المستدرك على الصحيحين

سیدنا زید بن ارقم رضی اللہ عنہ سے روایت ہے کہ ایک شخص نبی کریم ﷺ کے پاس آیا جایا کرتا تھا، اس نے آپ ﷺ پر جادو کر دیا اور (دھاگے میں) گرہیں لگا دیں، پھر اس نے اسے ایک انصاری شخص کے کنویں میں ڈال دیا۔ چنانچہ آپ ﷺ کے پاس دو فرشتے آپ ﷺ کی عیادت کے لیے آئے، ان میں سے ایک آپ ﷺ کے سرہانے بیٹھ گیا اور دوسرا قدموں کی طرف، ایک نے پوچھا: کیا آپ جانتے ہیں کہ آپ ﷺ کو کیا تکلیف ہے؟ دوسرے نے کہا: فلاں شخص جو آپ ﷺ کے پاس آتا تھا اس نے آپ ﷺ پر گرہیں لگا کر جادو کیا ہے اور اسے فلاں انصاری کے کنویں میں پھینک دیا ہے، اگر آپ ﷺ کسی کو بھیجیں تو وہ وہاں سے ان گرہوں کو نکال لائے۔ (چنانچہ ایسا ہی کیا گیا) تو دیکھا کہ وہاں کا پانی زرد ہو چکا تھا۔ راوی کہتے ہیں کہ آپ ﷺ نے وہ گرہیں لیں اور انہیں کھول دیا (جس سے جادو کا اثر ختم ہو گیا)۔ وہ شخص اس کے بعد بھی نبی کریم ﷺ کی خدمت میں حاضر ہوتا رہا لیکن آپ ﷺ نے کبھی اس سے اس کا ذکر کیا اور نہ ہی اسے ملامت کی۔
یہ حدیث شیخین کی شرط پر صحیح ہے لیکن شیخین نے اسے روایت نہیں کیا۔

حسن بصری سے روایت ہے کہ کوفہ کے امراء میں سے ایک امیر نے ایک جادوگر کو بلایا جو لوگوں کے سامنے کرتب دکھا رہا تھا، جب سیدنا جندب رضی اللہ عنہ کو یہ خبر پہنچی تو وہ اپنی تلوار لے کر آئے جسے انہوں نے کپڑوں میں چھپا رکھا تھا، جب انہوں نے اسے دیکھا تو تلوار کے ایک وار سے اسے قتل کر دیا، لوگ وہاں سے تتر بتر ہو گئے تو انہوں نے فرمایا: ”اے لوگو! گھبراؤ نہیں، میں نے صرف جادوگر کو نشانہ بنانا تھا“، امیر نے انہیں پکڑ کر قید کر دیا، جب یہ بات سیدنا سلمان رضی اللہ عنہ تک پہنچی تو انہوں نے فرمایا: ”ان دونوں نے ہی برا کیا، اس امیر کو زیب نہیں دیتا تھا کہ وہ ایک پیشوا (امام) ہو کر جادوگر کو کرتب دکھانے کے لیے بلائے، اور اس (جندب) کے لیے بھی یہ مناسب نہیں تھا کہ وہ اپنے امیر کی اصلاح یا سرزنش تلوار کے ذریعے کرتا۔“