صحيح الادب المفرد

ابوالعالیہ سے روایت ہے، انہوں نے کہا: ”میں سیدنا ابن عباس رضی اللہ عنہما کے ساتھ ایک تخت پر بیٹھا ۔“ اور ابوجمرہ سے ایک روایت میں ہے، انہوں نے کہا: میں سیدنا ابن عباس رضی اللہ عنہما کے ساتھ بیٹھا کرتا تھا، وہ مجھے اپنے تخت پر بٹھاتے تھے، (ایک دن) انہوں نے مجھ سے فرمایا: ”میرے پاس ٹھہر جاؤ یہاں تک کہ میں تمہارے لیے اپنے مال میں سے ایک حصہ مقرر کر دوں ۔“ چنانچہ میں ان کے پاس دو مہینے ٹھہرا رہا۔

خالد بن دینار ابوخلدہ سے روایت ہے، انہوں نے کہا: میں نے سیدنا انس بن مالک رضی اللہ عنہ کو — جبکہ وہ بصرہ کے امیر حکم کے ساتھ تخت پر تھے — فرماتے ہوئے سنا: ”نبی صلی اللہ علیہ وسلم جب گرمی ہوتی تو نماز ٹھنڈے وقت میں پڑھتے، اور جب سردی ہوتی تو نماز جلدی پڑھتے ۔“

سیدنا انس بن مالک رضی اللہ عنہ سے روایت ہے، انہوں نے کہا: میں نبی صلی اللہ علیہ وسلم کے پاس گیا جبکہ آپ ایک چارپائی پر تھے جو کھجور کی رسی سے بُنی ہوئی تھی، آپ کے سر کے نیچے چمڑے کا ایک تکیہ تھا جس میں کھجور کی چھال بھری ہوئی تھی، آپ کی جلد اور چارپائی کے درمیان کوئی کپڑا نہ تھا۔ پھر سیدنا عمر رضی اللہ عنہ آپ کے پاس آئے تو رو پڑے، نبی صلی اللہ علیہ وسلم نے ان سے فرمایا : ”اے عمر! تمہیں کس چیز نے رلایا؟“ انہوں نے کہا: اللہ کی قسم! اے اللہ کے رسول! میں اس لیے نہیں روتا کہ مجھے یہ معلوم نہ ہو کہ آپ اللہ کے نزدیک کسریٰ اور قیصر سے زیادہ معزز ہیں، (لیکن) وہ دونوں دنیا کی جن (نعمتوں) میں ہیں ان میں مزے اڑا رہے ہیں، اور آپ، اے اللہ کے رسول! اس حال میں ہیں جو میں دیکھ رہا ہوں! تو نبی صلی اللہ علیہ وسلم نے فرمایا : ”اے عمر! کیا تم اس پر راضی نہیں کہ ان کے لیے دنیا ہو اور ہمارے لیے آخرت؟“ (سیدنا عمر رضی اللہ عنہ نے) کہا: کیوں نہیں، اے اللہ کے رسول! آپ صلی اللہ علیہ وسلم نے فرمایا : ”تو بات ایسے ہی ہے ۔“

سیدنا ابورفاعہ عدوی رضی اللہ عنہ سے روایت ہے، انہوں نے کہا: میں نبی صلی اللہ علیہ وسلم کے پاس پہنچا جبکہ آپ خطبہ دے رہے تھے، میں نے عرض کیا: اے اللہ کے رسول! ایک اجنبی آدمی اپنے دین کے بارے میں پوچھنے آیا ہے، اسے معلوم نہیں کہ اس کا دین کیا ہے؟ تو آپ میری طرف متوجہ ہوئے اور اپنا خطبہ چھوڑ دیا، پھر ایک کرسی لائی گئی، میرا خیال ہے کہ اس کے پائے لوہے کے تھے — حمید نے کہا: میرا خیال ہے کہ وہ سیاہ لکڑی تھی جسے انہوں نے لوہا سمجھا — آپ اس پر بیٹھ گئے اور مجھے اس (علم) میں سے سکھانے لگے جو اللہ نے آپ کو سکھایا تھا، پھر آپ نے اپنا خطبہ اس کے آخر تک مکمل فرمایا۔

عمران بن مسلم سے روایت ہے، انہوں نے کہا: ”میں نے سیدنا انس رضی اللہ عنہ کو ایک تخت پر بیٹھے دیکھا، انہوں نے اپنا ایک پاؤں دوسرے پر رکھا ہوا تھا ۔“