المستدرك على الصحيحين

یزید بن یزید بن جابر اپنے والد سے روایت کرتے ہیں کہ نبی کریم ﷺ نے سیدہ عائشہ رضی اللہ عنہا سے اس وقت نکاح فرمایا جب ان کی عمر سات سال تھی، اور جب ان کی رخصتی ہوئی تو ان کی عمر نو سال تھی، اور جب آپ ﷺ کی وفات ہوئی تو سیدہ کی عمر اٹھارہ سال تھی، جبکہ ان کی اپنی وفات حضرت معاویہ رضی اللہ عنہ کے زمانے میں سنہ 57 ہجری میں ہوئی تھی۔

ہشام بن عروہ سے روایت ہے کہ عروہ نے ولید بن عبدالملک بن مروان کو لکھا: رسول اللہ ﷺ نے سیدہ خدیجہ رضی اللہ عنہا کی وفات کے بعد سیدہ عائشہ رضی اللہ عنہا سے نکاح فرمایا، اور رسول اللہ ﷺ کو خواب میں تین مرتبہ ان کی زیارت کرائی گئی تھی اور (فرشتے کی جانب سے) کہا گیا: ”یہ آپ کی زوجہ عائشہ ہیں۔“ جس وقت رسول اللہ ﷺ نے ان سے نکاح فرمایا ان کی عمر چھ سال تھی، پھر جب آپ ﷺ مدینہ تشریف لائے تو نو سال کی عمر میں ان کی رخصتی ہوئی، ام المؤمنین سیدہ عائشہ رضی اللہ عنہا کی وفات (ماہِ رمضان کی) پندرہ راتیں گزرنے پر منگل کی شب نمازِ وتر کے بعد ہوئی اور اسی رات انہیں جنت البقیع میں سپردِ خاک کیا گیا، ان کی نمازِ جنازہ سیدنا ابوہریرہ رضی اللہ عنہ نے پڑھائی کیونکہ مروان اس وقت غائب تھا اور سیدنا ابوہریرہ رضی اللہ عنہ اس کی جگہ قائم مقام کی ذمہ داریاں نبھا رہے تھے۔