المستدرك على الصحيحين

سیدنا عبداللہ بن مغفل رضی اللہ عنہ سے روایت ہے کہ جاہلیت کے زمانے میں ایک عورت بدکار تھی، اس کے پاس سے ایک شخص گزرا تو اس نے اس کی طرف ہاتھ بڑھایا اور اس سے چھیڑ چھاڑ کی، اس عورت نے کہا: ”رک جاؤ! بیشک اللہ تعالیٰ نے شرک کو ختم کر دیا ہے اور اسلام لے آیا ہے“، چنانچہ وہ شخص اسے چھوڑ کر پیٹھ پھیر کر چل دیا، لیکن وہ مڑ مڑ کر اسے دیکھنے لگا یہاں تک کہ (توجہ ہٹنے کی وجہ سے) اس کا چہرہ دیوار سے جا ٹکرایا، راوی کہتے ہیں: وہ شخص نبی کریم ﷺ کی بارگاہ میں حاضر ہوا اور آپ ﷺ سے اس واقعے کا ذکر کیا، تو آپ ﷺ نے فرمایا: ”تم وہ بندے ہو جس کے ساتھ اللہ نے خیر کا ارادہ فرمایا ہے، بیشک اللہ جب کسی بندے کے ساتھ خیر کا ارادہ فرماتا ہے تو اس کے گناہ کی سزا اسے دنیا ہی میں جلد دے دیتا ہے، اور جب کسی بندے کے ساتھ شر کا ارادہ فرماتا ہے تو اس کے گناہ کی سزا (دنیا میں) روک لیتا ہے یہاں تک کہ قیامت کے دن اسے اس کا پورا بدلہ دیا جائے جیسے وہ ایک بوجھ ڈھونے والا گدھا ہو۔“
یہ حدیث صحیح الاسناد ہے لیکن شیخین نے اسے روایت نہیں کیا۔

ابوشہم رضی اللہ عنہ سے روایت ہے، انہوں نے کہا: میں مدینہ منورہ میں تھا کہ میرے پاس سے ایک لونڈی گزری تو میں نے اسے اس کی کمر سے پکڑ لیا، پھر میں نبی کریم ﷺ کی خدمت میں حاضر ہوا جبکہ آپ ﷺ لوگوں سے بیعت لے رہے تھے، آپ ﷺ نے مجھ سے فرمایا: ”کیا تم وہی نہیں ہو جس نے کل اسے پکڑا تھا؟“ میں نے عرض کی: اے اللہ کے رسول! اب دوبارہ ایسا نہیں کروں گا، چنانچہ آپ ﷺ نے مجھ سے بیعت لے لی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔