صحيح الادب المفرد

سیدنا عبداللہ بن عمر رضی اللہ عنہما سے روایت ہے کہ جب انہیں چھینک آتی اور ان سے کہا جاتا: یرحمک اللہ، تو وہ کہتے: «يرحمنا الله وإياكم، ويغفر لنا ولكم» ”اللہ ہم پر اور تم پر رحم کرے اور ہمیں اور تمہیں بخش دے۔“

سیدنا عبداللہ (بن مسعود) رضی اللہ عنہ سے روایت ہے، انہوں نے فرمایا: ”جب تم میں سے کسی کو چھینک آئے تو وہ کہے: «الحمد لله رب العالمين» (تمام تعریفیں اللہ کے لیے ہیں جو تمام جہانوں کا رب ہے)، اور جو جواب دے وہ کہے: «يرحمك الله» (اللہ تجھ پر رحم کرے)، اور وہ (چھینکنے والا) خود کہے: «يغفر الله لي ولكم» (اللہ مجھے اور تمہیں بخش دے)۔“

سیدنا سلمہ (بن اکوع) رضی اللہ عنہ سے روایت ہے، انہوں نے کہا: نبی صلی اللہ علیہ وسلم کے پاس ایک آدمی کو چھینک آئی تو آپ نے فرمایا: ”یرحمک اللہ (اللہ تجھ پر رحم کرے)“، پھر اسے دوبارہ چھینک آئی تو نبی صلی اللہ علیہ وسلم نے فرمایا: ”اسے زکام ہے۔“