المستدرك على الصحيحين

معمر بن مثنیٰ بیان کرتے ہیں کہ: خفاف بن ایماء بن رحضہ بن خربہ بن خفاف بن حارثہ بن غفار، اپنی قوم کے عمائدین میں سے تھے، ان کے والد ایماء بن رحضہ اسلام لائے اور وہ اپنی قوم کے سردار تھے، اور سیدنا خفاف بن ایماء رضی اللہ عنہ رسول اللہ ﷺ کے ہمراہ صلح حدیبیہ میں شریک تھے۔

سیدنا ابوذر رضی اللہ عنہ سے روایت ہے، انہوں نے کہا: ہم اپنی قوم بنو غفار کے پاس آئے، تو ان میں سے کچھ لوگ رسول اللہ ﷺ کے مدینہ منورہ تشریف لانے سے پہلے ہی اسلام لا چکے تھے، اور سیدنا ایماء بن رحضہ رضی اللہ عنہ ان کی امامت کرواتے تھے اور وہی ان کے سردار تھے۔

سیدنا خفاف بن ایماء غفاری رضی اللہ عنہ سے روایت ہے، انہوں نے کہا: میں نے رسول اللہ ﷺ کو نمازِ صبح (فجر) میں یہ دعا کرتے ہوئے سنا: «اللَّهُمَّ الْعَنْ بَنِي لِحْيَانَ، وَرِعْلًا، وَذَكْوَانَ، وَعُصَيَّةَ، عَصَوُا اللَّهَ وَرَسُولَهُ، وَغِفَارُ غَفَرَ اللَّهُ لَهَا، وَأَسْلَمُ سَالَمَهَا اللَّهُ» ”اے اللہ! بنو لحیان، رعل، ذکوان اور عصیہ پر لعنت فرما، جنہوں نے اللہ اور اس کے رسول کی نافرمانی کی، اور قبیلہ غفار کی اللہ مغفرت فرمائے اور قبیلہ اسلم کو اللہ سلامت رکھے۔“