صحيح الادب المفرد

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بدگمانی سے بچو، کیونکہ بدگمانی سب سے جھوٹی بات ہے، اور جاسوسی نہ کرو، ایک دوسرے سے (دنیا میں) مقابلہ بازی نہ کرو، ایک دوسرے سے پیٹھ نہ پھیرو، ایک دوسرے سے حسد نہ کرو، ایک دوسرے سے بغض نہ رکھو، اور اے اللہ کے بندو! بھائی بھائی بن جاؤ۔“

سیدنا انس رضی اللہ عنہ سے روایت ہے، انہوں نے کہا: ایک مرتبہ نبی صلی اللہ علیہ وسلم اپنی ازواج میں سے ایک خاتون کے ساتھ تھے کہ آپ کے پاس سے ایک آدمی گزرا، نبی صلی اللہ علیہ وسلم نے اسے بلایا اور فرمایا: ”اے فلاں! یہ میری بیوی فلاں ہے۔“ اس نے کہا: جس کسی کے بارے میں میں (برا) گمان کر سکتا تھا، آپ کے بارے میں تو میں (ایسا) گمان نہیں کر سکتا تھا۔ آپ صلی اللہ علیہ وسلم نے فرمایا: ”بیشک شیطان ابن آدم میں خون کی طرح گردش کرتا ہے۔“

سیدنا عبداللہ رضی اللہ عنہ سے روایت ہے، انہوں نے فرمایا: ”جس کی چوری ہوئی ہو وہ (لوگوں کے بارے میں) بدگمانی کرتا رہتا ہے یہاں تک کہ وہ (گناہ میں) چور سے بھی بڑھ جاتا ہے۔“