صحيح الادب المفرد

سیدنا ابن عمر رضی اللہ عنہما سے روایت ہے، انہوں نے فرمایا: رسول اللہ صلی اللہ علیہ وسلم کے زمانے میں مشرق کی طرف سے دو خطیب آدمی آئے، وہ کھڑے ہوئے اور گفتگو کی پھر بیٹھ گئے۔ پھر رسول اللہ صلی اللہ علیہ وسلم کے خطیب سیدنا ثابت بن قیس رضی اللہ عنہ کھڑے ہوئے اور گفتگو کی۔ لوگوں کو ان دونوں کے کلام پر تعجب ہوا۔ پھر رسول اللہ صلی اللہ علیہ وسلم خطبہ دینے کے لیے کھڑے ہوئے اور فرمایا: ”اے لوگو! اپنی (سیدھی سادی) بات کہو، کیونکہ باتوں کو (تکلف سے) باریک بنانا شیطان کی طرف سے ہے۔“ پھر رسول اللہ صلی اللہ علیہ وسلم نے فرمایا: ”بیشک بعض بیان جادو (کا سا اثر رکھتے) ہیں۔“

سیدنا انس رضی اللہ عنہ سے روایت ہے، انہوں نے کہا: ایک آدمی نے سیدنا عمر رضی اللہ عنہ کے پاس خطبہ دیا اور بہت زیادہ باتیں کیں، تو سیدنا عمر رضی اللہ عنہ نے فرمایا: ”خطبوں میں زیادہ باتیں کرنا شیطان کی بکواس (میں سے) ہے۔“

سیدنا ابویزید - یا معن بن یزید - رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”اپنی مسجدوں میں جمع ہوا کرو، اور جب بھی کوئی قوم جمع ہو تو مجھے اطلاع دے۔“ چنانچہ (جب ہم جمع ہوئے تو) آپ سب سے پہلے ہمارے پاس تشریف لائے اور بیٹھ گئے۔ ہم میں سے ایک بولنے والے نے گفتگو کی، پھر کہا: بیشک تمام تعریف اللہ کے لیے ہے جس کے سوا حمد کا کوئی مقصود نہیں اور نہ اس سے آگے کوئی راستہ ہے۔ اس پر آپ ناراض ہو کر اٹھ کھڑے ہوئے۔ ہم نے آپس میں ایک دوسرے کو ملامت کی اور کہا: آپ سب سے پہلے ہمارے پاس تشریف لائے تھے (اور ہم نے آپ کو ناراض کر دیا)۔ پھر آپ ایک دوسری مسجد میں جا کر بیٹھ گئے، ہم آپ کے پاس گئے اور آپ سے بات کی، تو آپ ہمارے ساتھ تشریف لائے اور اپنی (پہلی) جگہ پر یا اس کے قریب بیٹھ گئے، پھر فرمایا: ”تمام تعریف اللہ کے لیے ہے جس نے جو چاہا اپنے آگے رکھا اور جو چاہا اپنے پیچھے رکھا، اور بیشک بعض بیان جادو (کا سا اثر رکھتے) ہیں۔“ پھر آپ نے ہمیں (کچھ باتوں کا) حکم دیا اور ہمیں تعلیم دی۔