صحيح الادب المفرد

مسلم بن نذیر سے روایت ہے، انہوں نے کہا: ایک آدمی نے سیدنا حذیفہ رضی اللہ عنہ سے اجازت طلب کی، اس نے (اندر) جھانکا اور کہا: کیا میں اندر آ جاؤں ؟ سیدنا حذیفہ رضی اللہ عنہ نے فرمایا : ”تمہاری آنکھ تو داخل ہو چکی، البتہ تمہاری سرین داخل نہیں ہوئی ۔“

رسول اللہ صلی اللہ علیہ وسلم کے آزاد کردہ غلام سیدنا ثوبان رضی اللہ عنہ سے روایت ہے کہ نبی صلی اللہ علیہ وسلم نے فرمایا : ”کسی مسلمان آدمی کے لیے حلال نہیں کہ وہ کسی گھر کے اندر نظر ڈالے یہاں تک کہ اجازت لے لے، اگر اس نے ایسا کیا تو گویا وہ داخل ہو گیا۔ اور نہ وہ کسی قوم کی امامت کرے کہ انہیں چھوڑ کر صرف اپنے لیے دعا کرے یہاں تک کہ (نماز سے) فارغ ہو جائے۔ اور نہ اس حال میں نماز پڑھے کہ وہ پیشاب روکے ہوئے ہو یہاں تک کہ (قضائے حاجت کر کے) ہلکا ہو جائے ۔“ ابو عبداللہ (امام بخاری) نے کہا: اس باب میں جو کچھ روایت کیا جاتا ہے اس میں سب سے صحیح یہی حدیث ہے ۔