّهُمَّ أَنْجِ الْوَلِيدَ بْنَ الْوَلِيدِ، وَسَلَمَةَ بْنَ هِشَامٍ، وَعَيَّاشَ بْنَ أَبِي رَبِيعَةَ، وَالْمُسْتَضْعَفِينَ بِمَكَّةَ، اللَّهُمَّ اشْدُدْ وَطْأَتَكَ عَلَى مُضَرَ، وَاجْعَلْهَا عَلَيْهِمْ سِنِينَ كَسِنِي يُوسُفَ» ”اے اللہ! ولید بن ولید، سلمہ بن ہشام اور عیاش بن ابی ربیعہ رضی اللہ عنہم اور مکہ کے کمزوروں کو نجات دے۔ اے اللہ! مضر قبیلہ کے کفار پر اپنی پکڑ سخت کر اور ان پر یہ عذابِ قحط یوسف (علیہ السلام) کی طرح طویل مدت تک مسلط رکھ۔“
ہمیں ابوالحسین علی بن محمد بن بشران العدل نے بغداد میں خبر دی، انہوں نے کہا: ہمیں اسماعیل بن محمد الصفار نے خبر دی، انہوں نے کہا: ہمیں محمد بن عبدالملک الدقیقی نے بتایا، انہوں نے کہا: ہمیں یزید بن ہارون نے بتایا، انہوں نے کہا: ہمیں سلیمان نے ابومجلز سے خبر دی، انہوں نے سیدنا انس بن مالک رضی اللہ عنہ سے روایت کیا کہ رسول اللہ ﷺ نے فجر میں ایک ماہ تک قنوت فرمائی، آپ رعل اور ذکوان (قبیلوں) کے خلاف بددعا کرتے تھے اور فرمایا: ”«عُصَيَّةُ عَصَتِ اللَّهَ وَرَسُولَهُ» عصیہ نے اللہ اور اس کے رسول کی نافرمانی کی ہے۔“ اسے دونوں (امام بخاری و مسلم) نے سلیمان تیمی کی حدیث سے صحیح میں نقل کیا ہے۔ [صحیح۔ اسے مسلم نے 307 میں نکالا ہے]

سیدنا خفاف بن ایماء غفاری رضی اللہ عنہ سے روایت ہے کہ رسول اللہ ﷺ صبح کی نماز میں یہ پڑھتے: «اللَّهُمَّ الْعَنْ لِحْيَانَ، وَرِعْلًا، وَذَكْوَانَ، وَعُصَيَّةَ عَصَوُا اللَّهَ وَرَسُولَهُ، غِفَارُ غَفَرَ اللَّهُ لَهَا، وَأَسْلَمُ سَالَمَهَا اللَّهُ» ”اے اللہ! بنو لحیان، رعل، ذکوان اور عصیہ پر لعنت بھیج جنہوں نے اللہ اور اس کے رسول ﷺ کی نافرمانی کی اور اے اللہ! قبیلہ غفار کو معاف فرما دے اور بنو اسلم کو صحیح سلامت رکھ۔“

ایضاً۔

عبدالرحمن بن معقل بیان کرتے ہیں کہ سیدنا علی بن ابی طالب رضی اللہ عنہ نے مغرب کی نماز میں قنوت پڑھی، اس میں کچھ لوگوں اور ان کے پیروکاروں پر بددعا کی، انہوں نے قنوت رکوع کے بعد پڑھی تھی۔

عبدالرحمن بن معقل بیان کرتے ہیں، میں عشاء یا فجر کی نماز میں سیدنا علی بن ابی طالب رضی اللہ عنہ کے ساتھ جماعت میں حاضر ہوا۔ آپ رضی اللہ عنہ رکوع کے بعد قنوت پڑھتے تھے اور اس میں پانچ آدمیوں کا نام لے کر بددعا کرتے تھے۔

سیدنا ابو درداء رضی اللہ عنہ بیان کرتے ہیں کہ میں حالتِ سجدہ میں اپنے تیس بھائیوں کے لیے ان کا اور ان کے باپوں کے نام لے کر دعا کرتا ہوں۔