المستدرك على الصحيحين

سیدنا سلمان فارسی رضی اللہ عنہ سے روایت ہے کہ رسول اللہ ﷺ نے فرمایا: ”اللہ تعالیٰ نے جس دن آسمانوں اور زمین کو پیدا کیا، اسی دن سو رحمتیں پیدا فرمائیں، ہر رحمت اتنی وسعت رکھتی ہے جتنا زمین و آسمان کے درمیان خلا ہے، اللہ نے ان میں سے ایک رحمت تمام مخلوقات کے درمیان تقسیم فرمائی ہے جس کی وجہ سے ماں اپنے بچے پر شفقت کرتی ہے، جنگلی جانور اور پرندے پانی پیتے ہیں اور اسی کی بدولت تمام مخلوقات ایک دوسرے پر رحم کرتی ہیں، پس جب قیامت کا دن ہوگا تو اللہ تعالیٰ (اس ایک رحمت کو بھی) اپنے پاس سمیٹ کر متقین کے لیے خاص کر لے گا اور ان کے لیے اسے ننانوے رحمتوں کے ساتھ مزید بڑھا دے گا۔“
یہ حدیث امام مسلم کی شرط پر صحیح ہے لیکن شیخین نے اسے اس سیاق کے ساتھ روایت نہیں کیا۔

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے فرمایا: ”بے شک اللہ تعالیٰ کی سو رحمتیں ہیں، اس نے ایک رحمت دنیا والوں کے درمیان تقسیم فرمائی جو ان کی زندگیوں کے خاتمے تک انہیں کافی ہے، اور ننانوے رحمتیں اپنے اولیاء کے لیے (آخرت میں) محفوظ کر رکھی ہیں، اور اللہ تعالیٰ اس ایک رحمت کو بھی، جو اس نے دنیا والوں میں تقسیم فرمائی تھی، قیامت کے دن ان ننانوے کے ساتھ ملا لے گا تاکہ اپنے اولیاء کے لیے سو رحمتیں مکمل فرما دے۔“
یہ حدیث شیخین کی شرط پر صحیح ہے لیکن انہوں نے اسے اس سیاق کے ساتھ روایت نہیں کیا۔

سیدنا جندب رضی اللہ عنہ سے روایت ہے کہ ایک دیہاتی آیا، اس نے اپنی اونٹنی بٹھا کر اسے باندھ دیا، پھر رسول اللہ ﷺ کے پیچھے نماز پڑھی، جب رسول اللہ ﷺ نے سلام پھیرا تو وہ اپنی اونٹنی کے پاس گیا، اس کا بندھن کھولا، اس پر سوار ہوا اور پکار کر کہنے لگا: ”اے اللہ! مجھ پر اور محمد (ﷺ) پر رحم فرما اور ہماری اس رحمت میں کسی اور کو شریک نہ کر“، تو نبی کریم ﷺ نے فرمایا: ”تمہارا کیا خیال ہے، یہ زیادہ بھٹکا ہوا ہے یا اس کا اونٹ؟ کیا تم نے نہیں سنا جو اس نے کہا؟“ صحابہ نے عرض کیا: جی ہاں، آپ ﷺ نے فرمایا: ”اس نے اللہ کی وسیع رحمت کو محدود کر دیا، اللہ نے سو رحمتیں پیدا کی ہیں، پھر ایک رحمت نازل فرمائی جس کی وجہ سے تمام مخلوقات، جنات، انسان اور چوپائے آپس میں ایک دوسرے پر شفقت کرتے ہیں، جبکہ ننانوے رحمتیں اللہ کے پاس محفوظ ہیں، (اب بتاؤ) یہ زیادہ بھٹکا ہوا ہے یا اس کا اونٹ؟“
یہ حدیث صحیح الاسناد ہے لیکن شیخین نے اسے روایت نہیں کیا۔