المستدرك على الصحيحين

محمد بن عمر سے روایت ہے کہ سعید بن یربوع بن عنکثہ بن عامر بن مخزوم، جن کی کنیت ابو ہود تھی، فتح مکہ کے دن اسلام لائے، انہوں نے رسول اللہ ﷺ کے ساتھ غزوہ حنین میں شرکت کی اور رسول اللہ ﷺ نے انہیں حنین کے غنائم میں سے پچاس اونٹ عطا فرمائے۔

محمد بن عمر سے روایت ہے، انہوں نے کہا کہ میں نے عبداللہ بن جعفر کو یہ کہتے ہوئے سنا کہ سیدنا عمر بن خطاب رضی اللہ عنہ سعید بن یربوع کے گھر تشریف لائے اور ان کی بینائی چلے جانے پر ان سے تعزیت کی اور فرمایا: ”آپ جمعہ اور رسول اللہ ﷺ کی مسجد میں نماز باجماعت ادا کرنا نہ چھوڑا کریں،“ انہوں نے عرض کیا: ”میرا کوئی لانے والا (رہنما) نہیں ہے،“ تو عمر رضی اللہ عنہ نے فرمایا: ”ہم آپ کے لیے ایک رہنما بھیج دیں گے،“ چنانچہ انہوں نے جنگی قیدیوں میں سے ایک غلام ان کی خدمت کے لیے بھیج دیا۔ راوی کہتے ہیں کہ سعید بن یربوع رضی اللہ عنہ کی وفات 54 ہجری میں مدینہ منورہ میں ہوئی اور وفات کے وقت ان کی عمر ایک سو بیس سال تھی۔

مصعب بن عبداللہ زبیری سے روایت ہے کہ سعید بن یربوع بن عنکثہ مخزومی کی وفات 55 ہجری میں ہوئی جبکہ وہ ایک سو اٹھارہ سال کے تھے، مصعب کہتے ہیں کہ دورِ جاہلیت میں ان کا نام ”صرم“ تھا تو رسول اللہ ﷺ نے ان کا نام بدل کر ”سعید“ رکھ دیا، اور ان کی والدہ کا نام ہند تھا۔
سیدنا ابو الیسر کعب بن عمرو انصاری رضی اللہ عنہ کے مناقب کا ذکر۔