المستدرك على الصحيحين

ابو اسحاق بیان کرتے ہیں کہ لوگ نمازِ استسقاء کے لیے نکلے اور ان میں سیدنا زید بن ارقم رضی اللہ عنہ بھی موجود تھے، میرے اور ان کے درمیان صرف ایک آدمی کا فاصلہ تھا، میں نے ان سے پوچھا: ”اے ابو عمرو! نبی کریم ﷺ نے کتنے غزوات فرمائے؟“ انہوں نے جواب دیا: ”انیس،“ میں نے پوچھا: ”آپ خود آپ ﷺ کے ہمراہ کتنے غزوات میں شریک رہے؟“ انہوں نے فرمایا: ”سترہ۔“
یہ حدیث شیخین کی شرط پر صحیح ہے۔

سیدنا زید بن ارقم رضی اللہ عنہ سے روایت ہے کہ ہم رسول اللہ ﷺ کے ساتھ نکلے یہاں تک کہ جب ہم غدیرِ خم کے مقام پر پہنچے تو آپ ﷺ نے درختوں کے سائے میں جگہ صاف کرنے کا حکم دیا، اس دن اس قدر شدید گرمی تھی کہ ہمیں کبھی اس سے زیادہ سخت گرم دن کا سامنا نہیں کرنا پڑا تھا، پھر آپ ﷺ نے اللہ کی حمد و ثنا بیان کی اور فرمایا: ”اے لوگو! کوئی ایسا نبی مبعوث نہیں ہوا جس کی عمر اس سے پہلے گزرنے والے نبی کی عمر کے آدھے کے برابر نہ رہی ہو، اور مجھے گمان ہے کہ عنقریب مجھے (رب کی طرف سے) بلاوا آئے گا اور میں اسے قبول کر لوں گا، میں تمہارے درمیان ایسی چیز چھوڑے جا رہا ہوں جس کے بعد تم کبھی گمراہ نہیں ہو گے اور وہ اللہ عزوجل کی کتاب ہے،“ پھر آپ ﷺ کھڑے ہوئے اور سیدنا علی رضی اللہ عنہ کا ہاتھ تھام کر فرمایا: ”اے لوگو! تمہاری جانوں پر تم سے زیادہ حق کس کا ہے؟“ سب نے عرض کیا: اللہ اور اس کا رسول بہتر جانتے ہیں، آپ ﷺ نے فرمایا: ”جس کا میں مولا ہوں، علی بھی اس کا مولا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔