المستدرك على الصحيحين

سیدنا ابوہریرہ رضی اللہ عنہ سے روایت ہے کہ مہاجرین کے بیٹوں میں سے ایک نوجوان رسول اللہ ﷺ کی خدمت میں حاضر ہوا اور عرض کیا: اے اللہ کے رسول ﷺ! میرے لیے مغفرت کی دعا فرمائیں، رسول اللہ ﷺ کسی کام میں مصروف تھے، اس نے تین بار اپنی بات دہرائی، جب اس نے دیکھا کہ رسول اللہ ﷺ اس کے لیے استغفار نہیں فرما رہے تو اس نوجوان نے رسول اللہ ﷺ کے سامنے تین بار یہ کہا: «اللَّهُمَّ اغْفِرْ لِي، اللَّهُمَّ اغْفِرْ لِي، اللَّهُمَّ اغْفِرْ لِي، فَإِنَّ رَسُولَكَ لَمْ يَسْتَغْفِرْ لِي» ”اے اللہ! مجھے معاف فرما دے، اے اللہ! مجھے معاف فرما دے، اے اللہ! مجھے معاف فرما دے کیونکہ تیرے رسول نے میرے لیے مغفرت کی دعا نہیں فرمائی“، جب وہ نوجوان چلا گیا تو جبرائیل علیہ السلام رسول اللہ ﷺ کے پاس نازل ہوئے اور عرض کیا: اے اللہ کے رسول ﷺ! آپ نے اس نوجوان کے لیے استغفار کیوں نہ کیا؟ اللہ نے تو اسے معاف فرما دیا ہے، پس آپ اس کے پیچھے جائیں یہاں تک کہ اسے بتا دیں کہ اللہ نے اسے معاف کر دیا ہے اور اسے کہیں کہ وہ آپ کے لیے مغفرت کی دعا کرے، چنانچہ رسول اللہ ﷺ اس کے پیچھے تیزی سے تشریف لے گئے یہاں تک کہ اسے پا لیا، جب اسے ملے تو فرمایا: ”اے نوجوان! بے شک اللہ عزوجل نے تمہیں معاف فرما دیا ہے، اب تم میرے لیے مغفرت کی دعا کرو“، تو اس نوجوان نے کہا: «اللَّهُمَّ أَسْتَغْفِرُكَ لِرَسُولِكَ، اللَّهُمَّ إِنِّي أَسْتَغْفِرُكَ لِرَسُولِكَ وَنَبِيِّكَ كَمَا غَفَرْتَ لِي، إِنَّكَ وَاسِعُ الْمَغْفِرَةِ، وَأَنْتَ أَرْحَمُ الرَّاحِمِينَ» ”اے اللہ! میں تیرے رسول کے لیے تجھ سے مغفرت مانگتا ہوں، اے اللہ! میں تیرے رسول اور تیرے نبی کے لیے تجھ سے مغفرت کا طلبگار ہوں جیسے تو نے مجھے معاف فرمایا، بے شک تو وسیع مغفرت والا اور سب سے بڑھ کر رحم فرمانے والا ہے“۔

سیدنا ابوہریرہ رضی اللہ عنہ سے اسی طرح کی حدیث روایت ہے،
یہ حدیث اسناد اور متن کے اعتبار سے غریب ہے، اس کے تمام راوی ثقہ ہیں سوائے محمد بن ابی مسلم کے جو کہ مجہول ہیں، واللہ اعلم۔