المستدرك على الصحيحين

خلیفہ بن خیاط سے مروی ہے کہ: اسود بن سریع بن حمیر بن عبادہ بن نزال بن مرہ بن عبید، ان کا بصرہ میں جامع مسجد کے پاس بنو تمیم والی سمت میں ایک گھر تھا اور ان کی وفات سیدنا معاویہ رضی اللہ عنہ کے دورِ خلافت میں ہوئی۔

سیدنا اسود بن سریع رضی اللہ عنہ سے روایت ہے، انہوں نے عرض کی: یا رسول اللہ! کیا میں آپ کو وہ تعریفی کلمات نہ سناؤں جن کے ذریعے میں نے اپنے رب عزوجل کی حمد بیان کی ہے؟ آپ ﷺ نے ارشاد فرمایا: ”بے شک تمہارا رب عزوجل حمد کو پسند فرماتا ہے“، اور آپ ﷺ نے اس پر مزید کچھ نہیں کہا۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا اسود بن سریع تمیمی رضی اللہ عنہ سے روایت ہے، انہوں نے کہا: میں نبی اللہ ﷺ کی خدمت میں حاضر ہوا اور عرض کی: اے اللہ کے نبی! میں نے کچھ اشعار کہے ہیں جن میں اللہ عزوجل کی ثنا بیان کی ہے اور آپ کی مدح کی ہے، آپ ﷺ نے فرمایا: ”جو تم نے اللہ کی ثنا بیان کی ہے وہ سناؤ، اور جو میری مدح کی ہے اسے رہنے دو“، چنانچہ میں سنانے لگا، اتنے میں ایک دراز قد اور نمایاں ناک والے شخص داخل ہوئے تو آپ ﷺ نے مجھ سے فرمایا: ”رک جاؤ“، جب وہ چلے گئے تو آپ ﷺ نے فرمایا: ”سناؤ“، میں پھر سنانے لگا، ابھی تھوڑی دیر ہی گزری تھی کہ وہ دوبارہ آ گئے تو آپ ﷺ نے پھر فرمایا: ”رک جاؤ“، جب وہ (دوبارہ) چلے گئے تو آپ ﷺ نے فرمایا: ”سناؤ“، میں نے عرض کی: اے اللہ کے نبی! یہ کون شخص ہیں جن کے آنے پر آپ فرماتے ہیں ”رک جاؤ“ اور چلے جانے پر فرماتے ہیں ”سناؤ“؟ آپ ﷺ نے ارشاد فرمایا: ”یہ عمر بن خطاب ہیں، اور باطل (لہو و لعب) سے ان کا کوئی تعلق نہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔