المستدرك على الصحيحين

سیدنا ابوہریرہ رضی اللہ عنہ سے روایت ہے کہ ایک شخص رسول اللہ ﷺ کی خدمت میں حاضر ہوا اور عرض کیا: یا رسول اللہ! میں سخت بھوک اور مشقت کی حالت میں ہوں، آپ ﷺ نے اپنی ازواج مطہرات کے ہاں قاصد بھیجا مگر ان کے پاس کچھ نہ ملا، تب رسول اللہ ﷺ نے فرمایا: ”کیا کوئی ایسا شخص ہے جو اس رات اس کی مہمانی کرے؟ اللہ اس پر رحم فرمائے“، تو انصار میں سے ایک صاحب کھڑے ہوئے اور عرض کیا: یا رسول اللہ! میں حاضر ہوں، وہ اسے اپنے گھر لے گئے اور اپنی اہلیہ سے کہا: رسول اللہ ﷺ کے مہمان کی خاطر تواضع کرو اور کوئی چیز بچا کر نہ رکھو، اہلیہ نے کہا: اللہ کی قسم! میرے پاس بچوں کی خوراک کے علاوہ کچھ نہیں ہے، انہوں نے کہا: جب بچے رات کا کھانا مانگیں تو انہیں سلا دینا اور تم آ کر چراغ بجھا دینا، ہم اس رات فاقہ کر لیں گے، چنانچہ انہوں نے ایسا ہی کیا، اگلی صبح وہ شخص رسول اللہ ﷺ کے پاس حاضر ہوا تو آپ ﷺ نے فرمایا: ”اللہ تعالیٰ فلاں مرد اور فلاں عورت (تم دونوں میاں بیوی) کے عمل سے بہت خوش ہوا (یا مسکرایا)“، اور اللہ تبارک و تعالیٰ نے یہ آیت نازل فرمائی: ﴿وَيُؤْثِرُونَ عَلَى أَنْفُسِهِمْ وَلَوْ كَانَ بِهِمْ خَصَاصَةٌ﴾ ”اور وہ اپنی ذات پر دوسروں کو ترجیح دیتے ہیں اگرچہ وہ خود فاقہ کشی میں ہوں“ [سورة الحشر: 9]۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

علقمہ بن عبداللہ المزنی اپنے والد سے روایت کرتے ہیں کہ رسول اللہ ﷺ نے فرمایا: ”جب تم میں سے کوئی گوشت خریدے تو اس کا شوربہ زیادہ رکھے، کیونکہ اگر کسی کو گوشت کی بوٹی نہ مل سکی تو اسے شوربہ تو مل ہی جائے گا، اور وہ (شوربہ) بھی دو قسم کے گوشتوں میں سے ایک (یعنی گوشت کا نعم البدل) ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔