السنن الكبرى للبيهقي

سیدنا انس رضی اللہ عنہ سے روایت ہے کہ سیدنا بلال رضی اللہ عنہ کو حکم دیا گیا کہ اذان دوہری کہیں اور اقامت ایک ایک مرتبہ، مگر «قَدْ قَامَتِ الصَّلَاةُ» ”یقیناً نماز کھڑی ہوگئی“ کو دو مرتبہ ہی کہیں۔

سیدنا انس رضی اللہ عنہ سے روایت ہے کہ سیدنا بلال رضی اللہ عنہ کو حکم دیا گیا کہ ”اذان دوہری کہیں اور اقامت ایک ایک مرتبہ، مگر «قَدْ قَامَتِ الصَّلَاةُ» دو مرتبہ کہیں۔“

سیدنا عبداللہ بن عمر رضی اللہ عنہما سے روایت ہے کہ نبی ﷺ کے زمانہ میں اذان دو دو مرتبہ تھی اور اقامت ایک ایک مرتبہ، جب مؤذن «قَدْ قَامَتِ الصَّلَاةُ» ”نماز کھڑی ہو گئی“ کہے تو دو مرتبہ کہے۔

ابومثنیٰ کہتے ہیں: میں نے سیدنا ابن عمر رضی اللہ عنہما سے سنا کہ ”نبی کریم ﷺ کے زمانہ میں اذان دو دو مرتبہ ہوتی تھی اور اقامت ایک ایک مرتبہ، جب «قَدْ قَامَتِ الصَّلَاةُ» ”نماز کھڑی ہوگئی“ کہتے تو اس کو دو مرتبہ کہتے، جب ہمارا کوئی شخص اقامت سنتا تو وضو کرتا پھر نکلتا۔“

ابراہیم بن عبدالعزیز بن عبدالملک بن ابی محذورہ رحمہ اللہ فرماتے ہیں کہ میں نے اپنے باپ اور دادا کو پایا، وہ یہی اذان دیا کرتے تھے جو میں دیتا ہوں اور یہی اقامت کہتے تھے اور کہتے تھے کہ نبی ﷺ نے یہی ابو محذورہ رضی اللہ عنہ کو سکھائی ہے۔۔۔ انہوں نے اذان کا ذکر کیا پھر کہا اور اقامت ایک مرتبہ: «اللَّهُ أَكْبَرُ اللَّهُ أَكْبَرُ، أَشْهَدُ أَنْ لَا إِلٰهَ إِلَّا اللَّهُ، أَشْهَدُ أَنَّ مُحَمَّدًا رَسُولُ اللَّهِ، حَيَّ عَلَى الصَّلَاةِ، حَيَّ عَلَى الْفَلَاحِ، قَدْ قَامَتِ الصَّلَاةُ قَدْ قَامَتِ الصَّلَاةُ، اللَّهُ أَكْبَرُ اللَّهُ أَكْبَرُ، لَا إِلٰهَ إِلَّا اللَّهُ» ”اللہ سب سے بڑا ہے، اللہ سب سے بڑا ہے، میں گواہی دیتا ہوں کہ اللہ کے سوا کوئی معبودِ برحق نہیں، میں گواہی دیتا ہوں کہ محمد ﷺ اللہ کے رسول ہیں، نماز کے لیے آؤ، کامیابی کے لیے آؤ، یقیناً نماز کھڑی ہوگئی، یقیناً نماز کھڑی ہوگئی، اللہ سب سے بڑا ہے، اللہ سب سے بڑا ہے، اللہ کے سوا کوئی معبودِ برحق نہیں“۔

ابراہیم بن عبد العزیز بن عبد الملک بن ابی محذورہ رحمہ اللہ فرماتے ہیں کہ میں نے اپنے باپ اور دادا سے سنا، وہ دونوں سیدنا ابی محذورہ رضی اللہ عنہ سے نقل فرماتے ہیں کہ وہ نبی ﷺ کے لیے اذان دیتے تھے، اقامت ایک مرتبہ کہتے مگر «قَدْ قَامَتِ الصَّلَاةُ» دو مرتبہ۔