المستدرك على الصحيحين

ام المومنین سیدہ حفصہ رضی اللہ عنہا سے روایت ہے کہ رسول اللہ ﷺ اپنا دایاں ہاتھ کھانے پینے اور لباس (پہننے) کے لیے استعمال فرماتے تھے، اور اس کے علاوہ دیگر کاموں کے لیے اپنا بایاں ہاتھ استعمال فرماتے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا جابر بن عبداللہ رضی اللہ عنہما سے روایت ہے، انہوں نے کہا: ہم جب رسول اللہ ﷺ کے ساتھ کھانا کھاتے تھے تو ہم اس وقت تک (کھانا) شروع نہیں کرتے تھے جب تک کہ خود رسول اللہ ﷺ آغاز نہ فرما دیتے۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا محمد بن حمزہ بن عبداللہ بن سلام اپنے والد اور وہ اپنے دادا (سیدنا عبداللہ بن سلام رضی اللہ عنہ) سے روایت کرتے ہیں کہ نبی کریم ﷺ اپنے بعض صحابہ کے ساتھ تشریف فرما تھے کہ اتنے میں سیدنا عثمان رضی اللہ عنہ ایک اونٹ ہانکتے ہوئے آئے جس پر دو بڑے تھیلے لدے ہوئے تھے اور انہوں نے اسے اونٹ کی نکیل سے تھاما ہوا تھا، تو نبی کریم ﷺ نے ان سے دریافت فرمایا: ”تمہارے پاس کیا ہے؟“ انہوں نے عرض کی: آٹا، گھی اور شہد، نبی کریم ﷺ نے ان سے فرمایا: ”(اونٹ کو) بٹھاؤ“، چنانچہ انہوں نے اسے بٹھا دیا، پھر نبی کریم ﷺ نے ایک بڑی ہانڈی منگوائی اور اس میں وہ آٹا، گھی اور شہد ڈال دیا، پھر آپ ﷺ نے اسے اچھی طرح پکایا، پھر نبی کریم ﷺ نے تناول فرمایا اور صحابہ کرام نے بھی کھایا، پھر آپ ﷺ نے ان سے فرمایا: ”کھاؤ، کیونکہ یہ اہلِ فارس کے «خبيص» (ایک خاص حلوے) کے مشابہ ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔