المستدرك على الصحيحين

محمد بن عمر سے مروی ہے کہ ان خواتین میں ام ایمن بھی ہیں جو رسول اللہ ﷺ کی آزاد کردہ لونڈی اور آیا تھیں، ان کا نام برکہ ہے، رسول اللہ ﷺ کو وہ (اپنے والد کے ترکے سے) پانچ اونٹوں اور بکریوں کے ایک ریوڑ کے ساتھ وراثت میں ملی تھیں، جب آپ ﷺ نے سیدہ خدیجہ رضی اللہ عنہا سے نکاح کیا تو ام ایمن کو آزاد کر دیا، ان کا نکاح بنو حارث بن خزرج کے عبید بن یزید سے ہوا جن سے ان کا بیٹا ایمن پیدا ہوا جو جنگِ حنین میں شہید ہوئے، اور زید بن حارثہ سیدہ خدیجہ رضی اللہ عنہا کے غلام تھے جو انہوں نے رسول اللہ ﷺ کو ہبہ کر دیے تھے، آپ ﷺ نے انہیں آزاد کر کے نبوت کے بعد ان کا نکاح ام ایمن سے کر دیا، جن سے اسامہ بن زید پیدا ہوئے۔

بنو سعد بن بکر کے ایک بزرگ سے مروی ہے کہ رسول اللہ ﷺ سیدہ ام ایمن رضی اللہ عنہا کو ”اے میری ماں!“ کہہ کر پکارتے تھے، اور جب بھی ان کی طرف دیکھتے تو فرماتے: ”یہ میرے گھر والوں کی یادگار (بقیہ) ہیں۔“