صحيح الادب المفرد

سیدنا ابن مسعود رضی اللہ عنہ نبی صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا : ”مسلمان کے مسلمان پر چار حق ہیں: جب وہ بیمار ہو تو اس کی عیادت کرے، جب وہ فوت ہو جائے تو اس (کے جنازے) میں حاضر ہو، جب وہ اسے دعوت دے تو اس کی دعوت قبول کرے، اور جب اسے چھینک آئے تو اسے (یرحمک اللہ کہہ کر) دعا دے۔“

سیدنا براء بن عازب رضی اللہ عنہ سے روایت ہے، انہوں نے کہا: ”رسول اللہ صلی اللہ علیہ وسلم نے ہمیں سات چیزوں کا حکم دیا اور سات چیزوں سے منع فرمایا۔ آپ نے ہمیں حکم دیا: مریض کی عیادت کرنے، جنازوں کے ساتھ جانے، چھینکنے والے کو (یرحمک اللہ کہہ کر) دعا دینے، قسم کھانے والے کی قسم پوری کرنے، مظلوم کی مدد کرنے، سلام کو عام کرنے اور دعوت دینے والے کی دعوت قبول کرنے کا۔ اور ہمیں منع فرمایا: سونے کی انگوٹھیوں سے، چاندی کے برتنوں سے، ریشمی زین پوشوں (میاثر) سے، قسی (ریشم ملے کپڑوں) سے، استبرق (موٹے ریشم) سے، دیباج (باریک ریشم) سے اور حریر (خالص ریشم) سے۔“