المستدرك على الصحيحين

سیدنا محجن بن ادرع رضی اللہ عنہ سے روایت ہے کہ رسول اللہ ﷺ نے مجھے کسی کام سے بھیجا، پھر آپ ﷺ مجھے مدینہ کے کسی راستے میں ملے، پھر آپ ﷺ احد (پہاڑ) پر چڑھے اور میں بھی آپ ﷺ کے ساتھ چڑھا، تو آپ ﷺ نے اپنا رخ مدینہ کی طرف کیا اور اس (شہر) کے بارے میں کچھ ارشاد فرمایا، پھر فرمایا: ”تیری ماں ہلاک ہو (یا اس کی ماں ہلاک ہو) - یہ ایسی بستی ہے کہ اس کے رہنے والے اسے اس وقت (ویران) چھوڑ دیں گے جب وہ اپنی پوری شادابی اور پھلوں کے پکنے کے عروج پر ہوگی، پرندے اور درندے اس کے پھل کھائیں گے - اور اس میں دجال داخل نہیں ہو سکے گا، ان شاء اللہ، وہ جب بھی اس میں داخل ہونے کا ارادہ کرے گا تو اس کے ہر راستے پر ننگی تلوار لیے ہوئے ایک فرشتہ اس کا سامنا کرے گا جو اسے اس سے روک دے گا۔“
یہ حدیث صحیح الاسناد ہے، لیکن شیخین نے اسے روایت نہیں کیا۔

سیدنا ابی بن کعب رضی اللہ عنہ سے اللہ تعالیٰ کے اس فرمان ﴿وَلَنُذِيقَنَّهُم مِن الْعَذَابِ الْأَدْنَى دُونَ الْعَذَابِ الْأَكْبَرِ﴾ [سورة السجدة: 21] کے متعلق مروی ہے، انہوں نے کہا: (عذابِ ادنیٰ سے مراد) دنیا کی مصیبتیں ہیں: اہل روم (کے ساتھ جنگ)، سخت پکڑ (بَطْشہ) اور دھواں؛ (راوی نے) کہا: پھر وہ تھوڑی دیر خاموش رہے اور فرمایا: وہ (عذابِ اکبر) دجال ہے۔
یہ حدیث صحیح الاسناد ہے، لیکن شیخین نے اسے روایت نہیں کیا۔ میں نے ابوعلی الحافظ سے اس (سند میں موجود) «عزرة» کے بارے میں پوچھا تو انہوں نے کہا: یہ «عزرة بن يحيى» ہیں، جبکہ شعبہ نے قتادہ سے، انہوں نے «عزرة بن تميم» سے روایت کی ہے۔