المستدرك على الصحيحين

سیدنا جابر بن عبداللہ رضی اللہ عنہما سے روایت ہے کہ نبی کریم ﷺ نے کعب بن عجرہ رضی اللہ عنہ سے فرمایا: ”اے کعب! اللہ تمہیں بیوقوفوں کی حکمرانی سے اپنی پناہ میں رکھے۔“ انہوں نے عرض کیا: یا رسول اللہ! بیوقوفوں کی حکمرانی سے کیا مراد ہے؟ آپ ﷺ نے فرمایا: ”میرے بعد ایسے حکمران ہوں گے جو نہ میری ہدایت پر چلیں گے اور نہ میری سنت کی پیروی کریں گے، پس جس نے ان کے جھوٹ میں ان کی تصدیق کی اور ان کے ظلم پر ان کی مدد کی، تو ایسے لوگ نہ مجھ سے ہیں اور نہ میں ان سے ہوں، اور وہ میرے حوض پر نہیں آ سکیں گے، اور جس نے ان کے جھوٹ میں ان کی تصدیق نہیں کی اور نہ ہی ان کے ظلم پر ان کی مدد کی، تو وہ لوگ مجھ سے ہیں اور میں ان سے ہوں، اور وہ میرے حوض پر ضرور وارد ہوں گے۔ اے کعب بن عجرہ! روزہ ڈھال ہے، صدقہ گناہوں کو مٹا دیتا ہے، اور نماز قرب الٰہی کا ذریعہ ہے (یا آپ ﷺ نے فرمایا: دلیل و برہان ہے)۔ اے کعب بن عجرہ! وہ گوشت کبھی جنت میں داخل نہیں ہوگا جو حرام مال «سُحْت» سے پلا ہو، اس کے لیے تو آگ ہی زیادہ بہتر ہے۔ اے کعب بن عجرہ! لوگ دو طرح کے ہوتے ہیں: ایک وہ جو اپنی جان کا سودا کر کے اسے (اللہ کی اطاعت سے) آزاد کرا لیتا ہے، اور دوسرا وہ جو اپنی جان کو (شیطان کے ہاتھ) بیچ کر اسے ہلاک کر لیتا ہے۔“
یہ حدیث صحیح الاسناد ہے، لیکن شیخین نے اسے روایت نہیں کیا۔

سیدنا عوف بن مالک اشجعی رضی اللہ عنہ سے روایت ہے، انہوں نے کہا: ہم رسول اللہ ﷺ کے ساتھ غزوہ تبوک میں تھے اور رسول اللہ ﷺ چمڑے کے ایک چھوٹے خیمے میں تشریف فرما تھے، میں وہاں سے گزرا تو آپ ﷺ نے میری آواز سن کر فرمایا: ”اے عوف بن مالک! اندر آ جاؤ۔“ میں نے عرض کیا: ”یا رسول اللہ! پورا کا پورا یا میرا کچھ حصہ؟“ آپ ﷺ نے فرمایا: ”بلکہ پورے کے پورے آ جاؤ۔“ وہ کہتے ہیں کہ میں اندر داخل ہو گیا، تو آپ ﷺ نے فرمایا: ”اے عوف! قیامت سے پہلے چھ چیزیں شمار کر لو۔“ میں نے عرض کیا: ”یا رسول اللہ! وہ کیا ہیں؟“ آپ ﷺ نے فرمایا: ”رسول اللہ کی وفات۔“ یہ سن کر سیدنا عوف رونے لگے، پھر رسول اللہ ﷺ نے فرمایا: ”کہو: ایک۔“ میں نے کہا: ”ایک۔“ پھر آپ ﷺ نے فرمایا: ”بیت المقدس کی فتح، کہو: دو۔“ میں نے کہا: ”دو۔“ آپ ﷺ نے فرمایا: ”اور ایک ایسی موت جو میری امت میں اس طرح پھیلے گی جیسے بکریوں میں «قُعَاصِ» یعنی گردن توڑ بخار کی بیماری پھیلتی ہے، کہو: تین۔“ میں نے کہا: ”تین۔“ آپ ﷺ نے فرمایا: ”اور لوگوں کے لیے دنیا کی دولت کھول دی جائے گی یہاں تک کہ ایک آدمی کو سو دینار دیے جائیں گے تو وہ اسے کم سمجھ کر اس پر ناراض ہوگا، کہو: چار۔“ میں نے کہا: ”چار۔“ آپ ﷺ نے فرمایا: ”اور ایسا فتنہ ہوگا جس سے مسلمانوں کا کوئی گھر ایسا نہ بچے گا جس میں وہ داخل نہ ہو، کہو: پانچ۔“ میں نے کہا: ”پانچ۔“ آپ ﷺ نے فرمایا: ”اور تمہارے اور بنو اصفر یعنی رومیوں کے درمیان صلح ہوگی، پھر وہ تمہارے پاس اسی (80) جھنڈوں کے تلے آئیں گے اور ہر جھنڈے کے نیچے بارہ ہزار فوجی ہوں گے، پھر وہ تمہارے ساتھ غداری کریں گے یہاں تک کہ حاملہ عورت کے پیٹ کے بچے کے متعلق بھی غداری کریں گے۔“ راوی کہتے ہیں کہ جب طاعونِ عمواس کا سال آیا تو عوف بن مالک نے سیدنا معاذ بن جبل رضی اللہ عنہ سے کہا کہ رسول اللہ ﷺ نے مجھ سے فرمایا تھا کہ قیامت سے پہلے چھ چیزیں شمار کر لو، ان میں سے تین واقع ہو چکی ہیں اور تین باقی ہیں۔ سیدنا معاذ نے فرمایا: ان کے لیے ایک مدت مقرر ہے، لیکن پانچ فتنے تم پر سایہ فگن ہو چکے ہیں، جو ان میں سے کسی کو پائے اور اسے موت مل سکے تو وہ مر جائے: منبروں پر ایک دوسرے پر لعنت بھیجنے کا رواج ہو جانا، جھوٹ اور بہتان پر اللہ کا مال یعنی سرکاری وظیفہ تقسیم کیا جانا، ناحق خون بہایا جانا، قطع رحمی کرنا، اور آدمی اس حال میں صبح کرے کہ اسے پتہ نہ ہو کہ وہ ہدایت پر ہے یا گمراہی پر۔
یہ حدیث شیخین کی شرط پر صحیح ہے، لیکن انہوں نے اسے اس سیاق کے ساتھ روایت نہیں کیا۔