المستدرك على الصحيحين

سیدنا جابر رضی اللہ عنہ سے روایت ہے کہ رسول اللہ ﷺ نے اس بات سے منع فرمایا کہ ایک دوسرے کو ننگی تلوار (میان سے باہر) پکڑائی جائے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا ابوبکرہ رضی اللہ عنہ بیان کرتے ہیں کہ رسول اللہ ﷺ کا گزر کچھ لوگوں کے پاس سے ہوا جو ننگی تلوار ایک دوسرے کو پکڑا رہے تھے، آپ ﷺ نے فرمایا: ”اللہ اس پر لعنت کرے جو ایسا کرے، کیا میں نے اس سے منع نہیں کیا تھا؟ جب تم میں سے کوئی تلوار میان سے نکال کر اسے دیکھ لے اور پھر اپنے بھائی کو دینا چاہے تو پہلے اسے میان میں ڈالے، پھر اسے پکڑائے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا قیس بن سعد بن عبادہ رضی اللہ عنہ سے روایت ہے کہ ان کے والد نے انہیں نبی کریم ﷺ کی خدمت کے لیے پیش کر دیا تھا، وہ بیان کرتے ہیں کہ میں دو رکعت نماز پڑھ رہا تھا کہ نبی کریم ﷺ میرے پاس تشریف لائے اور مجھے اپنے پاؤں (مبارک) سے اشارہ کیا اور فرمایا: ”کیا میں تمہیں جنت کے دروازوں میں سے ایک دروازے (کی کنجی) کے بارے میں نہ بتاؤں؟“ میں نے عرض کیا: کیوں نہیں اے اللہ کے رسول! آپ ﷺ نے فرمایا: ”«لَا حَوْلَ وَلَا قُوَّةَ إِلَّا بِاللَّهِ» (کہا کرو)۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ امام حاکم فرماتے ہیں کہ اس سے ثابت ہوتا ہے کہ والد کے لیے جائز ہے کہ وہ اپنی اولاد کو (بزرگوں کی) خدمت کے لیے پیش کرے، نیز قیس بن سعد رضی اللہ عنہ کی فضیلت واضح ہوتی ہے کہ انہوں نے نبی ﷺ کی اس قدر خدمت کی کہ آپ کے دستِ راست (صاحب الشرط) کی طرح ہو گئے اور پھر امیر المؤمنین علی بن ابی طالب رضی اللہ عنہ کا ساتھ بھی ہر حال میں دیا یہاں تک کہ جنگ صفین میں ان کے سامنے شہادت پائی۔