المستدرك على الصحيحين

عامر بن عبداللہ بن زبیر اپنے والد سے روایت کرتے ہیں کہ وہ نبی کریم ﷺ کی خدمت میں حاضر ہوئے جبکہ آپ ﷺ پچھنے لگوا (حجامہ کروا) رہے تھے، جب آپ ﷺ فارغ ہوئے تو فرمایا: ”اے عبداللہ! اس خون کو لے جاؤ اور اسے ایسی جگہ بہا دو جہاں تمہیں کوئی دیکھ نہ سکے،“ پس جب میں رسول اللہ ﷺ کے پاس سے نکلا تو میں نے اس خون کا قصد کیا اور اسے پی لیا، جب میں واپس آیا تو نبی کریم ﷺ نے دریافت فرمایا: ”اے عبداللہ! تم نے کیا کیا؟“ میں نے عرض کیا: میں نے اسے ایسی جگہ چھپا دیا ہے جہاں میرا خیال ہے کہ وہ لوگوں سے پوشیدہ رہے گا، آپ ﷺ نے فرمایا: ”شاید تم نے اسے پی لیا ہے؟“ میں نے عرض کیا: جی ہاں، آپ ﷺ نے فرمایا: ”اور تمہیں خون پینے کا کس نے حکم دیا تھا؟ تمہاری وجہ سے لوگوں کے لیے ہلاکت (آزمائش) ہے اور لوگوں کی وجہ سے تمہارے لیے ہلاکت ہے۔“

سیدنا عبداللہ بن زبیر رضی اللہ عنہما سے روایت ہے کہ میں نے نبی کریم ﷺ کو فرماتے ہوئے سنا: ”جس نے قرآن کی تلاوت کی، خواہ وہ زبانی ہو یا دیکھ کر، اسے جنت میں ایک ایسا درخت عطا کیا جائے گا کہ اگر کوئی کوا اس کے ایک پتے کے نیچے بچہ نکالے، پھر وہ بچہ اڑنا شروع کرے تو اس پتے کی مسافت ختم کرنے سے پہلے وہ بچہ بوڑھا ہو جائے گا۔“